قازاقستان ۇلتتىق بانكى ەلباسىنىڭ 2015 جىلدىڭ 11 اقپانىندا بولعان ۇكىمەتتىڭ كەڭەيتىلگەن وتىرىسىندا بەرگەن تاپسىرماسىنا سايكەس «يپوتەكالىق ءتۇرعىن-ۇي قارىزدارىن قايتا قارجىلاندىرۋ» باعدارلاماسىن بەكىتكەن ەدى. الايدا، وسى باعدارلاما ورىندالماي، مەملەكەتتىك ورگانداردىڭ ەكىنشى دەڭگەيلى بانكتەرگە تىستەرى باتپاي وتىر. وسىنىڭ كەسىرىنەن بورىشكەرلەر ەلباسىنىڭ تاپسىرماسىنا سايكەس بەرىلۋگە ءتيىستى جەڭىلدىكتەرگە قول جەتكىزە الماۋدا. وسىعان جانى اشىعان پارلامەنت ماجىلىسىندەگى «حالىقتىق كوممۋنيستەر» فراكسياسى دەپۋتات ايقىن قوڭىروۆتىڭ باستاماسىمەن باس پروكۋرور ا.داۋىلبايەۆتىڭ اتىنا ساۋال جولداپ، ماسەلەنىڭ وڭ شەشىلۋى ءۇشىن پروكۋرورلىق باقىلاۋ جاساۋدى وتىنگەن. ۇستىمىزدەگى جىلدىڭ 27 قازانىندا بەرگەن جاۋاپ حاتىندا باس پروكۋراتۋرا باعدارلامانىڭ «قارقىندى تۇردە ىسكە اسىرىلۋى بويىنشا ءبىرقاتار ءىس-شارالار جۇرگىزىلىپ جاتقانداعى» تۋرالى ايتقان. الايدا، ءىس جۇزىندە ولاي بولماي، كوپتەگەن بورىشكەرلەر باعدارلاماعا قاتىسۋ مۇمكىن ەمەس ەكەندىگىنە شاعىمدانۋدا. بۇل - ەكىنشى دەڭگەيلى بانكتەرگە قاتىستى ناقتى ەشقانداي ءىس-شارالاردىڭ جۇرگىزىلمەي جاتقاندىعىنىڭ ايقىن ايعاعى.
ءسويتىپ، باس پروكۋراتۋرا، ۇلتتىق بانك، جەرگىلىكتى اتقارۋشى بيلىك ورگاندارى – ءبارى بىرىگىپ، وزدەرىنىڭ ارەكەتسىزدىكتەرىنىڭ سالدارىنان مەملەكەتتىك باعدارلامانىڭ ىسكە اسىرىلۋىنا تەجەۋ بولىپ وتىر. وسىعان وراي «حالىقتىق كوممۋنيستەر» مىناداي ناقتى شەشىمدەر ۇسىنادى:
- جەرگىلىكتى اتقارۋشى بيلىك ورگاندارىنىڭ جانىنان قۇرىلعان باعدارلامانىڭ ىسكە اسىرىلۋ بارىسىن باقىلايتىن قوعامدىق كوميسسيالاردىڭ ءتوراعاسى ەتىپ ارنايى ۋاكىلەتتى پروكۋرورلار تاعايىندالسىن؛
- باعدارلامانى ىسكە اسىرۋ بارىسىندا مەملەكەتتىك ورگاندار، ۇلتتىق بانك، ەكىنشى دەڭگەيلى بانكتەر، ساياسي پارتيالار مەن قوعام اراسىنداعى ءوزارا ارەكەتتەسۋ تەتىگى قامتاماسىز ەتىلسىن؛
سونىمەن بىرگە «حالىقتىق كوممۋنيستەر پارتياسى» اتقارۋشى، باقىلاۋشى جانە رەتتەۋشى مەملەكەتتىك ورگاندار تاراپىنان تولىق رەتتەۋ جانە قولداۋ بولعان جاعدايدا باعدارلامانىڭ مودەراتورىبولۋعا دايىن ەكەنىن ايتادى.
مىنە، وسى ۇسىنىستاردى ايتىپ، ءماجىلىستىڭ سوڭعى پلەنارلىق وتىرىسىندا دەپۋتات ايقىن قوڭىروۆ تاعى دا پرەمەر-مينيستر ك.ءماسىموۆ پەن باس پروكۋرور ا.داۋىلبايەۆتىڭ اتىنا دەپۋتاتتىق ساۋال جولدادى. وسىدان ءبىر ناتيجە شىعا قويۋىنا كۇمانىمىز بار، ويتكەنى ءبىزدىڭ مەملەكەتتىك ورگاندار جەكەمەنشىكتىڭ قولىنداعى «دوكەي كوكەلەردىڭ» ەكىنشى دەڭگەيدەگى بانكتەرىنە ازۋىن باتىرا المايدى-اۋ...
ءادىل بەكوۆ
