قازاقستانداعى اگرارلىق سەكتوردىڭ نەگىزگى ءبىر سالاسى ەگىن شارۋاشىلىعى ەكەنى بەلگىلى. ەلىمىزدىڭ سولتۇستىك، ورتالىق وڭىرلەرىندەگى القاپتار تۇتاستاي رەسپۋبليكانى استىقپەن قامتاماسىز ەتۋگە، ءتىپتى، ءداندى داقىلداردى شەت ەلدەرگە ەكسپورتتاۋعا مۇمكىندىك بەرۋدە. ەگىن القابىنان جينالعان استىق  داستارحانىمىزعا دايىن ءونىم بولىپ كەلگەنگە دەيىن بىرنەشە ساتىدان تۇراتىن كۇردەلى دايىنداۋ پروسەستەرىنەن وتەدى. استىقتى ساقتاۋ، كەپتىرۋ، ودان ۇن تارتۋ دا ءىرىلى-ۇساقتى كومپانيالاردىڭ جىل بويى تىنىمسىز اينالىساتىن جۇمىسى. وتاندىق نارىقتاعى نان باعاسىنا دا ىقپال ەتەتىن، تۋراسىن ايتقاندا، نارىقتاعى نان باعاسىن بەكىتەتىن دە وسى كومپانيالار. ءبىز بۇگىن وسى سالانىڭ ىقپالدى دەگەن ءىرى ويىنشىلارى تۋرالى ءسوز قوزعاعاندى ءجون كوردىك. نازارلارىڭىزعا استىق القاپتارىنان جينالعان بيدايدى ساقتاۋ، وڭدەۋ، دايىن ءونىم تۇرىندە ساتۋ ىسىمەن اينالىساتىن ەلىمىزدىڭ ءار وڭىرىندەگى كومپانيالاردىڭ قىسقاشا ءتىزىمىن ۇسىنامىز.

استانا

«سەسنا-استىق» كونسەرنى» جاۋاپكەرشىلىگى شەكتەۋلى سەرىكتەستىگى 1992 جىلى «بيوسەس» فيرماسى بولىپ قۇرىلعان. كەيىن 1997 جىلى «اقمولا-استىق» ج ش س بولىپ قايتا تىركەلدى. بۇگىنگى اتاۋىن 2000 جىلى يەلەندى. استىق ساقتاۋ، وڭدەۋ جۇمىستارىن جۇرگىزۋگە ليسەنزياسى بار كومپانيا. استىق كونسەرنىنە سونداي-اق،اقمولا وبلىسى جالتىر اۋىلىندا ورنالاسقان  «كولوتۋن-95»، «جالتىر مۇناي بازاسى»، «جالتىر ەليەۆاتورى» سىندى تاعى ءۇش جاۋاپكەرشىلىگى شەكتەۋلى سەرىكتەستىك پەن «استىقجان» ساۋدا ورتالىعى تيەسىلى. باسقارما ءتوراعاسى نيكولاي مەششەرياكوۆ.

الماتى وبلىسى

«ازيااگروفۋد» اكسيونەرلىك قوعامى 2010 جىلى قۇرىلعان. شامالعانداعى «نا ونىمدەرى» ءجشس-نىڭ مۇراگەرى بولىپ تابىلادى. باسقارما ءتوراعاسى ايدارحان سارسەمبايەۆ. نەگىزگى قىزمەتى – ۇن، كراحمال دايىنداۋ. قۇرىلتايشىلارى ءاليحان تالعاتبەك پەن ەرلان بايمۇراتوۆ ارقىلى «بايان سۇلۋ» اق-مەن بايلانىسى بار.

سولتۇستىك قازاقستان وبلىسى

«قىزىلتۋ ۇن تارتۋ كومبيناتى» ج ش س 2006 جىلى قۇرىلعان. 200-دەن استام جۇمىسشىسى بار كاسىپورىن استىقتى قابىلداۋ، ساقتاۋ، كەپتىرۋ، وڭدەۋمەن اينالىسادى. «قازەكسپواستىق» حولدينگى قۇرامىنا ەنەدى. كومبيناتقا Golden Grain ساۋدا بەلگىسىمەن ۇگ شىعارۋشى «اگروينۆەست-ترەيدينگ» ج ش س يەلىك ەتەدى.

جامبىل وبلىسى

«زار-زامين» ج ش س تاراز قالاسىندا ورنالاسقان. «ازىق-تۇلىك كەلىسىم-شارتى كوپوراسياسى» اق-ى قۇرامىنا ەنەدى. 2003 جىلى كومپانيا مەملەكەتتىك استىق رەسۋرستارىن باسقارۋ بويىنشا جالعىز اگەنت رەتىندە انىقتالدى. اتقاراتىن قىزمەت تۇرلەرى:  ۇن ونىمدەرىن قابىلداۋ، ساقتاۋ، وڭدەۋ، ءوندىرۋ جانە ساتۋ.

قىزىلوردا وبلىسى

«جالاعاش ەليەۆاتورى» ج ش س. سەرىكتەستىكتىڭ 100 پايىزدىق ۇلەسى قىزىلوردا وبلىستىق اكىمدىگىنىڭ شەشىمىمەن «بايقوڭىر» الەۋمەتتىك-كاسىپكەرلىك كورپوراسياسىنا ساتىلىپ الىنعان. كەيىن اتاۋى «بايقوڭىر» اگروحولدينگى بولىپ وزگەرتىلگەن كاسىپورىن كۇرىش جانە كۇرىش كراحمالىن ساقتاۋ، وڭدەۋ، ماكارون ونىمدەرىن شىعارۋ قىزمەتىمەن اينالىسادى.

وڭتۇستىك قازاقستان وبلىسى

وڭتۇستىك قازاقستاندا بۇل سالانى «التىن ءدان» ج ش س باستاپ تۇر. سەرىكتەستىك قۇرامىندا ەكى ۇن زاۋىتى بار. ۇن تارتۋ، استىق ساقتاۋ، تاسىمالداۋ، ماكارون، ءسۇت ونىمدەرىن شىعارۋمەن اينالىساتىن كومپانيا اقمولا وبلىسىنداعى بىرنەشە ەليەۆاتورعا جانە وقو سايرام اۋدانىنداعى مال ۇستاۋ كەشەنىنە دە يەلىك ەتەدى. 1998 جىلى «اق بيداي» اق-ى نەگىزىندە قۇرىلعان كومپانيا مەملەكەت تاراپىنان «بيزنەستىڭ جول كارتاسى-2020» باعدارلاماسى، «قازاگرو» حولدينگى ارقىلى قارجىلاي قولداۋ الىپ وتىر. كومپانيا ديرەكتورى – باكارام ابدىكارىموۆ.

اقمولا وبلىسى

«ۋروجاي» ج ش س استىق قابىلداۋ، ساقتاۋ جانە وڭدەۋمەن اينالىسادى. اتاقتى جاقسى ەليەۆاتورى بازاسىندا قۇرىلعان. 2003 جىلى «اگروفيرما TNK» ج ش س قۇرامىنا كىردى. بارلىعى «اگروفيرما TNK» كومپانيالار توبىنا بىرنەشە ەليەۆاتور، مۇناي بازالارى مەن جانار-جاعار ماي ستانسالارى، ءسۇت زاۋىتتارىنا يەلىك ەتەتىن 17 كاسىپورىن كىرەتىنىن دە ايتا كەتۋ كەرەك.

باتىس قازاقستان وبلىسى

«جەلايەۆ نان ونىمدەرى كومبيناتى» اق-ى 2004 جىلى قۇرىلعان. نەگىزگى قىزمەتى – استىق قابىلداۋ، ساقتاۋ جانە وڭدەۋ. 2014 جىلعا دەيىن «كورونا-مۇقاتاي» ساۋدا بەلگىسىنىڭ يەسى «استىق ءوندىرىسى» جشس-گە تيەسىلى بولىپ كەلدى. ءقازىر رەسەيلىك «مارتين» اگرارلىق كومپانياسىنىڭ مەنشىگىنە وتكەن.

اقتوبە وبلىسى

«جاڭا ءالجان ۇن كومبيناتى» ج ش س «كورونا-پرەميۋم» ساۋدا بەلگىسىمەن «ەكسترا» سۇرىپتى ۇن ءوندىرۋشى ەلدەگى جالعىز كومپانيا. Investment Trust Company توبىنا ەنەتىن سەرىكتەستىك ۇدەمەلى يندۋستريالدى دامۋ باعدارلاماسى اياسىندا مەملەكەتتىك قولداۋعا يە بولىپ وتىر.

قاراعاندى وبلىسى

«اقنار» فيرماسى» ج ش س 1995 جىلى تىركەلگەن. نەگىزگى قىزمەتى ۇن تارتۋ جانە ساتۋ. فيرما ەكى ۇن تارتۋ كەشەنى مەن ءبىر ەليەۆاتورعا يەلىك ەتەدى. «ستاندارت»، «اقنار»، «بەرەكەت»، «يانتارنايا» سىندى بىرنەشە ساۋدا بەلگىسىمەن ءونىم ساتادى. ديرەكتورى – يگور كوروستەلوۆ.

شىعىس قازاقستان وبلىسى

«شىعىس قازاقستان ۇن-جەم كومبيناتى» اق بارلىق سۇرىپتاعى ۇن، ماكارون ونىمدەرى مەن مال جەمىن وندىرۋمەن اينالىسادى. نارىقتا «ارداگەر»، «ءبىرىنشى»، «سدوبۋشكا ليۋكس» ساۋدا بەلگىلەرىمەن تانىمال. كومپانيا اكسيالارىنىڭ 80 پايىزىنا «ارداگەر» ءوب» ج ش س (الماتى) يەلىك ەتەدى. ەلىمىزدە جانە تاجىكستاندا ەنشىلەس كومپانيالارى بار. قىزى اكسيونەرلەر وكىلى بولىپ تابىلاتىن راشيت سارسەنوۆ ارقىلى «نۋربانك» جانە Central Asia Petroleum Ltd جشس-عا قاتىسى بار.

قوستاناي وبلىسى

قوستاناي وبلىسىندا 120-دان استام ۇن تارتۋ كاسىپورىندارى جۇمىس ىستەيدى. ولاردىڭ ىشىندەگى ەڭ ءىرىسى – «قوستاناي ۇن كومبيناتى» اق-ى. كومپانيانىڭ ءىرى اكسيونەرلەرى رەتىندە تانىمال كاسىپكەر نۇرلان سماعۇلوۆتىڭ اكتيۆتەرى سانالاتىن Forward Grains Capital جانە Investment Trust Company جشس-تارىن ايتۋعا بولادى. باس ديرەكتورى – الەكساندر ميكەتكا.

كورىپ وتىرعاندارىڭىزداي، ەلىمىزدەگى استىق جيناۋ، ساقتاۋ، وڭدەۋ، دايىن نان ونىمدەرىن ساۋدالاۋمەن اينالىساتىن كاسىپورىنداردىڭ بارلىعى دەرلىك وتاندىق كومپانيالار سانالادى. كوبى – كەشەگى كەڭەستىك زاماندا نەگىزى قالانعان ءىرى ەليەۆاتورلار مەن ۇن كومبيناتتارىنا يە بولىپ قالعان كاسىپكەرلەر. استىق اينالاسىندا ارەكەت ەتىپ جۇرگەن كومپانيالاردى سانامالاپ وتىرىپ، بۇل سالادا باسەكەلەستىك ورتانىڭ الدەقاشان قالىپتاسىپ، نارىق زاڭدارىنىڭ بەرىك ورنىققانىن بايقاۋعا بولادى. سوعان قاراعاندا، «بۇل سالا دامىماي قالعان، قولداۋعا ءزارۋ، باسەكەلەستىك جوق» دەپ جۇرگەندەردىڭ بايبالامى نەگىزسىز بە دەگەن دە ويعا قالاسىز.

جومارت ابدوللا ۇلى

«قامشى» سىلتەيدى