ەۋروپا قازاقتارىنىڭ ءداستۇرلى قۇرىلتايى بيىلعى جىلدىڭ 6-8 ماۋسىمىندا گەرمانيانىڭ استاناسى بەرليندە وتەدى. ەۋروپا قازاق قوعامدارى فەدەراسياسىنىڭ (FEKA) قولداۋىمەن بەرلين قازاق قوعامى تاراپىنان ۇيىمداستىرىلاتىن كولەمدى شاراعا ەۋروپانىڭ ءتۇرلى ەلدەرىنەن 1500-گە جۋىق قانداسىمىز باس قاتىسادى دەپ كۇتىلۋدە،-دەپ حابارلايدى BAQ.KZ ءتىلشىسى.
FEKA-نىڭ باسپا ءسوز قىزمەتىنەن ۇعىسۋىمىزشا قازىرگى كەزدە ەۋروپا قازاقتارىنىڭ بەرليندە وتەتىن قۇرىلتايىنىڭ دايىندىق جۇمىستارى قىزۋ ءجۇرىپ جاتىپتى. بەرلين قازاق قوعامى قۇرىلتاي باعدارلاماسىن دا دايىنداپ قويعان. «ەۋروپا ەلدەرىندە 25-رەت وتكەلى وتىرعان بيىلعى قازاق قۇرىلتايىنىڭ بۇرىنعىلارمەن سالىستىرعاندا ايتارلىقتاي ەرەكشەلىكتەرى بار. ءبىز باعدارلاما جاساۋدا «قۇرىلتاي تويلاناتىن ەمەس، ويلاناتىن جەر» دەگەنگە كوبىرەك كوڭىل بولدىك. ايتالىق، قۇرىلتاي اياسىندا وتەتىن حالىقارالىق دوڭگەلەك ۇستەلدە ەڭ الدىمەن ەۋروپاداعى قازاق دياسپوراسىنىڭ انا تىلگە، ۇلتتىق مادەنيەت پەن ءسالت-داستۇردىڭ ساقتالۋىنا قاتىستى ءدوپ كەلىپ وتىرعان قيىندىقتار تالقىلانىپ، ولاردى رەتكە كەلتىرۋدىڭ جولدارىن قاراستىرۋ ماقسات ەتىلسە، ەكىنشى جاعىنان ەر جانىبەك باتىردىڭ 300 جىلدىعىن اتاپ ءوتۋ كوزدەلىپ وتىر. بۇعان قوسا قۇرىلتاي باعدارلاماسىنىڭ باسىمدىعىن جاستار جاعىنا دا اۋدارا وتىرىپ، «قازاقشا بىلەسىڭ بە؟» اتتى ءبىلىم سايىسىن وتكىزبەكپىز. ونداعى ماقسات – ەۋروپاداعى قازاق جاستارى اراسىندا انا ءتىلدى ناسيحاتتاپ، وعان دەگەن قىزىعۋشىلىقتى ارتتىرۋ بولىپ وتىر»،-دەيدى ەۋروپا قازاق قوعامدارى فەدەراسياسىنىڭ (FEKA) ءتوراعاسى ابدۇلقايۋم كەسيجي. ال، قۇرىلتاي اياسىندا وتەتىن سپورتتىق شارالاردىڭ باسىندا ەۋروپا قازاق جاستارىنان قۇرام تاپقان 10 كوماندانىڭ قاتىسۋىمەن وتەتىن فۋتبول ءتۋرنيرى تۇر. سوعان قوسا، قازاق كۇرەسى، اسىق ويىنى مەن توعىز قۇمالاق تا قۇرىلتايدىڭ ماڭىزىن ارتتىرا تۇسپەك. قازاقستان كۇرەس فەدەراسياسىمەن بىرگە ۇيىمداستىرىلاتىن قازاقشا كۇرەس سايىسىندا كاسىبي پالۋاندارمەن قوسا اۋەسقوي سپورتشىلار دا بەلدەسەتىن بولادى. قۇرىلتايدىڭ ۇلتتىق سپورت ويىندارىمەن دە ەرەكشەلەنۋىنىڭ سەبەبىنەن توقتالعان FEKA ءتوراعاسى ابدۇلقايۋم كەسيجي بىلاي دەدى: «قازاقتىڭ ۇلتتىق سپورت ويىندارىن قۇرىلتاي باعدارلاماسىنا ەنگىزۋدىڭ وزىندىك ءمانى مەن ماقساتى بار. بۇلار ارقىلى جاستاردى قازاقتىڭ ۇلتتىق مادەنيەتى مەن سالت-داستۇرىنە دەگەن قىزىعۋشىلىعىن ارتتىرۋ جانە ولاردىڭ اتاجۇرت-قازاقستانمەن بولعان بايلانىسىن نىعايتۋ كوزدەلىپ وتىر». ەۋروپا قازاقتارى باس قوساتىن بەرليندەگى قۇرىلتايعا دۇنيەجۇزى قازاقتارى قاۋىمداستىعىنىڭ وكىلدەرى، قازاق ەلىنىڭ قوعام قايراتكەرلەرى، ونەر جۇلدىزدارى جانە ب ا ق وكىلدەرىنەن قۇرام تاپقان ۇلكەن دەلەگاسيا قاتىسادى دەپ كۇتىلۋدە. بۇدان باسقا قۇرىلتايعا ەۋروپادان تىسقارى جەرلەردە تۇراتىن قازاق دياسپوراسىنىڭ وكىلدەرى دە قاتىسپاق. ايتا كەتەيىك، ەۋروپانىڭ ءار ەلىندە بىتىراي قونىستانعان قازاق جاستارىنىڭ باسىن قوسىپ، ولاردىڭ تانىسۋىنا، قارىم-قاتىناستارىنىڭ نىعايۋىنا جول اشۋ ماقساتىمەن 1980 جىلى قۇرىلعان ەۋروپا قازاق فۋتبول كوماندالارى ءوز ارالارىندا كوپتەگەن سايىستاردى وتكىزە باستاعان بولاتىن. وسىلايشا جىل سايىن ۇيىمداستىرىلىپ كەلگەن اياق دوپ دوداسى ەۋروپا قازاقتارىنىڭ كىشى قۇرىلتايى بولىپ مازمۇنىن دا ماڭىزىن دا كەڭەيتكەن ەدى.
مايگۇل سۇلتان
