ءوز ويىم وزىمدە! ۋكراينا مەن رەسەي اراسىندا تۇتانعان وتتى كەيبىرەۋلەر كرەملدىڭ بانديتتىك بيلىگىنەن كورۋدە. ياعني، وعان پۋتين مەن مەدۆەديەۆ قانا كىنالى دەسەدى. مەن ءوز باسىم بۇل ويمەن كەلىسپەيمىن. ويتكەنى، رەسەي - رەسەي بولعالى بيلىك باسىندا دەنى دۇرىس ادام وتىرعان جوق. ءول دە، ءبىراق ءجىبى ءتۇزۋ پاتشاسىن ەسىمە تۇسىرە المايمىن. سوناۋ، يوان گروزنىيدان باستاپ، كەڭەستىك كەڭكەلەستەرگە دەيىن... ياعني، بۇل يمپەريالىق كەسەلگە دۋشار بولعان كۇللى ورىس حالقىنىڭ تراگەدياسى. ۋكراينا مىسالىندا قاراپايىم ورىس حالقىنىڭ پيعىلىن تانىدىق. بىرەن-ساراندار بولماسا، بۇكىل تەلەارنا، الەۋمەتتىك جەلى، گازەت-جۋرنالدا ۋكراين باۋىرلارى تۋرالى ءبىر جىلى لەبىز ايتىپ، پاتشاسىنا قارسى شىققانىن ەستىمەدىك. 350 جىلدىق گەگەموندىق، ۇلىدەرجاۆاشىلدىق، وزگە ۇلتتاردىڭ ۇلىسى بولۋ وڭاي ەمەس. "حيتروي ج-پە ... س ۆينتوم" دەگەن دە ورەكەڭنىڭ ءوز ءسوزى. ازىرگە ونداي ءۆينتتى مۇشە تابىلماي تۇر. ءبىراق ورىس حالقىن وسى كەسەل ورعا جىقپاي تىنبايدى. ال قازىرگى جاعداي بويىنشا رەسەي ۋكرايناعا وق اتا المايدى. وعان كرەملدىڭ شاماسى جەتپەيدى. پۋتيندىك بيلىكتىڭ كوكسەگەنى - قان توگۋ. ولارعا قوي توعىتاتىن توعانداي قان ەمەس، تەڭىزدەي قان قاجەت! مەيلى، ول ورىستىڭ، تاتاردىڭ، ۋكرايننىڭ، گرۋزيننىڭ قانى بولسىن، ءبارىبىر. ايتەۋىر، ۋكراينا ىشىندە ازاماتتىق ءورت تۇتانىپ، ءبىر-بىرىن قىرىپ باستاسا بولعانى. حاوس ورناعانى كەرەك. سول ءۇشىن "دەرەۋ اسكەر كىرگىزىپ، ورىستاردىڭ قۇقىعىن قورعاۋ" دەگەن ۇران كوتەردى. جەدەل پاسپورت تاراتۋعا كىرىستى. سەپاراتيستەرگە جەل بەرىپ، دەمەپ جاتىر. قايتسە دە ۇزاققا سوزىلار ازاماتتىق سوعىس ءورتىن تۇتاتۋى قاجەت! سول كەزدە ەۋروپالىق وداق، اقش، الەمدىك قاۋىمداستىق الدىندا ۋكراينادا شىن مانىندە توڭكەرىس ەمەس، "بۇلىكتىڭ" ورىن العانى "ءمالىم" بولار ەدى. ول كەزدە الگى دەموكراتتار ۋكراينانى ساباسىنا ءتۇسىرىپ بەر دەپ رەسەيگە جالىنار ەدى. مىنە، سوندا پۋتين الەم الدىندا سۇتتەن اق، سۋدان تازا بولىپ شىعار ەدى دە، پوستكەڭەستىكتە تولىق قوجالىققا يە بولار ەدى...