كەشە قاراعاندىدا ءبىرقاتار مەملەكەتتىك قىزمەتشىلەردىڭ ۇستىنەن قوزعالعان قىلمىستىق ءىس بويىنشا سوت وتىرىسىندا ايىپتالۋشىلاردىڭ اقىرعى ءسوزى تىڭدالدى، - دەپ حابارلايلى «قامشى» پورتالى.

سوت وتىرىسىندا ءسوز العان ەلدىڭ بۇرىنعى پرەمەر-مينيسترى سەرىك احمەتوۆ ەلباسىدان كەشىرىم سۇرادى.

«مەن مەملەكەت باسشىسى، ۇلت كوشباسشىسى، ءوزىمنىڭ ۇستازىم ءارى تالىمگەرىم نۇرسۇلتان ءابىش ۇلى نازاربايەۆتان ونىڭ سەنىمىن اقتاي الماعانىم ءۇشىن جانە وسىنشاما ۋايىمعا سالعانىم ءۇشىن كەشىرىم سۇرايمىن» دەدى اقتىق ءسوزىن ايتقان س. احمەتوۆ.

سوتتا ول وزىنە تاعىلىپ وتىرعان ايىپتاردىڭ ەشقايسىسىمەن كەلىسپەيتىنىن ايتقان ەكس-پرەمەر:

«ەگەر سوت پەن ەلباسى ماعان قايتادان ساپقا ورالۋعا مۇمكىندىك بەرسە، مەن مەملەكەتىمىز بەن پرەزيدەنتىمىزدىڭ يگىلىگى ءۇشىن ەڭبەك ەتە بەرەمىن. قانداي جاعداي بولماسىن مەن ەلىم مەن ەلباسىعا ادالمىن» دەدى.

اتالعان ءىس بويىنشا سوت ۇكىمى ەرتەڭ وقىلادى.

ەستەرىڭىزگە سالساق، وسىنداي ايىپپەن قاماۋعا الىنعان پاۆلودار وبلىسىنىڭ بۇرىنعى اكىمى ەرلان ارىن دا بىلتىر قاراشا ايىندا ەلباسىدان كەشىرىم سۇراپ، ارتىنشا قاماۋدان بوساعان بولاتىن. سوت وعان شارتتى تۇردە 3 جىل باس بوستاندىعىنان جانە «قۇرمەت»، «پاراسات» وردەندەرىنەن ايىرۋ جازاسىن كەسكەن ەدى.