ۇلتتىق بانك باسشىسى دانيار اقىشيەۆ "تۇرعىن ءۇي قۇرىلىس جيناق بانكىنىڭ" باسشىسى قىزمەتىنەن كەتكەن ءنۇربيبى ناۋرىزبايەۆانىڭ ابىرويى قالپىندا دەپ سانايدى، ول ونى بانككە قىزمەتكەر رەتىندە قابىلداعان بولاتىن، - دەپ حابارلايدى «قامشى» پورتالى Tengrinews.kz – كە سىلتەمە جاساپ.

اقىشيەۆتىڭ ايتۋىنشا، ناۋرىزبايەۆا ىشكى اۋديت دەپارتامەنتىنىڭ باسشىسى بولىپ تاعايىندالدى.

ايتا كەتەيىك، "تۇرعىن ءۇي قۇرىلىس جيناق بانكىنىڭ" بۇرىنعى باسشىسى ۇيىمداعى باسشىلاردىڭ كەيبىرىنە پاتەرلەردىڭ تاراتىلۋى جايىندا جانجال تۋىنداعاننان كەيىن قىزمەتىنەن كەتكەن بولاتىن. "ق ر ۇلتتىق بانكى ءتوراعاسىنىڭ بۇيرىعىمەن ناۋرىزبايەۆا ءنۇربيبى سەرەكقاجي قىزى ارنايى تەكسەرۋدەن وتكەنشە ىشكى اۋديت دەپارتامەنتى باسشىسىنىڭ مىندەتىن اتقارۋشى بولىپ تاعايىندالدى. ق ر ۇلتتىق بانكىنىڭ قىزمەتكەرلەرى مەملەكەتتىك قىزمەتكەرلەر بولىپ ەسەپتەلمەيدى، ونىڭ ۇستىنە، ولار بارلىق ءتيىستى پروسەدۋرالار مەن ءتيىستى ورگانداردىڭ تەكسەرۋىنەن وتەدى. ەگەر ناۋرىزبايەۆا ءنۇربيبى سەرەكقاجيقىزىندا قانداي دا ءبىر جاعدايلار تۋىنداسا جانە ولار ونىڭ بۇل قىزمەتكە تاعايىندالۋىنا كەدەرگى كەلتىرسە، ول ارنايى تەكسەرىستەن وتپەيدى. مەنىڭ ويىمشا، ءنۇربيبى ناۋرىزبايەۆانىڭ ابىرويى - قالپىندا. ول ۇزاق جىلدار بويى ۇلتتىق بانكتىڭ ىشكى اۋديت دەپارتامەنتىن باسقارعان جانە ول ونىڭ نەگىزىن سالۋشى، جۇمىستى رەتتەپ، ول جەردەگى ءتيىستى تالاپتاردىڭ بارلىعىن بىلەدى. ال ونىڭ "تۇرعىن ءۇي قۇرىلىس جيناق بانكىندەگى" جۇمىسىنا قاتىستى ايتاتىن بولساق - ول قىزمەتىنەن كەتتى، الايدا، وعان قاتىستى قۇقىق قورعاۋ ورگاندارىنىڭ تاعار كىناسى جوق"، - دەدى اقىشيەۆ.

ەسكە سالا كەتەيىك، "تۇرعىن ءۇي قۇرىلىس جيناق بانكىنىڭ" باسشىسىنىڭ اۋىسقانى 2013 جىلى قازاندا بەلگىلى بولدى. جاڭا باسشى بولىپ ايباتىر جۇماعۇلوۆ تاعايىندالدى. ول كەزدە پاتەرلەردى تاراتۋعا بايلانىستى جانجالعا مەملەكەت باسشىسى نۇرسۇلتان نازاربايەۆتىڭ ءوزى پىكىرىن جەتكىزگەن بولاتىن.