بۇگىن ۇلتتىق ۇلان «وڭتۇستىك» وڭىرلىك قولباسشىلىعىندا قازاقستان رەسپۋبليكاسى ۇلتتىق ۇلانىنىڭ قۇرىلعانىنا 24 جىل تولۋ قۇرمەتىنە وراي سالتاناتتى كەش بولىپ ءوتتى، - دەپ حابارلايدى «قامشى» پورتالى قولباسشىلىقتىڭ باسپا ءسوز قىزمەتىنە سىلتەمە جاساپ.
ءىس-شاراعا وڭىرلىك قولباسشىلىق وفيسەرلەرى، كەلىسىمشارت اسكەري قىزمەتشىلەرى، ساربازدار، ءوزارا بىرلەستىكتەگى ءىس-قيمىل ورگاندارىنىڭ قىزمەتكەرلەرى جانە ۇلتتىق ۇلان ارداگەرلەرى قاتىستى.
سالتاناتتى جيىندا «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور الىبەك سەرالييەۆ ۇلاندىقتاردى كاسىبي مەرەكەلەرىمەن قۇتتىقتاپ، قىزمەتتىك-جاۋىنگەرلىك مىندەتتەرىن ورىنداۋدا كوزگەن تۇسكەن اسكەري قىزمەتشىلەردى جانە وسكەلەڭ ۇرپاقتى پاتريوتتىق رۋحتا تاربيەلەۋگە قوسقان ۇلەستەرى ءۇشىن ۇلتتىق ۇلان ارداگەرلەرىن مەدالدارمەن جانە گراموتالارمەن ماراپاتتادى.
قولباسشى ءوز سوزىندە ەلباسىمىز ن.نازارباۆتىڭ ۇلتتىق ۇلان اسكەرىنە ەرەكشە كوڭىل بولەتىنىن ايتا كەلىپ، استانا قالاسىنداعى اسكەري قالاشىقتى اشۋ كەزىندە ايتقان «سەندەردىڭ الدارىڭدا ءبىزدىڭ زاڭدارىمىزدى بۇزاتىن قىلمىسقا قارسى كۇرەسۋ جانە ەلدىڭ تىنىشتىعىن كۇزەتۋ مىندەتتەرى تۇر.سەندەر ءبىزدىڭ قارۋلى كۇشتردىڭ ءبىر بولىگىسىڭدەر. قاجەت جاعدايدا بارلىقتارىڭ بىرلەسىپ، ارميا قۇرامىندا ەلىمىزدىڭ تاۋەلسىزدىگى مەن وتانىمىزدىڭ تىنىشتىعىن قورعايتىن بولاسىڭدار. وسىنداي مەملەكەتتىڭ قامقورلىعىنا سەندەر وزدەرىڭنىڭ قاجىرلى ەڭبەكتەرىڭمەن، قايتپاس قايسارلىقتارىڭمەن جانە وتان الدىندا تۇرعان كەز كەلگەن بۇيرىقتى تاپجىلماي ورىندايتىندارىڭا مەن سەنىمدىمىن!» دەگەن سوزدەرىن مىسالعا كەلتىردى.
جيىن بارىسىندا ءسوز العان ۇلتتىق ۇلان ارداگەرى، وتستاۆكاداعى پولكوۆنيك گەنناديي فالەيەۆ تە بارشا ۇلاندىقتاردى مەرەكەلەرىمەن قۇتتىقتاپ، ولارعا جۇرەكجاردى تىلەكتەرىن ارنادى.
ماراپاتتاۋ ءىس-شاراسىنان كەيىن كەش مەرەكەلىك باعدارلاماعا ۇلاستى.
ەستەرىڭىزگە سالساق، ۇلتتىق ۇلاننىڭ جاۋىنگەرلىك تاريحي جىلناماسى سوناۋ تاۋەلسىزدىكتىڭ العاشقى جىلدارىندا، 1992 جىلى 10 قاڭتاردا ەلباسى نۇرسۇلتان ءابىش ۇلى نازاربايەۆتىڭ «قازاقستان رەسپۋبليكاسى ءىىم ىشكى اسكەرلەرى تۋرالى» جارلىعىنا قول قويعاننان باستاپ جازىلا باستادى.
"2015 جىلدىڭ باسىندا «قازاقستان رەسپۋبليكاسىنىڭ ۇلتتىق ۇلانى تۋرالى» زاڭ قابىلدانىپ، ىشكى اسكەرگە ۇلتتىق ۇلان مارتەبەسى بەرىلدى. تىنىشتىقتىڭ تۇعىرىندا تۇرعان كۇش-قۋات قۇرىلىمىنا زاڭ اياسىندا جاڭا ارنايى مىندەتتەر جۇكتەلدى، قىزمەتتىڭ ناقتى تارماقتارى مەن ماقساتتارى ايقىندالدى، اسكەري قۇرىلىمنىڭ مارتەبەسى جوعارىلاتىلدى. وزدەرىنىڭ دايارلىعىن، كاسىبي بىلىكتىلىكتەرىن جوعارىلاتۋ، تاجىريبەلىك بىلىمدەرىن ارتتىرۋ ارقىلى ۇلاندىقتار كۇش-قۇرىلىم ورگاندارى اراسىندا لايىقتى ورنىن الدى" دەلىنگەن باسپا ءسوز قىزمەتى تاراتقان حابارلامادا.
بۇگىندە ۇلتتىق ۇلان اسكەرى قوعامدىق تىنىشتىقتى ساقتاۋ، ماڭىزدى مەملەكەتتىك نىسانداردى قورعاۋ، سوتتالعانداردى كۇزەتۋ مەن ايداۋىلداۋ، مەملەكەت اياسىندا وتكىزىلەتىن ءىس-شارالاردىڭ قاۋىپسىزدىگىن قامتاماسىز ەتۋ سەكىلدى ءبىرقاتار وزىنە جۇكتەلگەن مىندەتتەردى تابىستى ورىنداۋدا.
