رەجيسسەر قاناعات ءمۇستافيننىڭ "16 قىز" اتتى رومانتيكالىق كومەدياسى 3 ناۋرىز كۇنى پروكاتقا شىعادى، - دەپ حابارلايدى «قامشى» پورتالى.
كارتينادا باستى رولدەردە بەرىك ايتجانوۆ، اشا ماتاي مەن ءانۋار نۇرپەيىسوۆ وينايدى. 2014 جىلدىڭ تامىزىندا باستالعان ءتۇسىرىلىم جۇمىستارى الماتى، باياناۋىل، سونىمەن قاتار، استانا مەن قاراعاندىدا ءوتتى.
"16 قىز" ءفيلمى اتا-اناسى ۇيلەندىرۋدى ارماندايتىن باۋىرجان ەسىمدى جىگىتتىڭ وقيعاسىن باياندايدى. باس كەيىپكەردىڭ اتا-اناسى بالالارىنا قالىڭدىق ىزدەيدى. باۋىرجان بولسا ماحابباتپەن ۇيلەنگىسى كەلەدى. ال ونىڭ تاڭداۋى ايجان باسقا اداممەن اتاستىرىلىپ قويعان. اكەسىنىڭ كوڭىلىن قالدىرعىسى كەلمەگەن قىز سۇيىكتىسىنەن باس تارتادى.
ءفيلمنىڭ سەناريي اۆتورلارى - قاناعات مۇستافين مەن جانات قاسبەكوۆ، ال پروديۋسەر - ايدارحان ادىلبايەۆ.
