«نۇر وتان» پارتياسىنىڭ قولداۋىمەن، «جەزبۇيدا» جاستار قوعامدىق بىرلەستىگىنىڭ ۇيىمداستىرۋىندا ەكى كۇنگە جالعاسقان «ەرجانىبەك» اتتى رەسپۋبليكالىق فۋتبول ءوتتى دەپ حابارلايدى «قامشى» پورتالى.
13 جەلتوقسان تاڭەرتەڭ قازاقستان رەسپۋبليكاسىنىڭ ءانۇرانى اۋەنىناڭ استىندا، قانات يسلام ۇلى، جەڭىس تۇركيا ۇلى، تولقىن اقان ۇلى قاتارلى ايبوز ازاماتتاردىڭ قاتىسۋىندا اسا قىزۋ مەرەيمەن شىمىلدىعىن اشىپ، رەسپۋبليكانىڭ ءار وبلىسىنان كەلگەن، اتاجۇرتقا ورالعان قانداستاردان قۇرام تاپقان ون جەتى كوماندا اراسىندا وتكەن ءساتتى سايىس 14 جەلتوقسان تۇستەن كەيىن الماتى قالاسى «مەدينا» سپورت كەشەنىندە شىمىلدىعىن جاپتى.
كىلەڭ سايدىڭ ساقا تاسىنداي سايگۇلىكتەردەن ىرىكتەلگەن جالىندى جاستار اراسىندا بولعان قاراجارىستان كەفيىن، جارتىلاي فينالعا «اعايىن»، «جەزبۇيدا»، «اقتاۋ-ەرتىس»، «مۇزتاۋ»، «قانات»، «ساۋىر»، «ەرتىس»، «وردا» قاتارلى سەگىز ساڭلاق كوماندا ىرىكتەلدى. وسى سەگىز كوماندا اراسىندا بولعان قىزىقتى دا قيقۋلى باسەكەدە «قانات»، «اقتاۋ-ەرتىس»، «جەزبۇيدا»، «مۇزتاۋ» ءتورت كوماندا اعالاپ العا شىعىپ، شەشۋشى جارىسقا جولداما الدى. «مەدينا» سپورت كەشەنىندە ءوتىپ جاتقان بۇل جارىستىڭ ءدۇبىرىن ەستىپ، الىس-جۋىقتان كەلگەن جانكۇيەرلەردىڭ دە شوعىرى مولايىپ العان ەدى. تۇستەن كەيىنگى كورگەننىڭ كوز مەيىرىن قاندىرىپ، كورمەگەننىڭ وكىنىشىنە اينالعان ايتۋلى بايگەدەن كەيىن سارالانعان ساڭلاقتار مىناداي ناتيجەمەن، ەش تالاسسىز جۇرتقا جاريا ەتىلدى.
بۇل رەتكى جارىستىڭ «ەڭ ۇزدىك قاقپاشى» سيلىعىن «اقتاۋ-ەرتىس» كومانداسىنىداعى باقتيار شۋاقباييەۆ السا، «ۇزدىك شابۋىلشى» سيلىعىن جالپى ون بەس گولل سوققان «مۇزتاۋ» كومانداسىنداعى سارقىتباي سەرىك الدى، «ۇزدىك ويىنشى» بولىپ استانادان كەلگەن «وردا» كومانداسىنداعى ورال ماراپاتتالدى. ءوز قاتارىنان وزا شاپقان وسى وعلاندارعا ماراپات قاعازىمەن قوسا، «التىن اياق»، «التىن دوپ» اشەكەي كۋبوكتارى سيعا ۇسىنىلدى.
كاسىپقوي بوكستا ەل نامىسىن قورعاپ جۇرگەن باتىر قانات يسلام ۇلىنىڭ قۇرمەتىنە جاس تۇلەكتەردەن قۇرام تاپقان «قانات» كومانداسى ءتورتىنشى ورىنعا يەلىك ەتتى. ولار 50 مىڭ تەڭگە اقشالاي سيلىق، سيلىق گراموتاسىمەن جانە سيلىق لوڭقاسىنا قوسا كوماندا مۇشەلەرى قولا مەدالدارمەن سيلاندى.
قىركۇيكتىڭ باسىندا وتكەن الماتى قالالىق فۋتبول جارىسىندا باس جۇلدەنى ەنشىلەگەن «جەزبۇيدا» كومانداسى وسى رەتكى جارىستىڭ ءۇشىنشى دارەجەلى جۇلدەسىن الدى. كوماندا 100 مىڭ تەڭگە، سىيلىق گروماتاسى، سىيلىق لوڭقاسى، قولا مەدالدارعا يەلىك ەتتى.
اقتاۋ قالاسىنان كەلگەن ازاماتتاردىڭ «اقتاۋ-ەرتىس» كومانداسى ەكىنشى دارەجەنى ياعني جۇلدەگەرلىك سىيلىقتى قانجىعاسىنا بوكتەردى. 200 مىڭ تەڭگەلىك سىيلىقتى، گراموتا، لوڭقا جانە كۇمىس مەدالداردى مويىنعا ءىلدى، قازاق دالاسىنىڭ باتىسىنان الماتىعا ات باسىن بۇرعان جالىندىلار.
ءالحيسسا، بۇل رەتكى «ەر جانىبەك» اتتى الادوپ جارىسىنىڭ اعا جۇلدەگەرلىگىن «مۇزتاۋ» كومانداسى جەڭىپ الدى. بۇدان بۇرىن دا سان سايىستىڭ سايگۇلىگى اتانىپ كەلە جاتقان «مۇزتاۋلىقتار» بۇل رەتتە دە ءوز بيىگىن مەنشىكتەندى. جارىستىڭ باس بايگەسىنە 300 مىڭ تەڭگە سىيلىق اقشامەن قوسا ءار كەزەك سايىن چەمپيون كوماندالار اراسىندا اينالىپ وتىراتىنداي ەتىپ، «ەر جانىبەك» حالىقارالىق قوعامدىق قورىنىڭ قارجىسىمەن دايىندالعان ءىرى كۇمىس كۋبوكتى قوردىڭ پرەزيدەنتى جەڭىس تۇركتيا ۇلى «مۇزتاۋدىڭ» كوماندا كاپيتانى سارقىتجانعا تابىس ەتتى. ايماڭداي ازاماتتار التىننان مەدال تاعىندى. بۇعان قوسا ون جەتى كوماندانىڭ كوماندا جەتەكشىلەرىنە، دەمەۋشىلەرگە، تورەشىلەردىڭ تورەسى اتانعان بەكەن ءابىل ۇلى قاتارلى ازاماتتارعا العىس حات ۇسىنىلىپ، باعالى كىتاپتار سىيعا تارتىلدى. سونداي-اق، ماراپاتتالعان سپورتشىلارعا دەمەۋشى ورىندار ۇسىنعان «زەرەك بالا» قاستەرلى قالامى، "اۆتوكولىكتىڭ ورىندىق قابى" قاتارلى وتاندىق ونىمدەر تارتۋ ەتىلدى. «ءبىرىن ءبىرى باتىر دەپ سىيلاي بىلگەن» وسەر ەلدىڭ ازاماتتارىنىڭ سەلبەسۋىندە وتكەن بۇل جاسىل الاڭ جارىسى ەش وكپە-رەنىشسىز، كەلەسى كەزەكتى كەزدەسۋ بۇدان دا نۇرلى بولادى دەگەن سەنىممەن تاراسىپ جاتتى.
ءبىز باستامامىزدى ەرەكشە قولداپ-قۋاتتاعان نۇر-وتان پارتياسىنا، الىس-جۋىقتاعى اعايىندارعا، جۇيەدەن ايىرىقشا دەمەگەن «ەرجانىبەك» حالىقارالىق قوعامدىق قورى پرەزيدەنتى جەڭىس تۇركيا ۇلى، رەسمي دەمەۋشىلەر «باقكەلدى-2012» ج ش س ديرەكتورى تولقىن اقان ۇلى، «ءساتتىباي» ج ش س ديرەكتورى ءومارالى ادىلبەك ۇلى جانە نۇرلان تالىپ ۇلى، "قاينار" ج ش س ديرەكتورى ەلمۇرات قويشى ۇلى، تالاپقان پاتقان ۇلى، قۇمار جۇماقان ۇلى، سونداي-اق قۇرىلىق اسىپ ورالعان دەمالىسىندا قىمباتتى ۋاقىتىن قيىپ ورتامىزعا كەلىپ، جاستارعا شابىت بەرگەن قانات يسىلام ۇلى قاتارلى ازاماتتارعا شەكسىز العىسىمىزدى بىلدىرەمىز.
