قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ رەسەيدە «حالىقارالىق قاتىناس» اتالىمى بويىنشا «جىل ادامى-2015» سىيلىعىنىڭ لاۋرەاتى اتاندى. سالتاناتتى ماراپاتتاۋ ءراسىمى ماسكەۋدەگى قۇتقارۋشى حريست شىركەۋىندە ءوتتى، - دەپ حابارلايدى «قامشى» پورتالى قازاقپاراتقا سىلتەمە جاساپ.

ۇيىمداستىرۋشىلار - ورىس بيوگرافيالىق ينستيتۋتى مەن ەكونوميكالىق ستراتەگيالار ينستيتۋتىنىڭ حابارلاۋىنشا، نۇرسۇلتان نازاربايەۆ الەمدىك ساياساتتاعى ۇزدىك جەتىستىگى جانە ەۋرازيالىق ەكونوميكالىق وداقتى نىعايتۋداعى ۇلەسى ءۇشىن بۇل سىيلىققا لايىق دەپ تانىلدى.

ەسكە سالايىق، 2012 جانە 2014 جىلى دا قازاقستان كوشباسشىسى وسى اتاققا يە بولعان بولاتىن.

سونداي-اق وسى جىلعى لاۋرەاتتار اراسىندا رف پرەزيدەنتى ۆ. پۋتين، بر پرەزيدەنتى ا. لۋكاشەنكو، قحر ءتوراعاسى سي سزينپين، كۋبا پرەزيدەنتى ر. كاسترو، تاتارستاننىڭ تۇڭعىش پرەزيدەنتى م. شايمييەۆ، ماسكەۋ جانە بۇكىل رەسەي پاتريارحى كيريل، اكادەميك ل. بوكەريا، كينورەجيسسەر ن. ميحالكوۆ، ت.ب. بار.