11 قاڭتار جىلدىڭ ەڭ «ادەپتى» كۇنى بولىپ سانالادى – بۇل كۇنى بۇكىلالەمدىك «راحمەت» كۇنى تويلانادى. بۇۇ مەن يۋنەسكو-نىڭ باستاماسىمەن پايدا بولعان بۇل مەرەكەنىڭ وزىندىك ماعىناسى مول، ويتكەنى بۇل مەرەكەنى ازاماتتىعىنا، ۇلتىنا، ءدىني سەنىمدەرىنە قاراماستان بۇكىل الەم بولىپ تويلايدى.

ارينە، جىلدىڭ ءار كۇنى سىپايى بولۋعا تىرىسۋىمىز كەرەك. الايدا، كوپ جاعدايدا العىس ايتۋدى ۇمىتىپ، نەمەسە وعان ەرەكشە كوڭىل بولمەيمىز. العىس سوزدەرىندە ءبىر سيقىرلىق بار – ولار ارقىلى بىزدەر بىر-بىرىمىزگە ريزاشىلىعىمىزدى كورسەتەمىز، كوڭىلىمىزدى بىلدىرەمىز، جاقسى ەموسيالار سىيلايمىز.

كوپتەگەن تۋريستىك جولسىلتەمەلەردە راحمەت ءسوزىن ەرەكشە كورسەتىپ، ءتىپتى، ونى سول تىلگە ءتان اكسەنتپەن ايتىلۋىن ەرەكشە اتاپ وتەدى. عالىمداردىڭ ايتۋى بويىنشا، راحمەت ءسوزىن ايتۋ – ادامدار اراسىندا جاقسى قاتىناس ورناتادى.

ورىستىڭ «سپاسيبو» ءسوزى 16 عاسىردا «سپاسي بوگ» دەگەننەن شىققان ەكەن. اعىلشىنداردىڭ «تhank you» تىركەسى دە جاي العىس ايتۋ سوزدەرى عانا ەمەس ەكەن. ال ارابتىڭ «راحمەت» ءسوزى قازاقتىڭ «شۇكىر» دەگەن سوزىمەن ماندەس كورىنەدى. وسىعان قاراپ، قاي تىلدە بولماسىن، راحمەت ءسوزى ءار حالىقتىڭ ءتىل مادەنيەتىندە ۇلكەن ورىن الاتىنى كورىنەدى.

پسيحولوگتاردىڭ ايتۋى بويىنشا، العىس سوزدەرى – ادامدى تىنىشتاندىرۋ، جۇرەگىن جىلىتۋدىڭ بىردەن-بىر امالى. باستىسى، العىسىڭىز جۇرەكتەن شىعۋى شارت.

العىس ايتۋدىڭ دا ءجون-جوراسى بار كورىنەدى. «راحمەت» دەگەن ءسوزدى ەرەكشە تولقىنىسپەن، شىنايى تۇردە ينتوناسيالىق ەكپىن بەرىپ ايتقان جانە ءسوزىڭدى ارناپ وتىرعان ادامنىڭ كوزىنە تىكەلەي قاراپ ايتقان دۇرىس، دەيدى ادەپ عىلىمىنىڭ ماماندارى.