بۇگىن ۇلتتىق ۇلان «وڭتۇستىك» وڭىرلىك قولباسشىلىعىنا قاراستى 7552 اسكەري بولىمىندە ۇلى وتان سوعىسىنىڭ جانە قازاقستان رەسپۋبليكاسى ىشكى اسكەرلەرىنىڭ ارداگەرى، قازاقستان رەسپۋبليكاسى ءىىم قۇرمەتتى ارداگەرى، وتستاۆكاداعى پولكوۆنيك وشپانباي تۇزەلباي ۇلىنىڭ تۇعىرلى 90 جاسقا تولعان مەرەيتويى قارساڭىندا ۇلىقتاۋ جانە سالتاناتتى تۇردە قۇرمەت كورسەتۋ ءىس-شاراسى بولىپ ءوتتى، - دەپ حابارلايدى «قامشى» پورتالى ۇلتتىق ۇلان «وڭتۇستىك» وڭىرلىك قولباسشىلىعىنىڭ باسپا ءسوز قىزمەتىنە سىلتەمە جاساپ.
ءىس-شارا بارىسىندا ءسوز العان «وڭتۇستىك» وڭىرلىك قولباسشىلىعى قولباسشىسىنىڭ تاربيە جانە الەۋمەتتىك-قۇقىقتىق جۇمىستارى جونىندەگى ورىنباسارى نۇرباي بەكتۇرسىنوۆ مەرەيتوي يەسىنە ۇلتتىق ۇلان باس قولباسشىسى جاقسىلىقوۆ رۋسلان فاتيح ۇلىنىڭ اتىنان كەلگەن قۇتتىقتاۋ حاتىن جانە «وڭتۇستىك» وڭىرلىك قولباسشىلىعىنىڭ قولباسشىسى الىبەك سەرالييەۆتىڭ اتىنان قۇتتىقتاۋ حاتتارىن تابىس ەتسە، ارداگەرلەر كەڭەسىنىڭ اتىنان وتستاۆكاداعى پولكوۆنيكتەر گەنناديي فالەيەۆ پەن ۆاسيليي مەزين قۇتتىقتاۋ تىلەكتەرىن ارناپ، ارداگەرلەر كەڭەسىنىڭ ءتوراعاسى وتستاۆكاداعى گەنەرال-مايور قالياقپار توقىشيەۆتىڭ اتىنان كەلگەن قۇتتىقتاۋ حاتىن تابىس ەتتى. بۇنىمەن قوسا، ۇلىقتاۋ كەشىنە وزىمەن بىرگە قىزمەتتەس بولعان ارىپتەستەرى، تىل ارداگەرلەرى، وتستاۆكاداعى وفيسەرلەر جانە 7552 اسكەري ءبولىمىنىڭ جەكە قۇرامى دا قاتىسىپ، مەرەيتويعا ارنالعان كونسەرتتىك باعدارلامانىڭ كۋاسى بولدى.
وشپانباي تۇزەلباي ۇلى 1925 جىلى وڭتۇستىك قازاقستان وبلىسىنىڭ ەلتاي اۋىلىندا دۇنيەگە كەلگەن.
1943 جىلى قىزىل ارميا قاتارىنا شاقىرىلىپ، مايدانعا اتتانادى. سۇراپىل قاندى مايدان جىلدارى ەل باسىنا كۇن تۋعان كەزدە، تولارساقتان ساز كەشىپ، وتان قورعاۋ جولىندا ۋكراينا مەن بەلورۋسسيا قالالارىن ازات ەتۋدە جانە دنەپر وزەنى بويىندا جاۋعا توسقاۋىل قۇرۋدا جان ايانباي تەر توگەدى. ۇلى جەڭىس كۇنىن دە سوناۋ ۋكراينا ورماندارىندا جاۋ باندالارىمەن ارپالىسىپ جۇرگەندە قارسى الادى. سوعىس اياقتالعاننان كەيىن دە، 1945 جىلى ارى قاراي اسكەري قىزمەتىن وتكەرۋ ءۇشىن تۇركىستان اسكەري وكرۋگىنە جولدانادى. 1963 جىلدان باستاپ ىشكى اسكەر قۇرامىنا كىرەتىن 7552 اسكەري بولىمىندە 17 جىل اسكەري بورىشىن وتەپ، سول جىلدار ىشىندە ۆزۆود كومانديرى، روتا كومانديرىنىڭ ورىنباسارى جانە روتا كومانديرى لاۋازىمدارىندا قىزمەت اتقارادى.
1941-1945 جىلدارى ۇلى وتان سوعىسىندا جاۋىنگەرلىك ءىس-قيمىلدارعا قاتىناسقانى جانە ق ر ءىىم ورگاندارى مەن ىشكى اسكەردىڭ جاۋىنگەرلىك-قىزمەتتىك مىندەتتەرىن ادال اتقارعانى ءۇشىن: «ۇلى وتان سوعىسىنىڭ ءى دارەجەلى» وردەنى، «ەرلىگى ءۇشىن»، «گەرمانياعا قارسى سوعىستاعى جەڭىسى ءۇشىن»، «جاپونياعا قارسى سوعىستاعى جەڭىسى ءۇشىن» مەدالدارى سەكىلدى ءتۇرلى مەملەكەتتىك ناگرادالارمەن، بۇنىمەن قوسا كوپتەگەن مەرەيتويلىق مەدالدارمەن جانە ىشكى ىستەر مينيسترلىگىنىڭ «قۇرمەتتى ارداگەرى» قۇرمەت بەلگىسىمەن ماراپاتتالادى.
1980 جىلى زەينەتكەرلىك جاسقا تولۋىنا بايلانىستى «پولكوۆنيك» اسكەري اتاعىمەن قۇرمەتتى زەينەتكەرلىك دەمالىسىنا شىعادى.
«وسى جاسقا جەتكەنشە تاعدىر-تاريح جولىندا كەزدەسكەن تالاي بوگەتتەرگە توتەپ بەرىپ، قاشان دا جەڭىسكە جەتە بىلگەن ول، قازىرگى ۋاقىتتا 90 جاسقا كەلسە دە قازاقستان رەسپۋبليكاسى ءىىم اكادەمياسى ارداگەرلەر ۇيىمى كەڭەسىنىڭ ءتوراعاسى بولىپ قىزمەت اتقارۋدا. قۇرمەتتى دەمالىستا جۇرسە دە، ىشكى اسكەرلەر ارداگەرى رەتىندە وسكەلەڭ ۇرپاقتى اسكەري-پاتريوتتىق رۋحتا تاربيەلەۋدە ەرەكشە بەلسەندىلىك تانىتىپ، ءوزى ۇزاق جىلدار بويى قىزمەت ەتكەن پولكى – 7552 اسكەري بولىمىمەن ۇنەمى تىعىز بايلانىس جاساپ كەلەدى» دەلىنگەن حابارلامادا.
