وڭتۇستىك قازاقستان وبلىسى، تولەبي اۋدانى، اباي اۋىلىندا ءسانى مەن سالتاناتى جاراسقان «امانتا» اتىنداعى جاڭا مەشىت اشىلدى. سالتاناتتى شاراعا قازاقستان مۇسىلماندار ءدىني باسقارماسىنىڭ ءتوراعاسى، باس ءمۇفتي ەرجان قاجى مالعاجى ۇلى، نايب ءمۇفتي سەرىكباي قاجى وراز، قوعام قايراتكەرى اسقار قۇلىبايەۆ، قازاقستان مۇسىلماندار ءدىني باسقارماسىنىڭ وڭتۇستىك قازاقستان وبلىسى بويىنشا وكىل يمامى احمەتجان قاجى كەرىمبەك جانە جەرگىلىكتى جۇرتشىلىق قاتىستى، دەپ حابارلايدى «قامشى» پورتالى.

سالتاناتتى شارا الدىمەن قاسيەتتى قۇران وقۋمەن باستالدى. ونى استانا قالاسى «ازىرەت سۇلتان» مەشىتىنىڭ باس يمامى – نايب ءمۇفتي سەرىكباي قاجى وراز وقىپ، دۇعا باعىشتادى.

وسىدان كەيىن قۇتتىقتاۋ ءسوز العان قمدب-نىڭ ءتوراعاسى، باس ءمۇفتي ەرجان قاجى مالعاجى ۇلى جينالعان مۇسىلمان جاماعاتىن جاڭا مەشىتتىڭ اشىلۋىمەن قۇتتىقتادى. «مەشىت – ەلدىڭ بىرلىگى مەن ىنتىماعىنا، جاستاردىڭ دۇرىس تالىم-تاربيە الاتىن وشاعىنا اينالۋى ءتيىس»، - دەدى باس ءمۇفتي. وسىدان كەيىن مەشىتتىڭ كىتاپحاناسىنا قاسيەتتى كالام ءشاريفتى سىيعا تارتتى.

سونداي-اق، مەشىتتىڭ اشىلۋ سالتاناتىنا ەلىمىزگە تانىمال انشى-كومپوزيتور ەسكەندىر حاسانعالييەۆ، اقىن بالعىنبەك يماش، «قوڭىر» توبى سىندى ونەر جۇلدىزدارى قاتىسىپ، ەلدى جاندى اندەرىمەن ءتانتتى ەتتى.

جاڭا مەشىت وسى اۋىلدىڭ تۋماسى، وبلىستىق ءماسليحاتتىڭ دەپۋتاتى اسەت قايىپبەكوۆتىڭ دەمەۋشىلىگىمەن سالىندى. مەشىت كيەلى قازىعۇرت تاۋىنىڭ ەتەگىندە، ۇلكەن جولدىڭ بويىندا ورنالاسقان. عيبادات ءۇيىنىڭ سىيىمدىلىعى 400 ادامعا ارنالعان. مەشىت بۇگىنگى زامان تالابىنا ساي ەتىپ جاسالعان.