الدىن الا حابارلانعانداي، بۇگىننەن باستاپ الماتىداعى بارلىق قوعامدىق كولىكتەر (مەترودان باسقا) «وڭاي» ەلەكتروندى بيلەتتەندىرۋ جۇيەسىنە تولىقتاي كوشتى. الايدا، تۇرعىنداردىڭ تۇگەلدەي ەلەكتروندى كارتا الماۋىنا بايلانىستى اۆتوبۋستاردا تۇسىنىسپەۋشىلىكتەر ورىن الۋدا، - دەپ حابارلايدى «قامشى» پورتالى.
تاڭ سارىدەن الماتىلىق اۆتوبۋستار كوندۋكتورسىز جانە ۆاليداتور قۇرىلعىلارىنسىز رەيسكە شىقتى. جول اقىسى ءۇشىن قولما-قول ەسەپ ايىرىسۋ الىنىپ تاستالعان سوڭ، قوعامدىق كولىكتەردەگى جولاقى تولەۋ جۇيەسىن باقىلاۋشىلار سانى دا ارتىپ، ءاربىر ايالدامادان قىلاڭ بەرۋدە.
الايدا، قوعامدىق كولىكتى پايدالانۋشىلاردىڭ ءبىرشاماسى «وڭاي» كارتالارىن الىپ ۇلگەرمەگەندىكتەن، كوپ جولاۋشى جولاقىسىن قالاي تولەۋدى بىلمەي دال بولۋدا. كەيبىر اۆتوبۋس جۇرگىزۋشىلەرى كارتاسى جوق جولاۋشىلاردان قولما-قول اقشا جيناۋدا. الايدا، جولاۋشىلارعا جولاقىسىن تولەگەندىگىن راستايتىن ەشبىر بيلەت نە قۇجات بەرىلىپ جاتقان جوق. سوناي-اق، جولاۋشىلار جەكەمەنشىك اۆتوپاركتەرگە قاراستى اۆتوبۋستاردىڭ كەيبىرىندە بۇرىنعى كوندۋكتورلار ءالى قىزمەت كورسەتىپ جۇرگەنىن ايتۋدا.
بۇعان دەيىن «الماتى كولىك حولدينگى» كاسىپورنىنداعىلار كارتامەن تولەم جاساماعان جولاۋشىلاردى پوليسيا شاقىرتىپ، اكىمشىلىك جازاعا تارتاتىندىقتارىن حابارلاعان ەدى. الايدا، بۇگىندىككە، ونداي وقيعانىڭ تىركەلگەندىگى تۋرالى رەسمي مالىمەتتەر جاريالانبادى.شى
"قامشى" پورتالى اتالعان جۇيەنى قولدانىسقا ەنگىزۋدە تۋىنداۋى مۇمكىن قيىندىقتار تۋرالى بۇرىن دا جازعان ەدى.
