الماتى وبلىسىندا پوليسەيلەر كىسى ءولىمىن اشتى. قىلمىس جاساعان كۇدىكتى  ءبىرىنشى كەزەكشىلىك تاۋلىك ىشىندە ۇستالدى. بۇل تۋرالى «قامشى» پورتالى قازاقپاراتقا سىلتەمە جاساپ حابارلايدى.

2015 جىلعى 29 قاراشادا ەڭبەكشىقازاق اۋدانىندا شەلەك اۋىلىنا جاقىن جەردە، سونداي-اق نۇرا اۋىلى ماڭىندا كۇشتەپ ءولتىرۋ بەلگىلەرىمەن 74 جاستاعى ەر ادام مەن 63 جاستاعى ايەل ادامنىڭ دەنەسى تابىلدى.  قۇقىق قورعاۋشىلار جابىرلەنۋشىلەر الماتىدان «نيسسان پاترول» كولىگىمەن كەلگەنىن انىقتادى، كولىك كەيىننەن جولداعى ءدامحانالاردىڭ ءبىرىنىڭ جانىنان تابىلدى.  

 «كەزەكشى تاۋلىك ىشىندە كورشى رايىمبەك اۋدانىنىڭ 44 جاستاعى تۇرعىنى ۇستالدى. كۇدىكتى ەر ادام  جابىرلەنۋشىلەرگە ءىرى سومادا اقشا قارىز بولعان. ونى اۋىر قىلمىس جاساۋعا يتەرمەلەگەن دە وسى سەبەپ بولىپ شىقتى. قىلمىس قارۋى - تەمىر ارماتۋرا زاتتاي ايعاق رەتىندە قىلمىستىق ءىس ماتەريالىنا تىركەلدى»، - دەپ حابارلادى الماتى وبلىسى ءىىد باسپا ءسوز قىزمەتىنەن.

ەكى زەينەتكەردى ءولتىرۋ فاكتىسى بويىنشا تەرگەۋ الماتى وبلىسى  ءىىد تەرگەۋ باسقارماسىنىڭ وندىرىسىندە جالعاسادى. كۇدىكتى ەر ادام  كىسى ولتىرگەنى ءۇشىن بۇدان بۇرىن دا قىلمىستىق جاۋاپكەرشىلىككە تارتىلعاندىعى انىقتالدى، ول قاماۋعا الىندى.