تاۋەلسىزدىك مەرەكەسى قارساڭىندا ،14 قاراشا كۇنى №2 قارعالى گيمنازياسىندا وتكىزىلگەن «كوك تۋدىڭ جەلبىرەگەنى» ءانىنىڭ اۆتورى الماس احمەتبەك ۇلى مەن وقۋشىلاردىڭ كەزدەسۋى جاس ۇرپاق جۇرەگىندە پاتريوتتىق سەزىمنىڭ وشپەس ءىزىن قالدىرارلىقتاي وتە اسەرلى جانە سالتاناتتى بولدى.
كەزدەسۋگە بۇگىنگى كۇنى حالىقتىق اۋەنگە اينالىپ بارا جاتقان ءاننىڭ ءسوزىن جازعان اقىن، قازاقستان رەسپۋبليكاسىنىڭ مادەنيەت قايراتكەرى الماس احمەتبەكۇل، كۇيشى، سازگەر ءارى ءانشى قازاقستان رەسپۋبليكاسىنىڭ مادەنيەت قايراتكەرى ەركىن ەرگەن ۇلى، قازاقستان جازۋشىلار وداعىنىڭ مۇشەسى، اقىن سەرىك ءنۇسىپ ۇلى قاتىستى. تاۋەلسىزدىك مەرەكەسىنە ارناپ ەرەكشە بەزەندىرىلگەن اكت زالىنىڭ ءىشىن لىق تولتىرعان وقۋشىلاردىڭ قولدارىنداعى كوك جالاۋشا ءان ىرعاعىنا ىلەسىپ، بىردەي تولقىپ، كەش مازمۇنىنىڭ اشىلۋىنا ايىرىقشا ۇندەستىك بەردى.
كەشتىڭ نەگىزگى ءبولىمى اقىن ا.احمەتبەكۇلىمەن تەلەسۇحبات تۇرىندە ۇيىمداستىرىلدى. ونى ادەبيەتشى-ۇستاز ق.التىبايەۆ جۇرگىزدى.سۇحباتتىڭ ءار سۇراعىنا تەرەڭ مازمۇندى جاۋاپتارىن وتە قىزىقتى ەتىپ، تاپقىرلىقپەن ايتا بىلگەن اقىننىڭ شەشەندىك ونەرىنە تىڭداۋشىلار ءتانتى بولىپ ۇيىپ تىڭدادى.
ودان كەيىن مەكتەپتىڭ مانەرلەپ وقۋعا جاتتىققان وقۋشىلارى كەزەكتەسىپ اقىن اعالارىنىڭ ولەڭدەرىن جاتقا وقىدى.كەزدەسۋ رۋحىمەن شابىتتانعان الماس اقىننىڭ قازىرگى قازاق پوەزياسىنىڭ بيىك دەڭگەيىن تانىتاتىن، كوركەمدىگىنە مازمۇنى ساي تاماشا پاتريوتتىق ولەڭدەرىن تىڭداۋ كورەرمەندەردى ادەبيەت الەمىنىڭ سۇلۋ سارايىنا سيقىرلاپ ەنگىزدى.
كەزدەسۋگە تاقىرىپ بولعان «كوك تۋدىڭ جەلبىرەگەنى» ءانى ورىندالعان كەزدەگى زال ءىشىنىڭ سالتاناتى ۇلتتىق ۇلان فورماسىن كيگەن تۋ ۇستاۋشىلار اسكەري قاداممەن ەنگەندە بەينە ءبىر مەملەكەتتىك دەڭگەيدەگى شارا وتكىزىلىپ جاتقانداي اسەرگە بولەپ، كەش قۇرىلىمىن ويلاستىرعان پەداگوگ-ۇيىمداستىرۋشىا.كەنجەبايەۆا، ديرەكتوردىڭ تاربيە ءىسى جونىندەگى ورىنباسارى ا.ەسبايەۆالاردىڭ شەبەرلىگىن تانىتىپ تۇردى.ءاندى ورىنداعان 10-سىنىپ وقۋشىسىمۇرات الماستىڭ ونەرىنە دە اتتاس اقىن اعاسى ەرەكشە ريزالىعىن ءبىلدىردى.
گيمنازيانىڭ تالانتتى وقۋشىلارى تاۋەلسىزدىككە ارنالعان ارناۋ ولەڭدەرىمەن جىر شاشۋ شاشىپ، پوەزيا الەمىنە دەگەن قۇشتار قۇلشىنىستارىن تانىتىپ ، كورەرمەندەر ىقىلاسىنا بولەندى ءارى اقىن اعالارىنىڭ العىسى مەن تابارىك سىيلىعىن الدى.
ارى قاراي اقىنعا ەرە كەلگەن ونەر يەلەرىنە كەزەك بەرىلدى.ەركىن ەرگەن ۇلىنىڭ شەبەرلىكپەن ورىنداعان كۇيلەرى مەن شىرقاعان اندەرى ۇلتتىق بولمىسىمىزدىڭ تاعى ءبىر كيەلى قىرىن جاس ۇرپاققا تانىتىپ،دومبىرا ءۇنى مەن ونەر تىلسىمىنىڭ قۇدىرەتىنە تامساندىردى. اقىن سەرىك ءنۇسىپ ۇلىنىڭ وقىعان جىرلارى دا شىنايىلىعىمەن ءارى كوركەم سۇلۋلىعىمەن تىڭدارماندار كوڭىلىنەن ءوز ورنىن الدى.
كەش شىمىلدىعى گيمنازيا ديرەكتورى جۇلدىز جەكەن قىزى قۇرالبايەۆانىڭ قوناقتارعا اتا داستۇرىمىزگە ساي سىي كورسەتىپ، ءمازمۇندى كەزدەسۋلەرى ءۇشىن زور ريزاشىلىق بىلدىرۋىمەن جابىلدى.
قايىرعازى التىبايەۆ،
دارىندى بالالارعا ارنالعان قارعالى №2
ارناۋلى گيمنازياسىنىڭ ءمۇعالىمى.
الماتى وبلىسى، جامبىل اۋدانى.
