شىندىقتى شىرىلداپ تۇرىپ ايتار بولساق، ەلىمىزدەگى تەلە ارنالاردى "انشىلەر ەلەسى" كەزىپ ءجۇر. ولاي دەيتىنىمىز، ساحنا جۇلدىزى بولعانىمەن، ەفير جۇلدىزىنا اينالا المايتىن انشىلەر ءا دەگەننەن "جۇزدەن جۇيرىك، مىڭنان تۇلپار" بولا المادى. قاتتى ايتسام، كەشىرەرسىزدەر، مۇنىڭ ءوزى-" يت جوقتا شوشقا ۇرەدىنىڭ" كەرى بولىپ تۇر. ءسوزدىڭ ءوزىن "سورپالاتىپ جىبەرەتىن " انشىلەر مەن ارتىستەر قاي باعدارلامانىڭ رەيتىنگىسىن جالاۋلاتىپ كوتەرىپ اكەتتى؟ ءبىر مەزگىل كوك جاشىككە تەلمىرىپ، تەبىرەنىپ تىڭدايتىن نە قالدى بۇگىندە؟ بەسىكتەن بەلى شىقپاي جاتىپ، "جۇلدىز" بولا قالعىسى كەلەتىن جاستار جاۋلاپ الدى بۇل ەكراندى. ءيا، وعان داۋ بار ما، جاستار باعدارلامالارى، توك شوۋلار كەرەك تە شىعار، ءبىراق "بوياۋشى، بوياۋشى دەگەنگە ساقالىن دا بوياپ جبەرىپتى" دەگەندەي، تەلاارنا كەڭىستىگىن تەك جاستارعا ارناي سالۋ ادىلەتسىزدىك قوي! ەكىنىڭ ءبىر "ءانشى". سول شىركىندەر ەكراننان وزدەرىن كورىپ وتىرىپ، داۋىستارىنىڭ جوقتىعىنا، ءان ماتىندەرىنىڭ ساپاسىز ەكەنىن ءبىلىپ، ماعىناسىنا كەلسەك، جاستار تىلىمەن ايتقاندا، "قۋىپ" كەتكەندەرىنە ۇيالمايدى ما ەكەن؟ "شىركىن-اي..." دەيسىڭ وسىندايدا، باياعى ساعات اشىمبايەۆ، بەيبىت قۇسانبايەۆتار جۇرگىزگەن باعدارلامالار قايدا؟ ءمان-ماعىناسى جوق، ايتەۋىر رەيتينگ جيناۋ ماقساتىندا كورسەتىلىپ جاتقان مۇگەدەك جوبالار.ەسەسىنە الەۋمەتتىك جەلىلەردە، اسىرەسە "فەيسبۋكتە" وتكىر ويلار، زىمىراننان دا ۇشقىر جازبالار كوپ.نەگە دەيمىز تاعى دا، نەگە ءبىزدىڭ تەلەارنالاردا جيرينوۆسكييلەردىڭ اۋزىنا قۇم قۇياتىنداي باعدارلامالار جوق...ايتپاقشى، تەلەارنالاردان "كۆن" ازىلكەشتەرى تۇسپەيتىن بولدى. ولاردا دا بەت جوق ەكەن. ۇيالمايدى. كۇلدىرە المايتىندارىنا. سالماقتى ساتيرانى تۇسىنبەيتىندەرىنە. اۋزىنا كەلگەندەرىن لاق ەتكىزە سالادى. ولارىنان جيىركەنبەيدى دە. ساحنادا تۇرىپ الىپ ايقايلايدى كەلىپ. كورەرمەندەر شەتتەرىنەن كەرەڭدەر سياقتى. العاشقى كەزدە وسى "كۆن" دەگەنىڭىز قىزىقتاۋ بولعانى راس. ءقازىر "بۇزىقتاۋ" بولىپ بارادى. كورگەنسىز بولىپ. سوندا دەيمىن-اۋ، تەلەارنا باسشىلارى قانداي "تاربيەسى" ءۇشىن قىزىعا قالدى ەكەن؟ "جىلايىن دەسەم، كوزىمنەن جاس شىقپايدى، وتىرىك جىلايىن دەسەم، جۇرت سەنبەيدى" دەمەكشى، قازىرگى تەلە ارنالاردان بايىپتى، سالماقتى، وي سالىپ، كوڭىل كوكجيەگىڭدى كەڭەيتەتىن باعدارلامالاردى يتپەن ىزدەپ تابا المايسىڭ. ءيتىڭنىڭ ءوزى ىزدەۋدەن باس تارتارداي... ايتىڭدارشى اعايىن، ەندى نە ىستەيمىز، ا؟