قاراعاندىلىق قارا مەتاللۋرگيا الىبى «ارسەلورميتتال تەمىرتاۋ» كومپانياسى جۇمىسشىلارىنىڭ ەڭبەكاقىسىن وسىرۋدەن باس تارتتى، - دەپ حابارلايدى «قامشى» پورتالى.
بۇعان دەيىن كومپانياداعى مەتاللۋرگتەر مەن كەنشىلەردىڭ «جاقتاۋ»، «قورعاۋ» كاسىپوداق ۇيىمدارى ۇلتتىق بانك وتكىزەن ديەۆالۆاسيا ەسەبىنەن كورگەن پايدادان جۇمىسشىلاردىڭ جالاقىسىن ءوسىرۋ تۋرالى تالاپ قويعان ەدى. بۇعان كومپانيا باسشىلىعى دوللاردىڭ قىمباتتاۋى كومپانيانىڭ احۋالىن جاقسارتۋعا ىقپال ەتكەن جوق دەگەن سىڭايدا تۇسىنىك بەرگەن.
«وكىنىشكە وراي، تەڭگە ديەۆالۆاسياسى ماسەلەنى شەشپەدى. ۆاليۋتا نارىعىنداعى وزگەرىستەر دۇرىس قادام بولدى، ءبىراق، بۇل ماسەلەنى شەشە المادى. بۇل كومپانيا ءوندىرىسى مەن رەسەيلىك باسەكەلەستەر اراسىنداعى ايىرماشىلىقتىڭ ورنىن تولتىرا المادى. سونداي-اق، مۇنىڭ ءبىز ەكسپورتتايتىن تەمىر رۋداسى مەن كومىردىڭ نارىقتاعى باعاسىنىڭ قۇلدىراۋىنان تۋعان قيىندىقتارىمىزعا دا وڭ اسەر ەتپەدى» دەلىنگەن كومپانيا تاراتقان حابارلامادا.
بۇعان دەيىن ديەۆالۆاسيا وتكىزگەنى ءۇشىن قازاقستاندىق جەتەكشى كومپانيا باسشىلارى پرەزيدەنتكە العىس ءبىلدىرىپ، بۇل قادام ەڭبەكشىلەر ءۇشىن جاعىمدى جاعداي تۋعىزۋعا سەبەپ بولادى دەگەن ەدى.
