شىمكەنت قالاسىندا قازاقستاندىق ماشيناجاساۋشى ينجەنەرلەر قۇراستىرعان تۇڭعىش ەلەكتروموتوسيكلدىڭ تۇساۋى كەسىلدى، - دەپ حابارلايدى «قامشى» پورتالى Tengrinews.kz-كە سىلتەمە جاساپ.

KARLSKRONA LC AB ينجەنەرلىك كومپانياسىنىڭ باس ديرەكتورى ءۋاليحان احمەتوۆتىڭ مالىمدەۋىنشە، بۇل كولىكتىڭ ورتاشا ساتىلىم باعاسى 10 مىڭ اقش دوللارى كولەمىندە بولماق. سونداي-اق، ول بۇل قازاقستاندىق العاشقى ەلەكترلى موتوكولىكتىڭ كونسەپت نۇسقاسى ەكەندىگىن، ونى تولىقتاي قۇراستىرۋ ءىسى كەلەسى جىلى قولعا الىناتىندىعىن ايتقان.

«بۇل كولىكتىڭ قۇنى شامامەن 10 مىڭ دوللار، ياعني 3-3،5 ميلليون تەڭگە كولەمىندە بولادى. كولىك 220 ۆولتتىق ادەتتەگى جەلىدەن قۋاتتانادى. ول ءۇشىن ەشقانداي دا ارنايى جابدىق پەن ورىننىڭ قاجەتى جوق»، - دەيدى ۋ. احمەتوۆ. ونىڭ يتۋىنشا ءبىر رەت تولىق قۋاتتاندىرىلعان باتارەيا 2،5 ساعاتقا نەمەسە 200 شاقىرىم جول جۇرۋگە جەتكىلىكتى كورىنەدى. ساعاتىنا 114 شاقىرىمعا دەيىن جىلدامدىقپەن جۇرە الادى.

موتوسيكل مودەلى تولىقتاي قازاقستاندىق ينجەنەرلەردىڭ قيالىنان تۋعان. وتاندىق ينجەنەرلەر ونى ازىرلەۋ ءۇشىن ءبىر جارىم جىل ەڭبەكتەنىپتى. موتوسيكل تەك ەلەكترلى قوزعالتقىشپەن جابدىقتالعان، بەنزين، باسقا دا جاعار ماي قۇيۋ مۇمكىندىكتەرى قاراستىرىلماعان.