بۇگىن قوعامدىق بەلسەندى بوتاگوز زارقىن قىزىنىڭ ۇيىندە الماتىلىق پوليسەيلەر ءتىنتۋ جۇرگىزدى، - دەپ حابارلايدى «قامشى» پورتالى.

قوعام بەلسەندىسىنىڭ ايتۋىنشا، پوليسەيلەردىڭ بۇل ارەكەتىنە الەۋمەتتىك جەلىدە قازاقستاندى رەسەيگە قوسۋ كەرەك دەپ سەپاراتيستىك يدەيالاردى ناسيحاتتاعان، بۇگىندە ءىسى سوتتا قارالىپ جاتقان ەرمەك تايشىبەكوۆتىڭ ارىزى نەگىز بولىپتى.

«بۇگىن قورداي سوتىندا تايشىبەكوۆ ءىسى بويىنشا ۇكىم وقىلاتىن ەدى. مەن سوعان جينالىپ جاتقان كەزدە ۇيگە پوليسيا قىزمەتكەرلەرى كەلدى. ءسىزدىڭ ۇستىڭىزدەن ۇلتارالىق ارازدىق تۋعىزاتىن جازبالار جاريالادى دەگەن ارىز ءتۇستى دەپ پوليسيالار ءۇيدى ءتىنتتى. ءتىنتۋ جۇرگىزۋگە سانكسيالارى دا بار ەكەن. قارسىلىق تانىتپادىم. ءۇيىمدى تۇگەل ءتىنتتى. ال، ارىز تۋرالى ايتسام، ەرمەك تايشىبەكوۆ مەنىڭ ۇستىمنەن شىلدە ايىندا پوليسياعا ارىز تۇسىرگەن. ونىڭ سەپاراتيستىك جازبالارىن جاريالاپ، زاڭ ورىندارىنا حابارلاعان سوڭ ماعان جاساعان قارسى ارەكەتىنىڭ ءتۇرى. سودان بەرى پوليسيا ول ارىزدى قاراماي كەلىپ، بۇگىن ەستەرىنە ءتۇسىپتى»، - دەيدى بوتاگوز زارقىن قىزى «قامشى» تىلشىسىنە.

پوليسەيلەر بوتاگوز زارقىن قىزىنىڭ ۇيىنەن نوۋتبۋگى مەن قازاقشا اندەر مەن فيلمدەر جازىلعان ديسكىلەردى تاركىلەگەن.

سونداي-اق، بوتاگوز زارقىن قىزى بۇگىن ساعات 15.30-دا پوليسياعا تەرگەۋگە باراتىنىن حابارلاعان.