كەزەكتەن تىس پارلامەنت ءماجىلىسى دەپۋتاتتارىنىڭ سايلاۋى بيىل ناۋرىز ايىندا وتەدى، - دەپ حابارلايدى «قامشى» پورتالى كازتاگ-قا سىلتەمە جاساپ.

«كەزەكتەن تىس ءماجىلىس سايلاۋى شامامەن ۇستىمىزدەگى جىلدىڭ ناۋرىز ايىندا وتەدى. ياعني، قاڭتاردا پارلامەنتتىڭ تومەنگى پالاتاسىنىڭ وكىلەتتىگىن مەرزىمىنەن بۇرىن توقتاتۋ تۋرالى شەشىم جاريا بولۋى كەرەك جانە ەكى اي ىشىندە جاڭا دەپۋتاتتاردىڭ سايلاۋى وتەدى. پارلامەنت سايلاۋىمەن ءبىر ۋاقىتتا جەرگىلىكتى ءماسليحاتتاردىڭ سايلاۋى دا ءوتۋى ءتيىس»، - دەپ حابارلاعان اقپارات اگەنتتىگىنە استاناداعى سەنىمدى دەرەك كوزى.

قولدانىستاعى زاڭناما بويىنشا، ءماجىلىس دەپۋتاتتارىنىڭ سايلاۋى پالاتا دەپۋتاتتارىنىڭ وكىلەتتىگى اياقتالۋىنان ەكى ايدان كەش ەمەس مەرزىمدە ءوتۋى ءتيىس. قازىرگى ءماجىلىس دەپۋتاتتارى 2012 جىلدىڭ قاڭتار ايىندا سايلانعان بولاتىن. وندا «نۇر وتان» پارتياسى 80،99 پايىز، «اق جول» پارتياسى 7،47، قازاقستاننىڭ حالىقتىق كومۋنيستىك پارتياسى 7،19 پايىز داۋىس جيناعان ەدى.

قازاقستان كونستيتۋسياسىنا ساي، بۇگىندە ماجىلىستە 107 دەپۋتات بار. ولاردىڭ 98ء-ى پارتيالىق ءتىزىم بويىنشا، 9-ى قازاقستان حالقى اسسامبلەياسى اتىنان سايلانادى. كەزەكتەن تىس پارلامەنت سايلاۋى قولدانىستاعى زاڭناماعا ساي دەپۋتاتتاردىڭ وكىلەتتىگى مەرزىمىنەن بۇرىن توقتاتىلعاننان كەيىن ەكى اي مەرزىم ىشىندە ءوتۋى كەرەك.