25 اقپان كۇنى رف سىرتقى ىستەر ءمينيسترىنىڭ ورىنباسارى گريگوريي كاراسين قازاقستاننىڭ رەسەيدەگى ەلشىسى بولىپ قايتا تاعايىندالعان مارات تاجيننەن سەنىم گراموتاسىنىنىڭ كوشىرمەلەرىن قابىلدادى. اڭگىمە بارىسىندا رەسەيلىك-قازاقستاندىق ىنتىماقتاستىق، ينتەگراسيالىق قۇرىلىم شەڭبەرىندەگى ءوزارا ارەكەت، ايماقتىق جانە حالىقارالىق پروبلەماتيكا ماسەلەلەرى تالقىلاندى. "كەزدەسۋ قازاقستان-رەسەي قارىم-قاتىناسى ءۇشىن ادەتتەگىدەي سەنىمدى ءارى تاتۋ اتموسفەرادا ءوتتى. قازاقستان رەسپۋبليكاسىنىڭ ەلشىسىن سىرتقى ىستەر ءمينيسترى سەرگەي لاۆروۆ تا قابىلدادى"، - دەلىنگەن رف ءسىم سايتىنداعى حابارلامادا.
رەسەي مەملەكەتتىك دۋماسىنداعى وپپوزيسيالىق پارتيا جەتەكشىسى ۆلاديمير جيرينوۆسكييدىڭ سپيكەردىڭ ورىنباسارى ءارى قورعانىس جونىندەگى كوميتەتتىڭ مۇشەسى ەكەنىن ايتا كەتۋ كەرەك. ول "روسسيا 24" تەلەارناسىنىڭ ەفيرىندە 23 اقپان - رەسەيدەگى وتان قورعاۋشى كۇنىنە وراي سويلەگەن سوزىندە "ورتالىق ازيادا ەشقانداي رەسپۋبليكا بولماۋى كەرەك. ورتاازيالىق فەدەرالدىق وكرۋگى، ونىڭ باستى قالاسى - ۆەرنىي! بۇگىندە قالانىڭ بوتەن اتاۋى بار، الما-اتا - مەنىڭ تۋعان قالام. ونى وزبەكستان، قىرعىزستان، تاجىكستان، تۇرىكمەنستان، قازاقستان ويلاپ تاپتى. ورتاازيالىق فەدەرالدىق وكرۋگ!" - دەپ مالىمدەگەن بولاتىن. قازاقستاننىڭ سىرتقى ىستەر مينيسترلىگى بۇدان كەيىن جيرينوۆسكييدىڭ پىكىرىنە بايلانىستى رەسەيدىڭ سىرتقى ىستەر مينيسترلىگىنە نوتا ازىرلەپ جاتقانىن حابارلادى. ال ەلىمىزدىڭ ساياساتتانۋشىلارى جيرينوۆسكييگە قازاقستانعا كىرۋگە تىيىم سالۋدى ۇسىندى. ەكس-سەناتور عاني قاسىموۆ ونى ساياسي قايراتكەر بولۋ قۇقىعىنان ايىرۋ كەرەكتىگىن ايتتى. رف فەدەرالدىق جيىنى مەملەكەتتىك دۋماسى اپپاراتى جەتەكشىسىنىڭ ورىنباسارى، قوعاممەن بايلانىس جانە باق-پەن ءوزارا ارەكەتتەسۋ جونىندەگى باسقارمانىڭ باستىعى يۋريي شۋۆالوۆ قازاقستان مەن رەسەي قاتىناستارىندا ەشقانداي وزگەرىستىڭ بولمايتىنىن جەتكىزدى. ونىڭ ايتۋىنشا، ءقازىر رەسەيلىك حالىق قالاۋلىلارىنىڭ ءسوزىن دۇرىس جەتكىزبەۋ بايقالىپ وتىر.Tengrinews.kz
