شىعىس قازاقستان وبلىسىنداعى ءبىرقاتار كاسىپورىنداردا وبلىس پروكۋراتۋراسىنىڭ ارنايى تەكسەرىسىنەن سوڭ جەرگىلىكتى جۇمىسشىلارعا قاتىستى ءبىرقاتار ادىلەتسىزدىكتەر انىقتالعان. بۇل تۋرالى «قامشى» پورتالى YK-news.kz-كە سىلتەمە جاساپ حابارلايدى.

شەتەلدىك جۇمىسشىلار مۇندا ەڭبەك دەمالىسىنا سيرەك شىعىپ، الايدا، ەڭبەكاقىنى قازاقستاندىق جۇمىسشىلارعا قاراعاندا كوپ الىپ كەلگەن.

تەكسەرىس كەزىندە كوپتەگەن فيرمالار ەڭبەكشىلەرمەن زاڭعا سايكەس ەڭبەك كەلىسىم-شارتىن ەمەس، قىزمەت كورسەتۋ كەلىسىمىن جاساپ كەلگەن. ول بويىنشا، قىزمەت كورسەتۋشى دەنساۋلىق جاعدايىنا بايلانىستى تولەنەتىن دەمالىس، ەكولوگيالىق جەڭىلدىكتەر، باسقا دا كەپىلدىكتەر الا المايدى. ەڭبەك دەمالىسىنا شىعۋ دا باسشىلىقتىڭ ۇيعارىمىنا بايلانىستى رەتتەلىپ وتىرعان. مۇنداي ەڭبەك قارىم-قاتىناسى شەتەلدىكتەرمەن قاتار، قازاقستاندىق جۇمىسشىلارعا قاتىستى دا قولدانىلعان.

تەكسەرىس كەزىندە «تارباعاتاي-مۇناي» جشس-دە ەڭبەكاقىنى كەشىكتىرىپ تولەۋ دەرەكتەرى انىقتالعان. ال، «مايلى داقىلدار تاجىريبەلىك شارۋاشىلىعى» جشس-دا سىياقى تەك شەتەلدىك جۇمىسشىلارعا عانا بەرىلىپ وتىرعان.

پروكۋراتۋرا قىزمەتكەرلەرى سونداي-اق، جەرگىلىكتى جۇمىسشىلار مەن شەتەلدىكتەردىڭ جالاقىلارىندا دا ايىرماشىلىق بارىن ايتادى. ماسەلەن، قازاقستاندىق گەودەزيست 150 مىڭ  تەڭگە ەڭبەكاقى السا، قىتايلىق مامانعا كاسىپورىندار 170 مىڭ تەڭگە تولەپ كەلگەن. مۇنداي الشاقتىق باسقا ماماندىق يەلەرىنىڭ ەڭبەكاقىلارىنان دا انىقتالعان.

«ەڭبەكشىلەردىڭ جالاقىلارىنداعى الشاقتىقتىڭ ورتاشا كورسەتكىشى 50 مىڭ تەڭگەنى قۇراعا»، - دەيدى پروكۋراتۋرا وكىلدەرى.