بۇگىن «نۇر وتان» پارتياسى ءتوراعاسىنىڭ ءبىرىنشى ورىنباسارى اسقار مىرزاحمەتوۆتىڭ توراعىلىعىمەن پارتيا جانىنداعى ب ا ق وكىلدەرىمەن  قارىم-قاتىناس جونىندەگى كەڭەستىڭ العاشقى وتىرىسى ءوتتى. بۇل تۋرالى «قامشى» پورتالى inform.kz-كە سىلتەمە جاساپ حابارلايدى. اتالعان كەزدەسۋدە وتاندىق تەلەارنالار مەن  باسىلىمداردىڭ ءبىرىنشى باسشىلارى  باس قوسىپ، ءوز ويلارىن ورتاعا سالدى.

قازاق سەريالىنىڭ ءبىر ءبولىمى 25 مىڭ اقش دوللار، ال ءۇندى سەريالىنىڭ ءبىر سەرياسى 350 اقش دوللار تۇرادى. بۇل تۋرالى "استانا" تەلەارناسىنىڭ باس ديرەكتورى ءلاززات تانىسباي ءمالىم ەتتى. ونىڭ ايتۋىنشا وتاندىق تەلەسەريالدار ءۇندى سەريالدارىنان قاراعاندا جاقسى رەيتينگ جينايدى. الايدا ول تەلەارناعا جارناما تارتۋ ءۇشىن ءۇندى سەريالدارىن الۋعا ءماجبۇر بولىپ وتىرعاندىعىن جاسىرمادى.

– سوڭعى جىلدارى زورلىق-زومبىلىق پەن قىلمىستى تەك جەكەمەنشىك تەلەارنالار ناسيحاتتايدى دەگەن ءۇردىس قالىپتاستى. مەملەكەتتىك تەلەارنالاردىڭ ايتەۋىر باعىت-باعدارى، بولىنەتىن قارجىسى بار. ال، جەكەمەنشىك تەلەارنالار جارنامانىڭ ەسەبىنەن كۇن كورۋگە ءماجبۇر. ءبىزدى "ءۇندى سەريالدارىن نەگە كورسەتەسىڭدەر؟" دەپ سىنايتىندار كوپ. كەشىرىڭىزدەر، تەلەارنالاردىڭ توپ مەنەدجەرلەرى وسى ءۇندى سەريالدارىن قاتتى جاقسى كورەدى دەيسىزدەر مە؟ جوق، ءۇندى سەريالدارى بىزگە جوعارى رەيتينگ بەرەدى. رەيتينگ جارناماعا جول اشادى، ال، سول جارنامادان تۇسكەن قاراجاتتان مەن قولاستىمداعى قىزمەتكەرلەرگە جالاقى تولەيمىن. تەلەارنالاردىڭ توپ مەنەدجەرلەرى وسى رەيتينگتىڭ ق ۇلى بولىپ وتىرمىز، ونى مويىندايمىن، – دەيدى ل.تانىسباي.

سونداي-اق، ول قازاق تەلەسەريالدارى كوپتەپ تۇسىرىلسە، ول مىندەتتى تۇردە رەيتينگ جينايدى دەگەن پىكىردە. ويتكەنى، وتاندىق ونىمگە دەگەن قاراشا حالىق ىقىلاسى جوعارى. الايدا وزىمىزدە تۇسىرىلگەن تەلەسەريالدىڭ قۇنى تىم قىمباتقا تۇسەدى. ماسەلەن، وتاندىق ءبىر سەريال تۇسىرۋگە 20-25  مىڭ اقش دوللارى جۇمسالاتىن كورىنەدى. ال، ءۇندى سەريالىنىڭ ءبىر سەرياسى 350 اقش دوللارى تۇرادى.  ايىرماشىلىق جەر مەن كوكتەي.

الايدا، ارزاننىڭ جىلىگى تاتىمايتىنىن قاپەردەن شىعارماعان ءجون. وكىنىشكە وراي، ءۇندىنىڭ ارزان سەريالدارى حالىقتى ازعىندىققا تاربيەلەپ جاتىر. ناقتىراق ايتساق، باسىنان اياعىنا دەيىن كەك الۋعا قۇرىلعان سەريال جاستاردى تاسباۋىر ەتىپ جاتىر. الايدا ونى ويلاپ، باس قاتىرىپ جاتقان ازاماتتار از. مىنە، سول از ازاماتتاردىڭ ءبىرى ءھام بىرەگەيى بۇعان دەيىن مادەنيەت جانە اقپارات ءمينيسترى بولعان مۇحتار قۇل-مۇحاممەد ەدى. ول ءوزى مينيستر بولىپ تۇرعاندا «تۇرىك پەن كارىس سەريالدارىنان باس تارتامىز» دەپ مالىمدەمە جاسادى. ايتسە دە، ەكس-مينيستردىڭ باستاماسى ءوزى باسشىلىقتان كەتكەننەن كەيىن قۇردىمعا كەتىپ، ۇمىت قالدى.

جالپى ءبىزدىڭ ەلدە وزىنە دەيىنگى باسشىنىڭ ءىسىن جالعاستىرۋ ابىرويسىز ءىس بولىپ سانالادى. سونىڭ سالدارىنان قانشا جەردەن حالىققا پايدالى ءىس بولسا دا، اياقسىز قالىپ كەلدى. ەگەر دە باسشىلارىمىز وسى مىنەزدەن ارىلىپ، وزىنە دەيىنگى مينيسترلەردىڭ ءىسىن جالعاستىراتىن بولسا، نۇر ۇستىنە نۇر بولار ەدى. الايدا، مۇحتار قۇل-مۇحامەد ءسوزى سياقتى تالاي باستامالار مينيستر قىزمەتتەن كەتكەننەن كەيىن ۇمىت قالدى.

سەرىك جولداسباي

استانا