"سامۇرىق-قازىنا" ءال-اۋقات قورىنىڭ باسقارما ءتوراعاسى ءومىرزاق شوكەيەۆ نۇرسۇلتان نازاربايەۆتىڭ قازاقستان حالقىنا جولداۋى بارىسىندا ايتقان سىنىنا قاتىستى پىكىرىن ءبىلدىردى، - دەپ حابارلايدى «قامشى» پورتالى Tengrinews.kz – كە سىلتەمە جاساپ.

ول مەملەكەت باسشىسىنىڭ سىنىن سىندارلى دەپ سانايدى ەكەن.

«اڭگىمە قوردىڭ شتاتى جايىندا. "سامۇرىق-قازىنا" قورىنىڭ اكتيۆتەرى جالپى ىشكى نارىقتىڭ 40-تان اسا پايىزىنا تەڭ، "500-دەن اسا ەنشىلەستەردى قوسا ەسەپتەگەندە". "حالىق مۇنى تۇسىنبەۋى مۇمكىن"، - دەگەن ەدى مەملەكەت باسشىسى ءوز جولداۋىن جاريالاۋ كەزىندە.

"مەملەكەت باسشىسى ءوز سىنىندا بارلىعىن دۇرىس ايتتى. جۇمىس ىستەگەن كوپ جىلداردا ۇلتتىق كومپانيادان كوپتەگەن اكتيۆ پەن نىسان الىندى، حولدينگ ەپسىز مەحانيزمگە اينالدى. زاماناۋي تالاپتاردى ەسكەرىپ، ءبىز "سامۇرىق-قازىنا" توبىنىڭ وزگە قىرىنان قاجەتتىگىن تۇسىندىك"، - دەدى شوكەيەۆ.

ونىڭ ايتۋىنشا، بۇل مىندەتتى اتقارۋ ماقساتىندا مەملەكەت باسشىسى 2014 جىلى قازاندا ىسكە قوسقان باعدارلاما جاسالدى. شوكەيەۆتىڭ ويىنشا، بۇل ۇزاق مەرزىمدى جۇيەلى جۇمىس، ونىڭ ىشىندە كومپانيالار سانىن قىسقارتۋ دا بار. ونىڭ سوزىنە قاراعاندا، كەز كەلگەن اۋقىمدى وزگەرىس كەزىندە بەلگىلى ءبىر قارسىلىقتار بولادى. "ءبىز ءۇشىن پرەزيدەنتتىڭ جولداۋىندا بۇل جۇمىستىڭ ماڭىزدىلىعى مەن ءبىرىنشى دارەجەلىلىگىنە نازاردىڭ اۋدارىلۋى ماڭىزدى"، - دەدى "سامۇرىق-قازىنا" باسشىسى.

شوكەيەۆتىڭ مالىمەتىنشە، قۇرىلىمدا بۇگىنگى تاڭدا باسقارۋدىڭ 9 دەڭگەيى بار، ياعني بۇل قورعا 9-بۋىنعا دەيىنگى ەنشىلەس كومپانيالار كىرەدى. ارينە، ول باسقارۋ مەن وندا بولىپ جاتقان ۇدەرىستەردى باقىلاۋدى قيىنداتادى. وزگەرىس جانە جەكەشەلەندىرۋ شەڭبەرىندە ەنشىلەستەردى 4-كە دەيىن قىسقارتۋ بويىنشا ناقتى جوسپارىمىز بار"، - دەدى شوكەيەۆ.

"سامۇرىق-قازىنا" باسشىسىنىڭ ايتۋىنا قاراعاندا، 2013 جىلدان بەرى ءتيىمسىز كومپانيالاردى قىسقارتۋ بويىنشا جۇمىس بەلسەندى تۇردە ءجۇرىپ جاتىر. سونىڭ ناتيجەسىندە كومپانيالار سانى 768-دەن 560-قا دەيىن قىسقارعان.