رۋدنىيدا پوليسەيلەر زەينەتاقى تاراتىپ جاتقان پوشتا قىزمەتكەرىنە شابۋىل جاساعان 2 كۇدىكتىنى ۇستادى. بۇل تۋرالى «قامشى» پورتالى قازاقپاراتقا سىلتەمە جاساپ حابارلايدى.

«9 جەلتوقساندا رۋدنىي قالاسىندا پوشتا قىزمەتكەرىنە شابۋىل جاسادى دەگەن كۇدىكپەن 27 جانە 25 جاستاعى ەكى ادام ۇستالدى، - دەلىنگەن حابارلامادا. - زەينەتاقى تولەۋگە ارنالعان 2 ميلليون تەڭگەدەن استام ۇرلانعان اقشا تاركىلەندى».

3 جەلتوقساندا قاريالاردىڭ ۇيىنە زەينەتاقى تاراتقان «قازپوشتا» قىزمەتكەرىنە پودەزد ىشىندە بەلگىسىز بىرەۋلەر شابۋىل جاسادى. ولار 2 ميلليون 360 مىڭ تەڭگە سالىنعان سومكەنى پوشتا قىزمەتكەرىنەن تارتىپ اكەتكەن.

«سول كۇنى ارنايى تەرگەۋ توبى قۇرىلىپ، ونى قوستاناي وبلىستىق ءىىد باستىعىنىڭ ءبىرىنشى ورىنباسارى پوليسيا پولكوۆنيگى اتىعاي ارىستانوۆ باسقاردى، - دەلىنگەن حابارلامادا. - پوليسەيلەر ءتيىستى شارالاردى ۇيىمداستىرىپ، كۇدىكتىلەردى قولعا ءتۇسىردى. ولاردان ۇرلانعان اقشا تاركىلەندى».

ۇستالعاندار كىناسىن مويىندادى. «قازپوشتا» بولىمشەلەرىنە قاۋىپسىزدىك شارالارىن ساقتاۋ جونىندەگى نۇسقاۋلار جولداندى.