بۇگىن سەناتتىڭ جالپى وتىرىسىندا پالاتا سپيكەرى قاسىم-جومارت توقايەۆ جيىندى باستاماس بۇرىن ق ر پرەزيدەنتىنىڭ «قازاقستان جاڭا جاھاندىق ناقتى احۋالدا: ءوسىم، رەفورمالار، دامۋ» اتتى كەزەكتى قازاقستان حالقىنا جولداۋىنا بايلانىستى ءوز پىكىرىن ءبىلدىردى، - دەپ حابارلايدى «قامشى» پورتالى قازاقپاراتقا سىلتەمە جاساپ.
سەنات ءتوراعاسى ءسوز باسىندا ەلباسىنىڭ قازاقستان حالقىنا ارناعان جولداۋىن ەل ومىرىندەگى اسا ماڭىزدى وقيعا رەتىندە اتاپ ءوتتى.
ونىڭ پىكىرىنشە، پرەزيدەنت الەمدىك ەكونوميكا مەن گەوساياساتتا قالىپتاسقان كۇردەلى احۋالعا تالداۋ جاساپ، جاھاندىق سىن-قاتەرلەردى تابىستى ەڭسەرۋدىڭ تۋرا جولىن كورسەتىپ بەردى.
«الەم ەلدەرى جاھاندىق داعدارىسقا توتەپ بەرۋ ءۇشىن بارىنشا تالپىنىس جاساپ جاتقان كەزدە ەلباسى ۇسىنعان بۇل ستراتەگيا ەلىمىزدىڭ دامۋىنىڭ جاڭا دەڭگەيىنە باعىتتالعان ناقتى باعدارلاما بولىپ وتىر. ەكونوميكالىق ءوسىم، تابىستى رەفورمالار جانە تۇراقتى دامۋ ءبىزدىڭ كەشەندى جوسپارىمىزدىڭ باستى ماقساتتارى بولماق. وسىعان بايلانىستى پرەزيدەنت تاياۋ ۋاقىتتا جۇزەگە اسىرىلۋى ءتيىس بەس اۋقىمدى مىندەتتى ايقىنداپ بەردى»، - دەدى سپيكەر.
بۇدان بولەك، ق.توقايەۆ مەملەكەت باسشىسىنىڭ جولداۋىنداعى نەگىزگى باعىتتارعا دا توقتالىپ ءوتتى. ونىڭ پايىمىنشا، پرەزيدەنت ۇسىنىپ وتىرعان جاڭا الەۋمەتتىك ساياساتتىڭ تۇپكى ماقساتى - جوعارى ساپانى قامتاماسىز ەتۋ جانە ناقتى مۇقتاج ادامدارعا اتاۋلى الەۋمەتتىك قولداۋ كورسەتۋ.
«باسقاشا ايتقاندا، بۇدان بىلاي مەملەكەت الەۋمەتتىك سالادا ءالسىز قورعالعان ازاماتتاردى قولداۋعا جانە ادام كاپيتالىن دامىتۋعا بارىنشا دەن قويىلاتىن بولادى»، - دەدى سپيكەر.
وسىعان بايلانىستى سەنات ءتوراعاسى دەپۋتاتتىق كورپۋس الدىندا جاۋاپتى جۇمىستار تۇرعانىن ايتىپ، ماڭىزدى مىندەتتەردى ورىنداۋ ءۇشىن كۇش-جىگەر سالۋعا سەنىم ءبىلدىردى.
