وسىدان ءبىراز بۇرىن سايتىمىزدا قىتايلىق اراق زاۋىتتارى قازاقتىڭ ۇلتتىق كيىمى قامزول ۇلگىسىندە بەزەندىرىلگەن اراق شىعارىپ جاتقانىن جاريالاعان بولاتىنبىز. ەندى قىتايدىڭ مەملەكەتتىك ورگاندارى اتالعان اراقتى ساتىلىمنان الىپ، بۇعان دەيىن وندىرىلگەن ىشىمدىك ونىمدەرىن جويۋ تۋرالى ۇيعارىم شىعاردى دەگەن حابار جەتىپ وتىر.

دالىرەك ايتساق، ىلە قازاق اۆتونوميالى وبلىسى كۇنەس اۋداندىق پارتيا كوميتەتى اقپارات قۇرالدارى مەن جەرگىلىكتى تۇرعىندار اراسىندا تۋىنداعان «سوربۇلاق»، «جىبەك جولى اڭىزى» اراقتارىنىڭ شىعارىلۋى قازاق حالقىنىڭ ۇلتتىق داستۇرلەرىن قورلاۋعا باعىتتالعان ارەكەت دەگەن نارازى پىكىرگە وراي ۇلتتىق ءدىن ىستەرى، بازار باسقارۋ مەكەمەسى سىندى ءبىرقاتار مەملەكەتتىك ورگاندارمەن بىرلەسكەن توپ قۇرىپ، اتالعان ماسەلەنى زەرتتەگەن.

«توپ جۇمىسى ناتيجەسىندە وتكەن جىلدىڭ 30 جەلتوقسانىندا اتالعان الكوگولدىك ونىمدەردى شىعارۋ ۇلتتىق ماسەلەگە قايشى كەلەتىنى انىقتالىپ، قازاق حالقىنىڭ ءداستۇرى مەن ۇلتتىق نامىسىن قورلايدى دەگەن ۇيعارىم شىعارىلعان. ىشىمدىك ءونىمىن شىعارۋشى «سوربۇلاق» الكوگولدى ءونىم ءوندىرۋشى سەرىكتەستىككە 15000 يۋان كولەمىندە ايىپپۇل سالىنىپ، ءۇرىمجى قالاسىندا ورنالاسقان «لاۋ-فاڭ» ساۋدا سەرىكتەستىگىنە وسى كۇنگە دەيىن شىعارىلعان «سوربۇلاق»، «جىبەك جولى اڭىزى» اراقتارىن اينالىمنان جيناپ الىپ، جويۋ تاپسىرىلعان» دەلىنگەن كۇنەس اۋدانىنىڭ باسشىلىعى تاراتقان حابارلامادا.