«قازاقستان مۇسىلماندار وداعى» دەگەن ۇيىم قۇرىپ، ءوزىن سول ۇيىمنىڭ باسشىسى رەتىندە تانىستىرىپ جۇرگەن مۇرات تەليبەكوۆ تۋرالى قازاقستان مۇسىلماندارى ءدىني باسقارماسىنىڭ باسپا ءسوز قىزمەتى رەسمي مالىمدەمە جاسادى، - دەپ حابارلايدى «قامشى» پورتالى.

ءمۇفتيات وكىلى newtimes.kz اقپاراتتىق سايتىنىڭ ساۋالىنا بەرگەن جاۋابىندا م. تەليبەكوۆتىڭ ارەكەتىن قازاقستاننىڭ مۇسىلمان جاماعاتىنا قاتىسى جوق دەگەندى ايتادى.

«قمدب (قازاقستان مۇسىلماندارىنىڭ ءدىني باسقارماسى – رەد.) بۇعان دەيىن دە مۇرات تەليبەكوۆ قازاقستاننىڭ بارلىق مۇسىلماندارى اتىنان سويلەۋگە قۇقىعى جوقتىعى، «قازاقستاننىڭ مۇسىلماندار وداعى» مۇسىلمان ۇيىمى ەمەس ەكەندىگى تۋرالى رەسمي مالىمدەمە جاساعان بولاتىن. ءبىز ادىلەت مينيسترلىگىنە دە سۇراۋ سالىپ، اتالعان ۇيىم تۋرالى مالىمەتتەردى ىزدەستىردىك. بىزگە مينيسترلىكتەن «قازاقستان مۇسىلماندارىنىڭ وداعى» دەگەن ۇيىمنىڭ تىركەلمەگەنى تۋرالى جاۋاپ كەلدى. بۇدان باسقا، م. تەليبەكوۆ ەشبىر ءدىني ۇيىمنىڭ باسشىسى نەمەسە مۇشەسى رەتىندە دە تىركەلمەگەن. وسىعان بايلانىستى قمدب ونىڭ ءوزىن قازاقستان مۇسىلماندار وداعىنىڭ باسشىسى دەپ تانىستىرۋىنا، باق-تاردا مۇسىلماندار اتىنان سويلەۋگە، ومىردە جوق ۇيىمنىڭ اتىنان اقپارات تاراتۋعا قۇقىعى جوق دەپ سانايدى»، - دەلىنگەن قمدب باسپا ءسوز قىزمەتىنىڭ جەتەكشىسى اعابەك قونارباي ۇلى بەرگەن جاۋاپتا.

سونداي-اق، newtimes.kz-كە اتالعان ۇيىم تۋرالى «دىندەردى زەرتتەۋ ورتالىقتارى قاۋىمداستىعىنىڭ» ديرەكتورى يۋليا دەنيسەنكو دا پىكىر بىلدىرگەن.

«ەل ىشىندە مۇرات تەليبەكوۆتىڭ باق-تا كورىنۋ ءۇشىن اقپاراتتىق سەبەپ تۋعىزۋعا تىرىسىپ جۇرگەن ادام ەكەنىن ءبارى بىلەدى. ال، شەتەلدىك قۇقىقورعاۋ ورگاندارىن «قازاقستان مۇسىلماندار وداعى» اداستىرىپ كەلەدى. ادام قۇقىقتارى، تەرروريزم، ەكسترەميزممەن كۇرەس تاقىرىبىنداعى جيىنداردا، دوڭگەلەك ۇستەلدەردە ونىڭ پىكىرلەرى مۇسىلماندار ءدىني بىرلەستىگى اتىنان قابىلدانىپ ءجۇر. مۇرات تەليبەكوۆتىڭ جىنىستىق قاتىناسقا سالىق ەنگىزۋ سياقتى دەسترۋكتيۆتى سوزدەرى قوعامدا تۇسىنبەۋشىلىك تۋدىرىپ، حالىقارالىق ۇيىمدارمەن بايلانىس ورناتۋ ارەكەتتەرىنە كەدەرگى جاساۋدا. سول ءۇشىن ونىڭ قازاقستان مۇسىلماندارى اتىنان سويلەۋىنىڭ جولىن كەسۋ كەرەك»، - دەگەن يۋليا دەنيسەنكو.

ال، مۇرات تەليبەكوۆتىڭ ءوزى «قازاقستان مۇسىلماندار وداعىنىڭ» «ماك» – Muslim اssociation of Kazakhstan جەكە قايىرىمدىلىق قورى رەتىندە تىركەلگەن ۇيىم ەكەندىگىن، وعان قولدانىستاعى زاڭنامالارعا سايكەس، مۇشەلىككە وتۋگە بولاتىنىن جانە ول ءۇشىن مۇسىلمان بولۋ مىندەتتى ەمەس ەكەندىگىن ايتقان.

"قازاقستان مۇسىلماندار وداعى" ۇيىمى باسشىسى رەتىندە تانىمال بولعان م. تەليبەكوۆ بۇعان دەيىن ۇيىم اتىنان مس سايلاۋبەك ەسىمدى رەپەرگە "جىل ادامى" اتاعىن بەرىپ، م. سااكاشۆيلليدى قازاقستاننىڭ ءبىر وبلىسىنا اكىم ەتىپ تاعايىنداۋدى، گ. مەرچەنكونى قمدب ءتوراعالىعىنا ۇسىنىپ، جىنىستىق قاتىناسقا تۇسەتىندەردەن سالىق جيناۋدى باستاما ەتىپ كوتەرىپ اتى شىققان بولاتىن. ءقازىر الماتىنىڭ المالى اۋداندىق سوتىندا "م. تەليبەكوۆتىڭ "ۆەتەر س ۋليسى" كىتابىنان قازاق حالقىنىڭ ار-نامىسىنا تيەتىن ۇزىندىلەر جاريالادى" دەگەن ايىپپەن قوعام بەلسەندىلەرى ە. نارىمبايەۆ پەن س. مامبەتاليننىڭ ۇستىنەن قىلمىستىق ءىس قارالۋدا. م. تەليبەكوۆتىڭ ءوزى اتالعان كىتاپتىڭ اۆتورى ەكەنىن مويىنداعانىمەن، قوس بەلسەندى جاريالاعان ۇزىندىلەرگە قاتىسىم جوق دەپ، ات-تونىن الا قاشىپ وتىر.