پرەزيدەنت جارلىعى بويىنشا 2011 جىلدىڭ قىركۇيەگىنەن باستاپ، «قازاقستان» ۇلتتىق تەلەارناسى تازا قازاق تىلىندە حابار تاراتاتىن بولىپ بەكىتىلگەن ەدى. الايدا، ارادا ءبىر جىل وتپەي جاتىپ، 100 پايىز قازاقشا سايراۋى ءتيىس ۇلتتىق ارنادا فۋتبولدان ەۋروپا چەمپيوناتى ەكى تىلدە كورسەتىلىپ، قوعام نارازىلىعىن تۋدىرعان بولاتىن.

سول تۇستا تەلەارنا باسشىلىعى  «كورسەتىلىم ۋەفا-مەن جاساسقان كەلىسىم-شارتتىڭ نەگىزىندە ەكى تىلدە جۇرگىزىلىپ جاتىر» دەپ اقتالعان ەدى. ەۋروپا چەمپيوناتى اياقتالعاننان كەيىن، ولقىلىقتىڭ ورنى تولىپ، سپورتتىق ترانسلياسيالار تازا قازاق تىلىندە تاراتىلا باستاعاندا، قازاق جانكۇيەرلەرى ءبىر قۋانىپ قالعان.

سپورتتىڭ ءتىلى قازاقشالانىپ، سۇيىكتى كوممەنتاتورلارىمىز پايدا بولعان كەزدە سول ءبىر شاق. ەسەي جەڭىس ۇلى مەن ەرمۇحامەد ماۋلەننىڭ جۇپتاسۋى،  راۋان وقاس پەن شالقار ەستەننىڭ دۋەتى قانداي كەرەمەت ەدى؟ بۇرىنىراق  كوممەنتاتورلار ەكى تىلدە جۇرگىزگەنكەزدە، ءبىر-بىرىنىڭ ءسوزىن اۋدارىپ، قايتالاپ وتىرۋشى ەدى. ال ءبىر تىلدە جۇرگىزىلگەن كەزدە كوممەنتاتور اراسىندا ەرەكشە ۇيلەسىم پايدا بولدى. تىڭداپ وتىرىپ، ءسۇيسىنۋشى ەدىك. ءبىراق قۋانىشىمىز كوپكە سوزىلماپتى.  تازا قازاق تىلىندە حابار تاراتۋى ءتيىس قازاقستان ۇلتتىق ارناسى قايتا ەكى تىلدە سايراي باستادى. مۇنى ءوز باسىم، كورەرمەن رەتىندە تۇسىنە المادىم. سوندا ۇلتتىق ارنا باسشىلىعى ەلباسىمىزدىڭ شەشىمىن پىسقىرماعانى ما؟ الدە، تاعى، «اپل-مەن جاساسقان كەلىسىم-شارتتىڭ نەگىزىندە دەپ اقتالا ما ەكەن»؟ نەگە باcقا-باسقا ەمەس، ۇلتتىق ارنا مۇندايعا جول بەرەدى؟ قازاق كوممەنتاتورلارى جەتكىلىكسىز ەمەس ءسىرا. مەن تىڭداپ، تانىپ قالعان قازاق كوممەنتاتورلارىن ايتاتىن بولسام، ءبىر شوعىر. ەسەي جەڭىس ۇلى، ەرمۇحامەد ماۋلەن، ەرمەك تورەنيازوۆ، اسحات ساعىنايەۆ، راۋان وقاس، ۋاليحان قوسانباي، ەرجان كوشكىنبايەۆ، ەركىن نۇرجان ۇلى، جاندوس سمايىل، عالىم سۇلەيمەن، شالقار ەستەن. وسى كىسىلەر نەگە بىرىگىپ جۇرگىزبەيدى؟ رەيتينگ دەيسىز بە؟ 30 پايىز ورىسشا سويلەگەننەن رەيتينگ ءوسىپ كەتپەس. ۇلتتىق ارنا 100 پايىز قازاقشا بولىپ بەكىتىلدى مە، تازا قازاق تىلىندە حابار تاراتسىن، ءبىز سەكىلدى كوزى قاراقتى كورەرمەندى الداماسىن!

جاقسىلىق داۋكەباي

سايت وقىرمانى،

وقو، ارىس قالاسى