كەشە الماتىداعى ءو. جولداسبەكوۆ اتىنداعى ستۋدەنتتەر سارايىندا حالىقارالىق «قازاق داۋىسى» ءان بايقاۋىنىڭ قورىتىندى كەزەڭى – گالا-كونسەرت ءوتتى.
رۋحتى كوتەرىپ، سانانى سەرگىتەتىن ءان كەشىنە اينالعان كونسەرتتە قازىلار القاسى جەڭىمپازداردىڭ ەسىمىن جاريالادى.
قازىلار القاسىنىڭ جان-جاقتى تالقىسى مەن جانكۇيەرلەردىڭ ينتەرنەت ارقىلى بەرىلگەن داۋىستارى سارالانا كەلە باس جۇلدەگە تاعايىندالعان 1 ميلليون تەڭگەلىك سىيلىق سايىستىڭ ءتورت كەزەڭىنەن دە سۇرىنبەي ءوتىپ، ۇزدىك ونەر كورسەتكەن ەكى قاتىسۋشىعا تەڭدەي ءبولىنىپ بەرىلدى.
سونىمەن، ءداستۇرلى اندەردى ورىنداۋشى ساكەن ءالىمحان مەن ەسترادالىق جاس ءانشى، بايقاۋعا قىتايدان ارنايى كەلىپ قاتىسقان ءجاننات ءادىلحان قىزى «قازاق داۋىسى» حالىقارالىق ءان بايقاۋىنىڭ باس جۇلدەسىنە لايىق دەپ تانىلدى.
جينالعان جۇرتشىلىققا سايىس قاتىسۋشىلارىنان باسقا، «الاش ۇلى» توبى، «قاس ساق» ۇلتتىق ەتنوگرافيالىق ءانسامبلى، نۇرلان البان، نۇربولات ابدۋللين، سايا ماحانبەت، ولجاس ابايەۆ، اسەت ەسجان سىندى انشىلەر، قىتايدان كەلگەن ءبيشى قىز سايا باقىت قىزى ءان مەن بيدەن شاشۋ شاشتى.
موڭعوليادان كەلىپ، بايقاۋدىڭ اقتىق سايىسىنا قاتىسقان ءانشى قادىقان مانايۇلىنا قازاقستاندىق كاسىپقوي بوكسشى قانات يسلام باستاعان ءبىر توپ ازامات ارنايى اقشالاي جۇلدە تاپسىردى.
ەستەرىڭىزگە سالساق، التى ايعا سوزىلعان ءان بايقاۋىندا بارلىعى 220 ۇمىتكەر ب ا ق سىناپ، قاتىسۋشىلاردىڭ ونەرىن رامازان ستامعازييەۆ، ەركىن شۇكىمان، التىناي جورابايەۆا،ءمولدىر اۋەلبەكوۆا، ۇشقىن جامالبەك سىندى ەلگە تانىمال انشىلەردەن قۇرالعان قازىلار القاسى باعالاعان بولاتىن.
