بۇگىن قاراعاندى قالاسىنىڭ قازىبەك بي اۋداندىق سوتىندا ايىپتالۋشى داۋلەت سارسەنبايەۆقا قاتىستى قوزعالعان ءىستى تىڭداۋ بارىسىندا سوتتالۋشىنىڭ كىناسى دالەلدەندى. ول الەۋمەتتىك جەلىلەردە قارجى پوليسەيلەرىنىڭ اتىنان جالعان حات جاريالاپ، وندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى مەن جوعارى شەندى شەنەۋنىكتەردى قۇقىققا قايشى ىس-ارەكەتتەرگە باردى دەپ ايىپتاعان. بۇرىنعى جوعارى شەندى شەنەۋنىك كومەكشىلەرىنىڭ «لاس» ويىنىن ۇلتتىق قاۋىپسىزدىك كوميتەتىنىڭ قىزمەتكەرلەرى اشكەرەلەدى، دەپ حابارلايدى BNews.kz ءتىلشىسى.

وسىدان بىرنەشە اي بۇرىن ينتەرنەت-قاۋىمداستىقتا ۇلكەن قىزىعۋشىلىق تۋدىرعان «قارجى پوليسەيلەرىنىڭ اشىق ۇندەۋى» اتتى حات تەك جالعان عانا ەمەس، سەرىك احمەتوۆتىڭ ءىسى بويىنشا سوتتالعان قاراعاندى وبلىسىنىڭ بۇرىنعى اكىمى باۋىرجان ابدىشيەۆتىڭ باۋىرى داۋلەت سارسەنبايەۆتىڭ ۇيىمداستىرعان «لاس» ويىنى بولىپ شىقتى.

ۇلتتىق قاۋىپسىزدىك كوميتەتى اتقارعان جۇمىستىڭ ارقاسىندا سوتتالۋشىنىڭ جالا جاپپاق بولعانى ءارى قاساقانا جاساعان ىس-ارەكەتتەرى اشكەرەلەندى. بىرىنشىدەن، قىزمەتكەرلەر د.سارسەنبايەۆقا قارسى ايعاقتاردى انىقتاۋ بويىنشا جۇمىس جۇرگىزدى. ءتىنتۋ بارىسىندا سوتتالۋشى جالعان حات ازىرلەپ، جولداعان كومپيۋتەر تابىلدى. ەكىنشىدەن، تابىلعان ايعاقتاردىڭ تەحنيكالىق ساراپتاماسى جۇرگىزىلدى. ۇشىنشىدەن، اتالعان ءىس بويىنشا 50-دەن استام كۋاگەردەن جاۋاپ الىندى. سوت بارىسىندا ايىپتالۋشى دا كىناسىن تولىعىمەن مويىندادى.

ونىڭ ايتۋىنشا، ول وسىلايشا، سەرىك احمەتوۆتىڭ ءىسى بويىنشا تەرگەلىپ جاتقان باۋىرىن تەرگەۋ كەزىندە تاعىلعان ايىپتان قورعاعىسى كەلگەن.

«جۋىردا قاراعاندىدا سەرىك احمەتوۆتىڭ اتىشۋلى ءىسى اياقتالدى. مەنىڭ باۋىرىم ابدىشيەۆ تە تەرگەلدى. باۋىرىما كومەكتەسكىم كەلدى. بۇل حاتىم سوتقا اسەر ەتەدى دەپ ويلادىم. ءوز قاتەلىگىمدى مويىندايمىن. كەشىرىم سۇرايمىن»، - دەدى سوڭعى سوزىندە د.سارسەنبايەۆ.

سوتتالۋشى كەشىرىم سۇرادى. سوت وتىرىسىنىڭ قورىتىندىسى بويىنشا داۋلەت سارسەنبايەۆ شارتتى تۇردە 2 جىلعا باس بوستاندىعىنان ايرىلدى.