ق ر قىلمىستىق كودەكسىنىڭ جاڭا زاڭ جوباسى العاشقى وقىلىمدا قابىلداندى. سول قۇجاتتا جۋرناليستەردى "جالا جابۋ" دەگەن باپ بويىنشا 3 جىلعا دەيىن باس بوستاندىعىنان ايىرۋعا قۇقىق بەرىلگەن. ياعني، ەگەر جازعان ماقالا، جۋرناليستىك زەرتتەۋىڭىزگە قاتىسى بار ءبىر كىسى ءسىزدى "جالا جاپتى" دەپ ويلاسا، سوتقا بەرەدى. ەگەر سوت قاجەت دەپ تاپسا، 3 جىلعا سوتتالاسىز. "ەشبىر جۋرناليست سىرت قالماسىن، قول جينايىق، داۋىسىمىز شىقپاي جاتىر. بۇل ب ا ق وكىلدەرىنە تونگەن ءقاۋىپ" دەپ قاققان دابىلىمدى ءبىراز سايت كوشىرىپ باستى. سويتسەم، "قوناق" دەگەن اتپەن اتتانداعان ءبىر سورلى "مەملەكەتتە وتىرعاندار اقىماق پا؟ نەگە تىنىش جۇرمەيسىڭ؟! سەن سياقتى اقىلى كەلتەلەر نەگە ازايمايدى؟!" دەپ پىكىرسىماق قالدىرىپتى. كىم ەكەنىن بىلمەيمىن، ەگەر قاجەت دەپ تاپسام، ونى وڭاي تابۋعا بولادى عوي. ايتايىن دەگەنىم، سول سورلى ەگەر جۋرناليست بولسا، تۇرمەگە وتىرادى. ال قاراپايىم جان بولسا، ءوزى، تۋعانى، اكە-شەشەسىنىڭ باسىنا كۇن تۋسا، مىندەتتى تۇردە جۋرناليسكە كەلىپ مۇڭ شاعادى، اراشا ءتۇس دەيدى. ال باسىنا ءىس تۇسكەن ادامعا 3 جىلعا دەيىن سوتتالۋى مۇمكىن جۋرناليست قالاي كومەكتەسەدى؟ نە دەگەن توپاستىق؟! كسرو كەزىندە ستالين: "ەگەر جۋرناليست جازعان ماقالانىڭ، ايتقان ءسوزدىڭ 5 پايىزى شىندىق بولسا، قۋدالاۋ بولماسىن جۋرناليستەردى" دەيتىن. ال ءقازىر 100 پايىز شىندىق بولسا دا، جۋرناليستەر دارمەنسىز. جەكە باسىنىڭ، وتباسى مەن تۋعاندارىنڭ قاۋىپسىزدىگى تاعى بار. بۇل قوعام ادىلدىككە ەمەس، ادىلەتسىزدىككە، تىزەگە سالاتىندار مەن جەمقورلارعا، قولىنداعى بيلىگىن اسىرا پايدالاناتىندارعا عانا ارنالعان سياقتى كورىنەدى كەيدە. قانىشەر ءستاليندى، قازاقتى قىرعان ءستاليندى ءيتتىڭ ەتىنەن جەك كورەم. ءبىراق ماماندىعىما كەلگەن تۇستا: "ستاليننەن اينالايىن!" دەمەسكە شاراڭ جوق...