الماتىدا "التىن القا" يەگەرى، سەگىز بالانىڭ اناسى باسىندا باسپانا جوق، قيىن كۇن كەشۋدە. جالعىزباستى انانىڭ ايتۋىنشا، وكىمەتتەن كومەك كۇتىپ كۇدەر ۇزگەن. كوپ بالالى وتباسى رەتىندە پاتەر كەزەگىنە دە تۇرعان ەكەن، الايدا 7 جىلدان بەرى كەزەك جىلجىماي قويدى دەپ ناليدى. بۇل تۋرالى 31-ارنا حابارلادى.

تاڭ اتا ۇيدەن كەتكەن كۇلزادا ءتۇس قايتا ۇيگە ورالدى. كامەلەتكە تولماعان 5 بالاعا تاماق تاۋىپ كەلدى. ايتۋىنشا، بىرەۋدىڭ ءۇيىن اقتاپ 1500 تەڭگە الىپتى. بالالاردىڭ ۇلكەنى 21 جاستا، ەڭ كىشىسى 1 جاستان اسقان. ۇلكەن ۇلى اسكەردە. كۇيەۋىمەن 1 جىل بۇرىن اجىراسىپتى. بار ارمانى - باسپانالى بولۋ.

كۇلزادا مىرزاكەرىموۆا، كوپبالالى انا:

- حالىقتىڭ سانىن كوبەيتىڭدەر، سوندا كوبەيتكەندە نە پايدا تابامىز ايتىڭىزشى. قۇداي ءوزى كەشىرسىن، كەيدە ويلايمىن، 1-2 بالام بولعاندا. ءوزىم ويلايمىن، قۇداي كەشىرسىنشى، مەنىڭ بايلىعىم - وسى بالالارىم. وسىلارعا نان تاۋىپ، وسىلاردى جەتكىزۋ مەنىڭ ماقساتىم. باسقا ەشتەڭە ەمەس. ەندى ءبىر باسپاناسى بولسا، وسىلار ءوز ۇيلەرىندە وتىرسا، ەشكىمگە جاۋتەڭدەمەي. 

ازىرگە بۇل ارماننىڭ اۋىلى الىس بولىپ تۇر. 7 جىل بۇرىن باسپانا كەزەگىنە تۇرعان انانىڭ بارماعان مەكەمەسى، اشپاعان ەسىگى جوق. جاۋاپ جالعىز - كەزەك كۇتۋ كەرەك. ال مەكتەپ جاسىنداعى بالالار كەيدە وقۋلارىنا اشقۇرساق اتتانادى. "التىن القا" ءۇشىن الاتىن جاردەماقىسى باسپانانىڭ جالداۋ اقىسىنا دا جەتپەيدى ەكەن. 

كۇلزادا مىرزاكەرىموۆا، كوپبالالى انا:

- كومەكتەسىڭىزدەر. مىناۋ قازاقتىڭ قارادومالاق بالالارى. كورىپ وتىرسىزدار، ءبارى كىشكەنتاي. بۇلاردى تاستاپ جۇمىسقا دا شىعا المايمىن. قول ۇشتارىڭىزدى بەرىپ، كومەكتەسەدى دەپ ۇمىتتەنەمىن.

باتىر انانىڭ سوڭعى تۇراقتاعان باسپاناسى مىنا قۇلاعالى تۇرعان شاعىن ساراي. مۇنىڭ وزىنە ءبىر اي بۇرىن قونىستانىپتى. بۇعان دەيىن اۋىستىرعان پاتەردىڭ سانىنان جاڭىلىستىق دەيدى سەگىز بالانىڭ اناسى.

الاتاۋ اۋدانىنىڭ اكىمدىگى بۇل وتباسىنىڭ جاعدايىنا قانىق ەكەن. تەك ناقتى قانداي كومەك كورسەتىلگەنىن ايتا المادى. اكىمدىكتەگىلەر الداعى ۋاقىتتا قولعا الامىز دەپ ۋادە بەردى. ءتىپتى، اكىمنىڭ ورىنباسارى كومەككە ءزارۋ وتباسىنىڭ احۋالىمەن ءوزى بارىپ تانىساتىنىن ايتتى.

مارجان بالبايەۆا، الاتاۋ اۋدانى اكىمىنىڭ ورىنباسارى:

- ءقازىر ءبىز تۇرعىن ءۇي ماسەلەسىنە ارالاسپايمىز. ويتكەنى تۇرعىن ءۇي باسقارماسى بار. ەندى مەن ءوز ەسەبىمنەن وسىنداي كىسى كەزەكتە تۇر ەكەن. قانشاسىنشى كەزەكتە، قالاي جىلجىپ جاتىر، قالاي بولادى دەپ سۇراپ بىلە الامىن. كونسۋلتاسيا رەتىندە. 

الەۋمەتتىك كومەك كورسەتىلگەنىمەن، اكىمدىك باسپانا ماسەلەسىن شەشە المايتىنىن كەسىپ ايتتى. ءبىراق قالا باسشىلارى باتىر انانىڭ مۇڭىنا قۇلاق اسار دەگەن ءۇمىت بار.