جاريا ەتۋ اكسياسى اياسىندا بۇگىنگى كۇنى 447 ملرد. تەڭگە زاڭداستىرىلعان. بۇل تۋرالى ق ر قارجى مينيسترلىگىنىڭ باسپا ءسوز قىزمەتى حابارلادى.
ق ر قارجى مينيسترلىگى تاراتقان اقپاراتقا سايكەس، بۇگىنگى كۇنى بارلىعى 447 ملرد تەڭگە زاڭداستىرىلدى، ونىڭ ىشىندە قازاقستان اۋماعىنداعى مۇلىك بويىنشا 362،1 ملرد تەڭگە، ەل اۋماعىنان تىس جەردەگى مۇلىك بويىنشا 1 ملرد تەڭگە، ال جاريا ەتىلگەن اقشا سوماسى 83،9 ملرد تەڭگەنى قۇراپ وتىر. بۇل اكسيانىڭ قارقىنىن جاقسارتۋ ءۇشىن زاڭناماعا تۇزەتۋلەر ەنگىزىلدى. وسى وزگەرىستەر جاريا ەتۋ پروسەسىن ايتارلىقتاي جەڭىلدەتىپ، زاڭداستىرۋ سۋبەكتىلەرىنە قوسىمشا كەپىلدىكتەر ۇسىنۋعا مۇمكىندىك بەرەدى.
اقشانى زاڭداستىرۋ ءراسىمى تۇبەگەيلى جەڭىلدەتىلىپ وتىر. ەندىگى ۋاقىتتا اقشانى ەكى جولمەن جاريا ەتۋگە بولادى. ءبىرىنشىسى، اقشانى بانكتەگى ەسەپشوت ارقىلى كورسەتىپ، ونى 10 پايىزدىق الىم تولەمەي پايدالانۋ مۇمكىندىگى بەرىلەدى. ەكىنشىسى، شەتەلدەگى نەمەسە قولما- قول اينالىمداعى اقشانى بانكتەگى ەسەپشوت ارقىلى كورسەتپەي جاريا ەتۋگە بولادى. ءبىراق بۇل رەتتە بيۋدجەتكە 10 پايىزدىق الىم تولەنەدى.
مۇلىكتى جاريا ەتۋ راسىمدەرى دە ايتارلىقتاي جەڭىلدەتىلگەن. ەندى قازاقستان اۋماعىندا ورنالاسقان جانە تيىسىنشە رەسىمدەلگەن مۇلىكتى زاڭداستىرۋ ءۇشىن مەملەكەتتىك كىرىستەر ورگاندارىنا ءتيىستى دەكلاراسيا مەن ىلەسپە قۇجاتتاردى تاپسىرۋ جەتكىلىكتى. شەتەلدە ورنالاسقان مۇلىكتى جاريا ەتۋ ءتارتىبى دە وسىنداي. ياعني، ارتىق بۋىن - مەملەكەتتىك كىرىستەر ورگاندارى جانىنداعى كوميسسيالار تاراتىلدى.
ايتا كەتەيىك، جاريا ەتۋ اكسياسىنىڭ اياقتالۋى مەن جالپىعا بىردەي دەكلاراسيالاۋ پروسەسىنىڭ باستالۋىن ۇيلەستىرۋ ءۇشىن امنيستيا مەرزىمى 2016 جىلدىڭ 31 جەلتوقسانىنا دەيىن ۇزارتىلىپ وتىر.
