ەلباسى ۇكىمەت وتىرىسىندا ەكونوميكالىق جاعىنان ءتيىمدى ءارى مول ءونىم بەرەتىن جىلىجاي كولەمىن ۇلعايتۋ كەرەكتىگىن اتاپ وتكەن بولاتىن. شىمكەنتتەگى Zero Max Kz جىلىجاي قۇرىلىمدارىن ءوندىرۋ زاۋىتى ءدال وسى تاپسىرمانى ورىنداۋ ءۇشىن توقتاۋسىز جۇمىس ىستەپ جاتىر، دەپ حابارلادى  24.kz.

يندۋستريالاندىرۋ كارتاسى شەڭبەرىندە اشىلعان كاسىپورىن جىلىنا 376 گەكتار جەرگە جەتەتىن جىلىجاي قۇرىلىمدارىن شىعارۋعا قاۋقارلى. بولاشاقتا پلەنكا مەن تامشىلاتىپ سۋارۋعا مۇمكىندىك بەرەتىن قوندىرعىلاردى دا وندىرمەك.

باقىتجان رەدجەپوۆ زاۋىت اشىلعان كۇننەن باستاپ ەڭبەك ەتىپ كەلەدى. ول كاسىپورىنداعى الىپ قوندىرعىنى باسقارادى. وزىق تەحنولوگيانىڭ ءتىلىن شەتەلگە بارىپ وقىپ، يگەرىپ كەلدى. وزبەكستاننان اتا جۇرتقا قونىس اۋدارعان ماتەماتيكا ءپانىنىڭ وقىتۋشىسى جۇرەك قالاۋىمەن وندىرىسكە اۋىسادى. ءقازىر ءوز ءىسىن تولىق مەڭگەرگەن.

 «ولشەمدەردى بەرگەننەن كەيىن بۇل اپپارات اۆتوماتتى تۇردە ءوزى ىستەيدى. بۇل جەردە جالپاق تۇرىندە كەلگەن ءليستتى كەرەكتى دومالاق نە ءتورت بۇرىشتى فيگۋراعا سالىپ، ونى دانەكەرلەيدى. كەرەكسىز شىعىنداردى قىرناپ الىپ، ونى اليۋمينيي قاباتپەن سىرلاپ، دايىن كۇيدە شىعارامىز»، - دەدى وپەراتور: باقىتجان رادجەپوۆ.

زاۋىت جىلىجايدىڭ سىرتقى قاڭقاسىمەن بىرگە 50-گە جۋىق قوسالقى بولشەكتەرىن شىعارادى. شيكىزات وتاندىق. مىرىشتان جاسالعان تەمىر بۇيىمدارى شىرىمەيدى.

سەح باسشىسى ورازباي قادىروۆتىڭ ايتۋىنشا، مونتاجدىڭ قوسالقى بولشەگىنىڭ بارلىعى وسى زاۋىتتان شىعادى. «ەندى بىزدە پلەنكا زاۋىتىن سالامىز دەپ جاتىرمىز، بيىل باستايمىز. كەيىن تامشىلاتىپ سۋارۋ بولشەكتەرىن وڭتۇستىك كورەيادان الىپ جاتىرمىز. جاقىندا زاۋىت بىتسە، جىلىجايدىڭ بارلىعى وزىمىزدەن شىعاتىن بولادى»، - دەيدى ول.

كاسىپورىن جىلىجاي قۇرىلىمدارىن ءوندىرىپ قانا قويماي، ونى تولىق قۇراستىرىپ، ىسكە قوسىپ بەرەدى. كەپىلدەمەسى تاعى بار. بۇزىلسا، وزدەرى جوندەيدى.

 «قازىرگى كەزدە جىلىجايعا سۇرانىس كوبەيىپ جاتىر. قازىرگى كۇنگە دەيىن 150 گەكتار جىلىجاي ونىمدەرىن شىعارىپ، سول سۇرانىستارعا سالىپ بەردىك. تولىق قۋاتتا جۇمىس ىستەپ تۇرعان زاۋىتتا جالپى 60-قا جۋىق ادام ەڭبەك ەتەدى. ولاردىڭ دەنى - اۋىل جاستارى»، - دەدى  جىلىجاي قۇرىلىمدارىن ءوندىرۋ زاۋىتى باسشىسىنىڭ ءوندىرىس جونىندەگى ورىنباسارى ءالماحان ايتمۋحامەدوۆ.

مەملەكەت قولداۋىنىڭ ارقاسىندا اياقتان تۇرعان كاسىپورىن جۇمىلا ەڭبەك ەتكەندە عانا كەز كەلگەن قيىندىقتى ەڭسەرە الاتىندارىنا سەنىمدى.

دەرەككوز:       24.kz.