قاراعاندىلىق زيالى قاۋىم كورنەكتى مەملەكەت قايراتكەرى جۇمابەك تاشەنوۆتىڭ 100 جىلدىعىنا وراي مازمۇندى ءىس-شارالار جوسپارلاپ وتىر، - دەپ حابارلايدى «قامشى» پورتالى.
اتاپ ايتقاندا، 25 جەلتوقسان كۇنى ە.ا.بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ جاستار سارايىندا مەملەكەت جانە قوعام قايراتكەرى جۇمابەك احمەت ۇلى تاشەنيەۆتىڭ 100 جىلدىق مەرەيتويىنا ارنالعان «ۇلتىنا قورعان بولعان ۇلى تۇلعا» اتتى سالتاناتتى كەش وتەدى. جۇمابەك تاشەنيەۆتىڭ جۇلدەسىنە ارنالعان جاس اقىنداردىڭ اراسىندا «جىلدىڭ ۇزدىك اقىنى» انىقتالاتىن وبلىستىق جىر بايگەسىندە، سونداي-اق «جىلدىڭ ۇزدىك جازۋشىسى» مەن «جىلدىڭ ۇزدىك ايتىسكەر اقىنى» جانە «جىلدىڭ ۇزدىك قايراتكەرى» انىقتالىپ، ولارعا جۇلدەلەر تابىستالادى.
«تۋعان ەلىن، تۋعان جەرىن قورعاۋدا ەرەكشە ەرلىك كورسەتىپ، ۇلانبايتاق جەرىمىزدى ۇرپاققا امان ساقتاپ قالۋ جولىندا باسىن بايگەگە تىككەن الاشتىڭ ءبىرتۋار پەرزەنتى، قازاق حالقىنىڭ قاھارمانى تاشەنيەۆ جۇمابەك احمەت ۇلىنىڭ ونەگەلى ىستەرىن، قايراتكەرلىك جولىن، اسىل مۇراسىن دارىپتەۋ. ۇلتتىق پوەزيامىزدى ناسيحاتتاۋ، ۇرپاقتى ۇلتتىق ءاتا-داستۇر رۋحىنا تاربيەلەۋ. جاستاردىڭ شىعارماشىلىعىن شىڭداۋ جانە قولداۋ. حالىقتىڭ رۋحاني، مادەني مۇرالارىن كەلەشەك ۇرپاققا جەتكىزۋ جانە ونى ەلدىڭ ساناسىنا ءسىڭدىرۋ ماقساتىندا ۇيىمداستىرىلادى» دەلىنگەن ۇيىمداستىرۋ كوميتەتى تاراتقان حابارلامادا.
سالتاناتتى شاراعا قازاقستان رەسپۋبليكاسىنىڭ ەڭبەك سىڭىرگەن قايراتكەرى، ق ر مەملەكتتىك سىيلىعىنىڭ يەگەرى قويشىعارا سالعارا جانە قازاقستان رەسپۋبليكاسىنىڭ ەڭبەك سىڭىرگەن قايراتكەرى، ق ر مەملەكتتىك سىيلىعىنىڭ يەگەرى، مەملەكەت جانە قوعام قايراتكەرى بەكبولات تىلەۋحان باستاعان ءبىر توپ ونەرپازدار دا قاتىسادى دەپ كۇتىلۋدە. جىر كەشىنە ايگىلى اقىندار حالىقارالىق «الاش» سىيلىعىنىڭ يەگەرلەرى سەرىك اقسۇڭقار ۇلى، ابزال بوكەن، قويلىباي اسانوۆ پەن سەرىك ساعىنتاي جانە حالىقارالىق، رەسپۋبليكالىق ءان بايقاۋلارىنىڭ لاۋرەاتتارى ەرجان بازاربەكوۆ، سەرجان مۇسايىن، داۋرەنبەك اركەنوۆتەر قاتىسادى. جىر كەشىندە «توقىراۋىن تولقىنى» ءانسامبلى اننەن جىر شاشۋ شاشادى.
