الماتى مەتروسىنىڭ بۇرىنعى باسشىسى مۇرات وكشەبايەۆ 9 جىلعا سوتتالدى، ول جازاسىن جالپى تارتىپتەگى كولونيادا وتەيدى، - دەپ حابارلايدى «قامشى» پورتالى Tengrinews.kz – كە سىلتەمە جاساپ. سونىمەن قاتار، وعان 5 جىلعا دەيىن مەملەكەتتىك قىزمەتتە جۇمىس ىستەۋگە تىيىم سالىنىپ، "قۇرمەت" وردەنىنەن ايىرىلدى.

ال، ونىڭ بۇرىنعى ورىنباسارى ەربول قالدىبايەۆ 8 جىلعا باس بوستاندىعىنان ايىرىلدى جانە ونىڭ مۇلكى تاركىلەنىپ، 3 جىلعا دەيىن مەملەكەتتىك قىزمەتتە جۇمىس ىستەۋىنە تىيىم سالىندى. تاعى ءبىر ايىپتالۋشى، "سرەدازەنەرگوسەرۆيس" ج ش س باسشىسى كونستانتين انتيپوۆ تا 8 جىلعا سوتتالىپ، مۇلكى تاركىلەنەتىن بولدى، سونىمەن قاتار، 3 جىلعا دەيىن كوممەرسيالىق ۇيىمداردا جۇمىس ىستەۋ قۇقىعىنان ايىرىلدى. ۇكىمدى مەدەۋ اۋداندىق سوتى شىعاردى.

سوت ۇكىمىمەن شىعىندى ءۇش ايىپتالۋشى بىرىگىپ وتەيدى، جالپى كولەمى - 2 ميلليارد 503 ميلليون تەڭگە. ءارقايسىسىنا 8 ميلليون 343 مىڭ تەڭگەدەن كەلەدى. سونىمەن قاتار، ساراپتامالار جۇرگىزىلگەنى ءۇشىن وكشەبايەۆ پەن انتيپوۆ 59 684 تەڭگەدەن تولەيدى، ال قالدىبايەۆ - 24 230 تەڭگە. ۇكىم زاڭدى كۇشىنە ەنگەن جوق. سۋديا سوت شەشىمىنە شاعىم كەلتىرۋگە بولاتىنىن ءتۇسىندىردى.

بۇعان دەيىن وكشەبايەۆقا "سەنىپ تاسىرىلعان بوتەن مۇلىكتى يەلەنىپ الدى نەمەسە ىسىراپ ەتتى" دەگەن ايىپتىڭ تاعىلعانى حابارلانعان بولاتىن. وسىعان دەيىن بولعان سوت وتىرىسىندا قالدىبايەۆ ءوز كىناسىن مويىندامايتىنىن مالىمدەدى. سونىمەن قاتار، ايىپتالۋشىلارعا پروسەسسۋالدىق كەلىسىم جاساۋ ۇسىنىلدى، ءبىراق ولار باس تارتتى. ايىپتاۋعا سايكەس، ءىس فيگۋرانتتارى قىلمىستىق سحەما جاساپ، جالعان كاسىپورىن اشقان. ول تەندەرلەرگە قاتىسۋعا ءتيىس بولعان. وسىلايشا، ولاردىڭ كومپانياسى كونكۋرستاردا جەڭىسكە جەتكەن. شىعىننىڭ كولەمى ميللياردتاپ سانالدى.

ايتا كەتەيىك، 2009 جىلى وكشەبايەۆ 120 ميلليون تەڭگەنى ماقساتسىز جۇمساعانى ءۇشىن ارىپتەستەرىمەن بىرگە ءۇي قاماۋىنا الىنعان بولاتىن. الايدا كەيىن وكشەبايەۆ بوساتىلىپ، جۇمىسىنا ورالدى. سوڭعى كەزدەرى ول قالا ءماسليحاتىنىڭ دەپۋتاتى بولىپ قىزمەت ەتتى.