اقمولا وبلىسى ەسىل اۋداندىق ءىىب-ى ۋاقىتشا ۇستاۋ يزولياتورىنىڭ 21 جاستاعى قىزمەتكەرى وزىنە بەكىتىلگەن قارۋدان اتىلىپ ءولدى، - دەپ حابارلايدى «قامشى» پورتالى وبلىستىق ءىىد باسپا ءسوز قىزمەتىنە سىلتەمە جاساپ.
«1994 جىلى 19 ناۋرىزدا تۋعان ۋاقىتشا ۇستاۋ يزولياتورى ايداۋىلداۋ قىزمەتىنىڭ قىزمەتكەرى 11 قاڭتار كۇنى تابەلدى قارۋمەن باسىنان اتقان. جاراقات سالدارىنان پوليسەي كوز جۇمدى» دەلىنگەن حابارلامادا.
اتالعان وقيعا بويىنشا قىزمەتتىك تەكسەرۋ باستالىپ، قىلمىستىق ءىس قوزعالدى.
پوليسەيلەر قازا بولعان قىزمەتكەردىڭ ءولىمىن قىزمەت بابىمەن بايلانىسى جوق وقيعا ەكەندىگىن جانە ول قىزمەتكە ورنالاسار الدىندا، قىزمەت وتكەرۋ كەزىندە پسيحولوگيالىق اۋىتقۋلار بايقالماعانىن ايتۋدا.
