وتكەن جىلى ەلىمىزدە 400 مىڭداي ءسابي دۇنيەگە كەلدى. بۇل تاۋەلسىزدىك جىلدارىنداعى مەجەدەن ارتا تۇسكەنىن كورسەتەدى، - دەپ حابارلايدى «قامشى» پورتالى قازاقپاراتقا سىلتەمە جاساپ.

مەملەكەت باسشىسى نۇرسۇلتان نازاربايەۆ قازاقستان حالقىن جاڭا 2016 جىلمەن قۇتتىقتاۋىندا 2015 جىلى ەلىمىزدە 400 مىڭداي ءسابيدىڭ دۇنيەگە كەلگەنىن اتاپ ءوتتى. ەلباسى بارلىق قازاقستاندىق وتباسىلاردى بولاشاعى ءبىرتۇتاس ەلدىڭ وسىناۋ جاڭا ۇرپاعىنىڭ ومىرگە كەلۋىمەن قۇتتىقتادى. «سولار ءۇشىن جانە ءوسىپ كەلە جاتقان مىڭداعان قازاقستاندىقتار ءۇشىن ءبىز جاڭا مەكتەپتەر مەن بالاباقشالار، تۇرعىن ۇيلەر مەن اۋرۋحانالار، جولدار مەن كاسىپورىندار، ستاديوندار مەن كونسەرت زالدارىن سالدىق. بارلىق قازاقستاندىقتىڭ باقىتى ءۇشىن ءبىز بىرلىگىمىزدى ءارقاشاندا ساقتايتىن بولامىز!» - دەي كەلىپ، مەملەكەت باسشىسى ەلدىڭ بارشا تۇرعىنىنا بەيبىتشىلىك، كەلىسىم جانە ءبىزدىڭ تۋعان وتانىمىزدىڭ وركەندەۋى جولىنداعى جاسامپاز ەڭبەكتەرى ءۇشىن العىسىن ءبىلدىردى.

ەلدىڭ دامۋى، ەكونوميكالىق-الەۋمەتتىك جاعدايدىڭ جاقسارۋى ءاربىر جاس وتباسىندا دا بالا سانىنىڭ وسۋىنە تىكەلەي اسەر ەتەتىنى انىق. ەلىمىزدە بالا تۋۋ سانى جىل سايىن  ارتا تۇسۋدە.

اتاپ ايتار بولساق، 2010 جىلى قازاقستاندا 366 مىڭ ءسابي ومىرگە كەلسە، 2012 جىلى ەل ازاماتتارىنىڭ وتباسىندا دۇنيەگە كەلگەندەردىڭ سانى 381 مىڭعا جەتتى. ستاتيستيكا كوميتەتىنىڭ مالىمەتىنە سۇيەنسەك، 2014 جىلى ەلىمىزدە 368 مىڭ ءسابي دۇنيەگە كەلىپتى.

2016 جىلى ەلىمىزدە دۇنيەگە كەلەتىن بالالاردىڭ سانى وتكەن جىلعى مەجەدەن دە اسىپ ءتۇسۋى ىقتيمال. تاۋەلسىز مەملەكەتىمىزدەگى وڭ وزگەرىستەر، جاستاردىڭ كەشەلەككە دەگەن سەنىمىنىڭ نىعايۋى، جاس وتباسىلاردىڭ جاعدايىنىڭ جاقسارا ءتۇسۋى بالا سانىنىڭ وسۋىنە ىقپال ەتەدى دەۋگە نەگىز بار.

ءتىپتى ساراپشىلاردىڭ دەرەگىنە سۇيەنسەك، قازاقستاندا تاۋلىگىنە 800-گە جۋىق (766) بالا دۇنيەگە كەلەدى ەكەن. ەندەشە، 2016 جىلدىڭ ەنشىسىندە 366 كۇننىڭ بار ەكەنىن دە ەسكەرگەنىمىز ءجون.

بەيبىت ءومىردى قالايتىن قازاقستاننىڭ بارشا حالقى تاۋەلسىزدىگىمىزدىڭ 25 جىلدىعى جەمىستى دە جەڭىستى بولاتىنا سەنەدى.