2016 جىلعى 1 قاڭتاردان باستاپ ادەتتەگى زەينەتاقى تولەمى 9%-عا، مۇگەدەكتىك، اسىراۋشىسىنان ايىرىلۋ جاعدايى بويىنشا جانە جاسىنا بايلانىستى مەملەكەتتىك الەۋمەتتىك جاردەماقىلار مولشەرى 7%-عا ۇلعايتىلاتىن بولادى، دەپ حابارلايدى «قامشى» پورتالى baq.kz-كە سىلتەمە جاساپ.
قازاقستان رەسپۋبليكاسىنىڭ زەينەتاقى جۇيەسىن ودان ءارى جاڭعىرتۋدىڭ 2030 جىلعا دەيىنگى تۇجىرىمداماسىندا ىنتىماقتى زەينەتاقى تولەمى مولشەرىنىڭ جىل سايىن ينفلياسيا دەڭگەيىنەن ەكى پايىزعا ىلگەرىلەپ، يندەكستەلۋى قاراستىرىلادى. اعىمداعى جىلعى 29 تامىزداعى رەسپۋبليكالىق بيۋدجەتتىك كوميسسيانىڭ وتىرىسىندا ماقۇلدانعان الەۋمەتتىك-ەكونوميكالىق دامۋ بولجامىنا سايكەس، تۇتىنۋ باعاسىنىڭ يندەكسى 6-8%-دى قۇرادى. سول سەبەپتى كەلەسى جىلدىڭ قاڭتار ايىنان باستاپ ىنتىماقتى زەينەتاقى تولەمىنىڭ مولشەرى 9%-عا ارتاتىن بولادى (7% - ينفلياسيانىڭ ورتاشا دەڭگەيى جانە 2% - ىلگەرىلەۋ).
سونىمەن قاتار، بازالىق زەينەتاقى تولەمى «2016-2018 جىلدارعا ارنالعان رەسپۋبليكالىق بيۋدجەت تۋرالى» ق ر زاڭىمەن 11 965 تەڭگە كولەمىندە بەلگىلەندى، ەڭ تومەنگى زەينەتاقى مولشەرى – 25 824 تەڭگە بولدى. وسىلايشا، 2016 جىلى زەينەتاقى تولەمىنىڭ تومەنگى مولشەرى (ەڭ تومەنگى زەينەتاقى مەن بازالىق زەينەتاقىنى قوسقاندا) 37 789 تەڭگە بولادى. مەملەكەتتىك الەۋمەتتىك جاردەماقى مولشەرى مۇگەدەكتىك بويىنشا ونىڭ سەبەبى مەن توبىنا بايلانىستى ەڭ تومەنگى كۇنكورىس دەڭگەيىنە (ءتيىستى قارجى جىلىنا ارنالعان «رەسپۋبليكالىق بيۋدجەت تۋرالى» ق ر زاڭىمەن بەلگىلەنەدى)؛ اسىراۋشىسىنان ايىرىلۋ جاعدايى بويىنشا – قاراۋىنداعى جانداردىڭ سانى مەن ەڭ تومەنگى كۇنكورىس دەڭگەيىنە؛ جاسىنا قاراي – تەك ەڭ تومەنگى كۇنكورىس دەڭگەيىنە تاۋەلدى بولادى. 2016 جىلدىڭ 1 قاڭتارىنان باستاپ مۇگەدەكتىك، اسىراۋشىسىنان ايىرىلۋ جاعدايى بويىنشا جانە جاسىنا بايلانىستى مەملەكەتتىك الەۋمەتتىك جاردەماقىلار مولشەرى ەڭ تومەنگى كۇنكورىس دەڭگەيىنىڭ وزگەرۋىنە بايلانىستى 7%-عا ۇلعاياتىن بولادى.
سونداي-اق، قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ 2014 جىلعى 17 قاڭتارداعى «قازاقستان جولى – 2050: ءبىر ماقسات، ءبىر مۇددە، ءبىر بولاشاق» اتتى قازاقستان حالقىنا جولداۋىنداعى تاپسىرمالاردى ورىنداۋ ماقساتىندا مۇگەدەكتىك پەن اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلار مولشەرى 2016 جىلدىڭ 1 قاڭتارىنان باستاپ تاعى 25%-عا وسەدى. ەڭبەككە جارامسىزدىق پەن اسىراۋشىسىنان ايىرىلۋ جاعدايى بويىنشا مەملەكەتتiك الەۋمەتتiك ساقتاندىرۋ قورىنان تولەنەتiن الەۋمەتتiك تولەمدەردiڭ كولەمى 7%-عا ارتاتىن بولادى. №1 جانە №2 ءتىزىم بويىنشا ارنايى مەملەكەتتىك جاردەماقى مولشەرى ايلىق ەسەپتىك كورسەتكىشتىڭ ارتۋىنا بايلانىستى ۇلعاياتىن بولادى. 2016 جىلعى اەك 2121 تەڭگەنى قۇراپ وتىر (2015 جىلى – 1982 تەڭگە). ەستەرىڭىزگە سالا كەتەيىك، قازاقستاندا اعىمداعى جىلعى 1 جەلتوقسانداعى مالىمەتتەرگە سايكەس 1،9 ملن-عا جۋىق زەينەتكەرلەر بار، سونداي-اق، شامامەن 664،6 مىڭ ازامات جاردەماقى الىپ كەلەدى.
