بۇگىن قازاقستاندىق سەركە ساياساتكەر، مەملەكەتتىك باسقارۋ ىسىنە سوناۋ كەڭەستىك جىلداردان باستاپ-اق ارالاسقان، بيلىك بيىگىندە زور ىقپالعا، ەل اراسىندا ۇلكەن سەنىمگە يە مەملەكەت قايراتكەرى يمانعالي تاسماعامبەتوۆتىڭ تۋعان كۇنى. ساڭلاق ساياساتكەر 59 جاسقا تولىپ وتىر. وسى داتاعا وراي، قايراتكەردىڭ ساياسي پورترەتىن اشا ءتۇسۋ ماقساتىندا ەلدەگى ءبىرقاتار ساياساتكەرلەر مەن ساراپشىلارعا يمانعالي تاسماعامبەتوۆتىڭ تۇلعالىق قاسيەتتەرى مەن جوعارى بيلىك ساپىنداعى قىزمەتىنە قاتىستى بىرنەشە ساۋال جولداعان ەدىك. العاشقى بولىپ 90-جىلدارى يمانعالي نۇرعاليۇلىمەن مەملەكەتتىك جاستار ءىسى جونىندەگى كوميتەتتە ۇزەڭگىلەس قىزمەت اتقارعان ساياساتكەر ءامىرجان قوسانوۆتان جاۋاپ كەلدى.
يمانعالي تاسماعامبەتوۆ جوعارعى بيلىكتەگى ەليتا اراسىندا قانشالىقتى ىقپالدى تۇلعا؟
بىزدەگى جۇيەدە كەز كەلگەن شەنەۋنىكتىڭ شىنايى ىقپالىنىڭ ءۇش كورسەتكىشى، ءۇش ولشەمى بار. ەكەۋى – وتكىنشى، بىرەۋى – تۇراقتى.
ءبىرىنشىسى – اتقارىپ جۇرگەن رەسمي قىزمەتى، ياعني، كرەسلوسى. بۇل تۇرعىدان تاسماعامبەتوۆ مىرزا قازاقستاندا بار جوعارعى شەنەۋنىكتىك قىزمەتتىڭ بارلىعىن دەرلىك اتقارىپ شىقتى. ءقازىر دە مەملەكەتتىڭ ەڭ ماڭىزدى سالاسى – قورعانىس ىستەرىن باسقارىپ وتىر.
ەكىنىشىسى – پرەزيدەنتتىڭ ول شەنەۋنىككە جەكە كوزقاراسى، وعان دەگەن سەنىمى. ول جاعىنان دا تاسماعامبەتوۆ مىرزا كەندە ەمەس. وسىنشاما ۋاقىت بويىنا ەلباسىنىڭ ەڭ سەنىمدى سەرىكتەسى رەتىندە ءوزىن تانىتىپ كەلەدى، سەنىم وربيتاسىنان شىعىپ كورگەن جوق. مۇنىڭ ءوزى ەكىنىڭ ءبىرىنىڭ قولىنان كەلە بەرمەيتىن جەتىستىك. تاسماعامبەتوۆتىڭ دا دۇشپاندارى وسى جىلدار ىشىندە تىنىش وتىرماعان شىعار، ول تۋرالى پرەزيدەنتتىڭ قۇلاعىنا تالاي سىبىرلاعان دا بولار. ءبىراق ول بولسا، ءالى پرەزيدەنتتىڭ جانىندا. بۇل جايت كوپ نارسەنى اڭعارتسا كەرەك.
ءۇشىنشىسى – سول شەنەۋنىكتىڭ ەل ىشىندەگى شىنايى بەدەلى، تانىمالدىعى، جۇرت ءۇمىتىن اقتاي الاتىنداي مارتەبەسى، جاڭا زامان لەكسيكاسىنا ساي ايتاتىن بولساق، ءيميدجى، رەنومەسى. ول جاعىنان دا تاسماعامبەتوۆتىڭ تاسى ورگە دومالاپ وتىر.
وسى ءۇش ولشەمنىڭ العاشقى ەكەۋى – وتكىنشى، ۋاقىتشا، كوپ جاعدايدا سۋبەكتيۆتىك سيپاتتا. قاراپ وتىرساق، بۇگىن جوعارعى قىزمەتتە وتىرعان ادام، ەرتەڭ ايدالادا قالادى، نە ءىستى بولىپ جاتادى. ەلباسىنىڭ دا ءۇمىتىن اقتاي الماي، سەنىمىنەن شىعىپ جاتادى.
ءۇشىنشى ولشەم بولسا، تۇراقتى، ويتكەنى جىلدار بويى قالىپتاسقان ابىروي مەن بەدەلدى ءبىر كۇندە ءوشىرۋ قيىن، كەيدە ءتىپتى مۇمكىن ەمەس.
وسى ءۇش ولشەم ازىرشە تاسماعامبەتوۆتىڭ ەنشىسىندە.
ونىڭ حالىق اراسىنداعى بەدەلى، قوعامداعى حاريزماسى قاي دەڭگەيدە؟
بۇل سۇراققا جوعارىدا جاۋاپ بەرگەن سياقتىمىن. وعان ءبىر قوسارىم مىناۋ.
بىزدە باسقارۋ ەليتاسىندا بىرنەشە ۇرپاق، تولقىن بار. سونىڭ ىشىندە پرەزيدەنتپەن و باستان بىرگە كەلە جاتقان، تاۋەلسىزدىكتىڭ قىزىعىن دا، قيىندىعىن دا بىرگە كورىپ كەلە جاتقان «ەسكى گۆارديا». ولار ءارقاشان پرەزيدەنتتىڭ جانىندا. قاراپ وتىرساق، سول تەگەۋرىندى تولقىننىڭ ىشىندەگى ەڭ جاسى – يمەكەڭ. مۇنى ءوزى ونىڭ تاپتىرماس تاجىريبەسىن بولاشاقتاعى پەرسپەكتيۆالارمەن ۇشتاستىرا الۋىنا جول اشارى كۇمانسىز.
ي. تاسماعامبەتوۆتىڭ وزىنە عانا ءتان قانداي قاسيەتىن نەمەسە ەل تاعدىرى ءۇشىن جاساعان ەرەكشە قادامىن اتاپ وتە الاسىز؟
ءوز باسىم كەزىندە ول كىسى مەملەكەتتىك جاستار ءىسى جونىندەگى كوميتەتتىڭ ءتوراعاسى بولعاندا، ونىڭ ورىنباسارى بوپ قىزمەت اتقارعانمىن، سوندىقتان دا ونىڭ جەكە جانە ىسكەر قاسيەتتەرىن ءبىر ادامداي كورىپ، بىلگەنمىن.
مىقتى ۇيىمداستىرۋشى، وزىنە دە، وزگەگە دە تالاپ قويا بىلەتىن، ءبىر باستاعان ءىستىڭ ناتيجەسىنە جەتپەي، توقتامايتىن باسشى رەتىندە تانىدىم. ورتاق ءىس مۇددەسىندە كەيدە قىزبالىق تانىتىپ، شورت كەسەتىن كەزدەرى دە بولاتىن. ءقازىر، ۋاقىت وتە ول مىنەزى وزگەرگەن بولار.
ءبىزدىڭ باسقارۋشى يستەبليشمەنتتە ۇلتجاندىلىق دەفيسيت، تىم تاپشى. سوندىقتان دا كوپشىلىك يمەكەڭنىڭ وسى قاسيەتىن باسا ايتادى، سوعان ءتانتى. ول قاسيەت بولاشاقتا مەملەكەتىمىزدىڭ ءوزىن ۇلتتىق سيپاتتا قۇرىپ، ۇلتتىق ساياساتتى مەيلىنشە ادىلەتتى ءارى ءتيىمدى جۇرگىزۋ ءۇشىن اۋاداي قاجەت دەپ بىلەمىن.
ەكونوميكا مەن شارۋاشىلىقتى مەڭگەرە وتىرىپ، ونىڭ رۋحاني سالاعا، مادەنيەت پەن ونەرگە ءبىر تابان جاقىن بولۋى دا ونى باسقا ساياساتكەرلەردەن رەكەشە ەتىپ تۇرادى.
ءسوز سوڭىندا ايتارىم مىناۋ.
ءقازىر ەل ىشىندە نازاربايەۆتىڭ بولاشاق مۇراگەرى تۋرالى اڭگىمە ءجيى ايتىلا باستادى. ءبىراز ادامنىڭ اتتارى اتالۋدا. سول تىزىمدە ءوز ورنىن ويىپ العان تاسماعامبەتوۆتىڭ بولاشاعى دا وسى فاكتورعا بايلانىستى. بيلىك ءىشى مەن ماڭىنداعى كلانارالىق تارتىستىڭ ۋشىعا تۇسەرى حاق. سوندىقتان دا ونىڭ جاقتاستارىمەن بىرگە، دۇشپاندارى دا اياققا تۇرىپ، قاتارى كوبەيە تۇسەرى انىق.
