«پوليسەيلەر قولىنا «قىزىل كۋالىك» تۇسكەننەن كەيىن ول ءوزىن پاتشا، ءتاڭىر رەتىندە سەزىنەدى. وعان جالاقىنى كىم تولەپ جاتقانىن ۇمىتىپ كەتەدى، ال ونى حالىق تولەپ جاتىر!» قازاقستان پرەزيدەنتى نۇرسۇلتان نازاربايەۆ جاقىندا عانا باس پروكۋرورعا قاراتا ايتقان سوزىندە وسىلاي دەپ ەدى. مىنە، بۇگىن پارلامەنت مىنبەرىندە قارالىپ جاتقان زاڭ-جوباسى دا وسى ساقشى مىرزالاردىڭ ءتارتىبىن كۇشەيتەتىن كورىنەدى. اتتەڭ، ەلباسىنىڭ ءسوزى، قارالىمداعى زاڭ – «امبەباپ» اتالعان پاگوندىلاردىڭ قۇلاعىنا ءالى كىرمەگەن سياقتى.
«ەستىگەن قۇلاقتا جازىق جوق». جاقىندا كولىكتىڭ دوڭگەلەگىنە جەل تولتىرۋ ءۇشىن رىسقۇلوۆ-ەمسوۆ كوشەلەرىنىڭ قيىلىسىنداعى «ستو»-لاردىڭ بىرىنە بارعانمىن. ءبىر توپ جىگىتتىڭ ىشەك-سىلەسى قاتىپ، دابىرلاپ ايتىسىپ جاتقان اڭگىمە اۋانىنا ەرىكسىز قۇلاق ءتۇردىم. سويتسەم، وسىناۋ قاتارداعى «ستو»-لاردىڭ ارت جاعىنداعى ءبىر قۋىستا دارەت سىندىرعان بىرنەشە جىگىتتى «امبەباپ» پوليسەيلەرىمىز دەرەۋ «قۇرىقتاپ»، ايىپپۇل سالىپ، ءتىپتى، اباقتىعا توعىتاتىندارىن ايتىپ، ابدەن ساستىرىپتى. اقىرى ايىپپۇلدارىن تولەپ ارەڭ قۇتىلعان ەكەن.
سويتسەك، "امبەباپتاردىڭ" الەۋەتى كۇشتى سياقتى. اناۋ قۋىعى سىزداعان جىگىتتەردىڭ مەڭزەگەن تۇسىن بايجالاسام، قايداعى ءبىر قالتارىس. سونىڭ ءوزىن بايىپپەن باقىلاپ، قالاي شالبارىن شەشتى، قالاي دارەتكە وتىردى ءبارىن قالت جىبەرمەگەن كورىنەدى. ساقشىلارىمىز ساق ەكەن دەيمىز بە، بۇعان نە دەيمىز؟ الدە، پوليسەيلەرىمىزگە ازاماتتاردىڭ اۋىن اڭدىعاننان باسقا جۇمىس قالماعان با؟ قىلمىستىڭ ءبارى اشىلىپ، قوعامدىق ءتارتىپ ساقاداي-ساي بولعانى ما؟
باسقا مەملەكەتتى قايدام؟ ءبىزدىڭ ەلدىڭ قۇقىق قورعاۋشىلارىنىڭ قىزمەتى مۇلدەم «اۋىسىپ» كەتكەن. وزگە جۇرتتار جول ەرەجەسىن بۇزساڭ، ەسكەرتىپ، دۇرىسىن ايتادى، حالىقتى سوعان تاريبەلەيدى. پوليسياسى حالىقتىڭ قورعانى. دارەت سىندىراتىن جەر ىزدەپ جۇرسەڭ تاۋىپ بەرەدى... ال بىزدە ءبارى كەرىسىنشە. جول ەرەجەسىن بۇزسا ەكەن دەپ تۇرادى، دارەت سىندىرعالى تۇرساڭ «قاشان شەشەدى» دەپ كۇتىپ وتىرادى. بۇل نە سۇمدىق؟
قازاقشا ايتقاندا، «تىلەۋى جامان».
حازىرەت ءابدىلدا
