ناتو باس حاتشىسى اندەرس فوگ راسمۋسسەن رەسەيدى ۋكراينادان اسكەرىن الىپ كەتىپ، بۇل ەلدىڭ ىشكى ىسىنە ارالاسۋدان باس تارتۋعا شاقىردى. اندەرس فوگ راسمۋسسەن بۇل تۋرالى كەشە بريۋسسەلدە ناتو-عا مۇشە 28 ەلدىڭ ەلشىلەرى قاتىسقان توتەنشە جيىندا مالىمدەدى.

سەگىز ساعاتقا سوزىلعان كەزدەسۋدە اليانس ەكى جاقتى “ماسەلەنى تەز ارادا ديالوگ ارقىلى، بۇۇ قاۋىپسىزدىك كەڭەسى نەمەسە ەقىۇ باستاماسىمەن حالىقارالىق باقىلاۋشىلاردىڭ قاتىسۋى ارقىلى شەشۋگە” شاقىردى.

كەشە جيىننان بۇرىن راسمۋسسەن رەسەيدىڭ ۋكراينانىڭ قىرىم اۆتونوميالىق رەسپۋبليكاسىنا اسكەرىن جىبەرۋى “ەۋروپاداعى بەيبىتشىلىك پەن قاۋىپسىزدىككە قاتەر توندىرەدى، ماسكەۋ اسكەري ارەكەتتەرىن دەرەۋ توقتاتۋى ءتيىس” دەگەن.

1 ناۋرىز كۇنى رەسەيدىڭ فەدەراسيا كەڭەسى ءبىراۋىزدان رەسەي قارۋلى كۇشتەرىن ۋكراينا تەرريتورياسىندا پايدالانۋ تۋرالى پۋتين ۇسىنىسىن قولدادى. رەسەي پرەزيدەنتى ۆلاديمير پۋتين فەدەراسيا كەڭەسىنەن “جاعداي تۇراقتانعانشا ۋكراينا تەرريتورياسىندا اسكەر پايدالانۋعا” رۇقسات سۇراعان ەدى. رەسەي پارلامەنتىنىڭ جوعارعى پالاتاسى – فەدەراسيا كەڭەسى سپيكەرى ۆالەنتينا ماتۆيەنكونىڭ ايتۋىنشا، قاۋلى قابىلدانعان مەزەتتەن باستاپ كۇشىنە ەنگەن.