ەرتەڭ الماتىدا دۇنيەجۇزى قازاقتارى قاۋىمداستىعى ۇيىندە «كوشى-قوننىڭ بۇگىنگى جاعدايى» اتتى دوڭگەلەك ۇستەل ءوتىپ، وندا قازاقستان رەسپۋبليكاسى پرەزيدەنتىنىڭ 24 قاراشادا قول قويعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» №421-V قازاقستان رەسپۋبليكاسىنىڭ زاڭى تالقىلانادى، - دەلىنگەن قاۋىمداستىق تاراتقان حابارلامادا.
حابارلامادا «دۇنيەجۇزى قازاقتارىنىڭ قاۋىمداستىعى بۇل زاڭنىڭ جوباسىن دايىنداۋعا جانە ونى تالقىلاۋعا بەلسەندى تۇردە اتسالىسىپ، ق ر پرەزيدەنتى اكىمشىلىگى مەن وزگە قۇزىرلى ورگاندارعا بىرنەشە مارتە ءوز ۇسىنىستارىن جولداعان بولاتىن. ۇسىنىستا شەتەلدەگى ەتنيكالىق قازاقتاردىڭ پروبلەمالارى، ەتنيكالىق كوشى-قون، قازاقستان قوعامىنا ورالمانداردىڭ بەيىمدەلۋى، ولاردىڭ ىقپالدىلىق ماسەلەلەرى، قازاقستان رەسپۋبليكاسىنىڭ ازاماتتىعىن تەز الۋ جولدارى سياقتىلار كورسەتىلدى» دەلىنگەن.
ايتا كەتەيىك، رەسمي ستاتيستيكا بويىنشا 1991 جىلدان 2015 جىلدىڭ 1 قاڭتارىنا دەيىن ەلىمىزگە شەت ەلدەردەن 259 159 وتباسى، ياعني، 952 882 ەتنيكالىق قازاق كوشىپ كەلگەن. جاڭا زاڭنان كەيىن ەتنيكالىق كوشى-قوننىڭ جاندانۋى، كوش بارىسى قالاي بولاتىنى دوڭگەلەك ۇستەلدە كەڭىنەن تالقىلانادى.
باسقوسۋعا ق ر ىشكى ىستەر مينيسترلىگى، ق ر سىرتقى ىستەر مينيسترلىگى، ق ر دەنساۋلىق ساقتاۋ جانە الەۋمەتتىك دامۋ مينيسترلىگى سياقتى قۇزىرلى ورگانداردىڭ وكىلدەرى، قوعامدىق ۇيىمداردىڭ باسشىلارى، ورالماندار جانە وزگە دە بەلسەندى ازاماتتار قاتىسادى دەپ كۇتىلۋدە.
