الماتىدا سوققى الىپ اۋرۋحاناعا تۇسكەن جەدەل-جاردەم قىزمەتكەرلەرىنىڭ ىسىنە قاتىستى جاڭا جاعداياتتار پايدا بولدى. ايىپتالۋشىنىڭ ادۆوكاتى وقيعا ورنىندا كۇدىكتىگە دارىگەرلەر ءبىرىنشى بولىپ قول جۇمساعان دەپ وتىر. بۇل تۋرالى «قامشى» پورتالى Tengrinews.kz – كە سىلتەمە جاساپ حابارلايدى.

جەدەل جاردەم دارىگەرىن ۇرىپ-سوقتى دەپ ايىپتالىپ وتىرعان ەر ادامنىڭ ادۆوكاتى بولعان وقيعانىڭ مۇلدەم باسقا نۇسقاسىن ايتىپ وتىر. ادۆوكات رايفا بايمۇحامەتوۆانىڭ ايتۋىنشا، وقيعا ورنىندا دارىگەر ءبىرىنشى بولىپ اشۋلانىپ، سوققى جاساعان، سوسىن عانا ءقازىر كۇدىكتى رەتىندە قاماۋدا جاتقان ەر ادام جەردەن تاس الىپ، جەدەل جاردەم قىزمەتكەرىنە لاقتىرعان.

قورعاۋشىنىڭ ايتۋىنشا، بۇل مالىمەت جەدەل جاردەم كومەگىنە جۇگىنۋشى قىز بەن ونىڭ قۇربىسى بەرگەن تۇسىنىكتەمەلەرمەن سايكەس كەلەدى. "قىز جەدەل جاردەمدى شاقىردى. ول جۇرەگىنىڭ اۋىرىپ تۇرعانىن ايتقان. باستاپقىدا ءبىرىنشى بريگادا، كەيىن ەكىنشىسى كەلگەن. دارىگەرلەر قىزدى اۋرۋحاناعا اكەتپەك بولعان، ءبىراق قىز بەن مەنىڭ قورعاۋىمداعى ادام بۇعان قارسى بولادى. دارىگەرلەر بولسا ءوز ايتقاندارىنان قايتپايدى. سول كەزدە ايىپتالۋشى قىزبەن بىرگە جەدەل جاردەم كولىگىمەن باراتىنىن اييقان. ءبىراق دارىگەرلەر وعان قارسى بولدى"، - دەيدى ادۆوكات.

وسىدان كەيىن بايمۇحامەتوۆانىڭ ايتۋىنشا، ەر ادام مەن دارىگەرلەردىڭ اراسىندا كەلىسپەۋشىلىك بولدى، دارىگەرلەردىڭ ءبىرى توسىننان ايىپتالۋشىنىڭ بەتىنە سوققى جاسايدى. "ونىڭ مۇرنى سىندى. بۇدان كەيىن ول تاستى الىپ، ءوزىن قورعاۋ ءۇشىن لاقتىرا سالدى. ول تاستى بىرەۋگە دالدەپ لاقتىرماعانىن ايتتى، ونىڭ مۇمكىندىگى دە بولمادى - بەتى قان-قان بولدى، كوزى جاساۋراپ تۇردى"، - دەدى قورعاۋشى. 

ءدال وسى نۇسقانى ايىپتالۋشىنىڭ دوسى باتىر ياگوفاروۆ تا ايتىپ وتىر.

«ول مەنىڭ جاقسى دوسىم، تانىستىعىمىزعا 16 جىل بولدى. ول ەشقاشان اشۋىن كورسەتپەگەن. ونىڭ ەكى جوعارى ءبىلىمى بار: قۇرىلىس جانە ەكونوميكا سالالارىندا. ونىڭ كامەلەتكە تولماعان ەكى بالاسى بار، تۇراقتى جۇمىسى بار، اسىراۋىندا ەگدە جاستاعى اتا-اناسى بار. (...) بارلىعىڭىزدان مالىمەتكە ءتۇرلى جاقتان قاراۋلارىڭىزدى سۇرايمىن جانە ەرتە باستان شەشىم شىعارماۋلارىڭىزدى سۇرايمىن، راستالماعان دەرەكتەرمەن ادامدى ايىپتاماۋلارىڭىزدى سۇرايمىن»، - دەپ مالىمدەدى ول. 

قازىرگى ۋاقىتتا الماتىدا جەدەل جاردەم قىزمەتكەرلەرىنە شابۋىل جاسادى دەلىنگەن كۇدىكتى ۋاقىتشا ۇستاۋ يزولياتورىندا قاماۋدا وتىر ونىڭ كەپىل ارقىلى بوساتۋ تۋرالى ءوتىنىشى سوت تاراپىنان قاناعاتتاندىرىلمادى. ءقازىر سوتقا دەيىنگى تەرگەۋ امالدارى جۇرۋدە. سونىمەن قاتار، كۇدىكتىنىڭ دوسىنىڭ ايتۋىنشا، ايىپتالۋشى تاراپ جابىرلەنۋشى تاراپپەن بايلانىسىپ، كومەكتەسۋگە ۇسىنىس جاساعان.

ەسكە سالايىق، وقيعا 26 قاراشاعا قاراعان ءتۇنى ناۋرىزباي اۋدانىنىڭ جەكە سەكتورىندا بولدى. قىزمەت كورسەتۋدە ەر ادام جەدەل جاردەم قىزمەتكەرلەرىنە شابۋىلداپ، ولاردىڭ ءبىرىنىڭ باسىنا كىرپىشپەن سوققى جاساعان. زارداپ شەككەندەردىڭ ءبىرى اۋىر جاعدايدا اۋرۋحاناعا ءتۇستى. ول ەس-تۇسسىز كۇيدە جانساقتاۋ بولىمىندە جاتىر. شابۋىلداعان ەر ادام ۇستالدى.  

ايتا كەتەيىك، وقيعادان كەيىن الماتىدا جەدەل جاردەم دارىگەرلەرىنىڭ توتەنشە جيىنى ءوتتى. دارىگەرلەر بولعان وقيعاعا بايلانىستى نارازىلىق تانىتىپ، شاقىرۋلارعا شىعۋعا قورقاتىنىن مالىمدەدى.