ق ر قورعانىس ءمينيسترى ماسكەۋدە تمد قورعانىس مينيسترلەرى كەڭەسىنىڭ وتىرىسىنا قاتىستى، - دەپ حابارلايدى «قامشى» پورتالى قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.

بۇگىن، 23 جەلتوقساندا قازاقستان رەسپۋبليكاسىنىڭ قورعانىس ءمينيسترى يمانعالي تاسماعامبەتوۆ  ماسكەۋدە تمد قاتىسۋشى مەملەكەتتەرى قورعانىس مينيسترلەرى كەڭەسىنىڭ وتىرىسىنا قاتىستى. وتىرىس باستالار الدىندا رف قورعانىس ءمينيسترى سەرگەي شويگۋ ق ر قورعانىس مينيسترىنە ەلىمىزدەگى باستى اسكەري رەليكۆيا، جۋىردا استانادا اشىلعان قارۋلى كۇشتەردىڭ اسكەري-تاريحي مۇراجايىندا لايىقتى ورىن تاباتىن جەڭىس جالاۋىنىڭ كوشىرمەسىن بەردى.  

وتىرىستىڭ كۇن تارتىبىندە تمد ءاشقق بىرىككەن جۇيەسىن دامىتۋ مەن ۇستاۋ، تمد قاتىسۋشى مەملەكەتتەر قارۋلى كۇشتەرى ينجەنەرلىك اسكەرلەرىنىڭ ءوزارا ءىس-قيمىلى، اسكەري ءبىلىم بەرۋ، سونداي-اق 2016 جىلعا ارنالعان ىنتىماقتاستىق جوسپارلارىن بەكىتۋگە قاتىستى ماسەلەلەر قوزعالدى.

ودان باسقا، قورعانىس مينيسترلەرى كەڭەسىنىڭ جاڭا حاتشىسى  بولىپ گەنەرال-مايور يۋريي داشكين تاعايىندالىپ، تمد قمك كەلەسى وتىرىسىنىڭ ءتارتىبى بەكىتىلدى.

سونىمەن قاتار، وتىرىستا 2015 جىلعا دەيىن تمد-نىڭ اسكەري ىنتىماقتاستىق تۇجىرىمداماسىن ورىنداۋ قورىتىندىسى قارالدى. اعىمداعى جىلدىڭ 16 قازانىندا بۋرابايدا وتكەن تمد مەملەكەتتەرى باسشىلارى كەڭەسىنىڭ وتىرىسىندا 2020 جىلعا دەيىن تمد قاتىسۋشى مەملەكەتتەرىنىڭ اسكەري ىنتىماقتاستىق تۇجىرىمداماسى بەكىتىلگەنىن ەستەرىڭىزگە سالا كەتەيىك.

ءدال وسى كۇنى قازاق ەلىنىڭ قورعانىس ءمينيسترى ي.ن.تاسماعامبەتوۆتىڭ رف قورعانىس ءمينيسترى س.ك.شويگۋمەن ەكىجاقتى كەزدەسۋى ءوتتى. وسى كەزدەسۋدە حالىقارالىق ارميا ويىندارىن وتكىزۋ ماسەلەلەرى تالقىلاندى.  ويتكەنى، كەلەسى جىلدان باستاپ قازاقستان ارتيللەرياشىلاردىڭ سايىسى جانە مەرگەندەردىڭ بايقاۋى سىندى ارميا ويىندارىنىڭ ەكى كەزەڭىن قابىلدايدى.

«سايىسۋ رۋحى ولارعا سەنىپ تاپسىرىلعان تەحنيكا مەن قارۋ-جاراقتى قولدانۋدىڭ ءىس جۇزىندەگى اسپەكتىلەرىن تەرەڭىرەك مەڭگەرۋگە  ىقپال ەتەدى. ونىڭ ۇستىنە مۇنداي ءىس-شارالار جەكە قۇرامنىڭ جاۋىنگەرلىك رۋحىن ارتتىرادى. اتالعان باستامانى قولداي وتىرىپ، قازاقستاندىق تاراپ ءوزىنىڭ اۋماعىندا سايىس بولىگىن ۇيىمداستىرۋعا جانە رەسەي فەدەراسياسىنىڭ اۋماعىندا 19 سايىسقا  قاتىسۋ ءۇشىن وزدەرىنىڭ وكىلدەرىن  جىبەرۋگە ءازىر»، - دەدى كەزدەسۋ بارىسىندا يمانعالي تاسماعامبەتوۆ.

بيىلعى جىلى اسكەريلەرىمىز كەڭىنەن تانىمال «تانك بياتلونى»، «اۆيادارتس» ۇشۋ ەكيپاجدارىنىڭ سايىسىنان باسقا «كاسپيي تەڭىزى» اسكەري-تەڭىز كورابلدەرىنىڭ بايقاۋىنا قاتىسقانىن ايتا كەتكەن ءجون.  بۇل ويىندار قارۋلى كۇشتەر اراسىندا سەرىكتەستىكتى نىعايتۋدا بەلگىلى ءبىر ءسات بولعانى ءسوزسىز.