ۇلتتىق ەكونوميكا ءمينيسترى ەربولات دوسايەۆ جاقىن كۇندەرى ءبىرىڭعاي زەينەتاقى جيناقتاۋشى قورىنداعى قاراجات ۇكىمەتتىڭ ينۆەستيسيالىق باعدارلامالارىنا جۇمسالاتىن بولاتىنىن مالىمدەدى. ونىڭ ايتۋىنشا، قاڭتار ايىنان باستاپ ۇلتتىق قور مەن بزجق-نى باسقارۋ تۋرالى كەڭەستەر بىرىكتىرىلگەن.

«زەينەتاقى قورىنداعى قاراجات قايدا باعىتتالاتىنىن شەشەتىن بولامىز. ءقازىر قاجەتتى مەرزىمنىڭ ناقتىلانۋىن كۇتۋدەمىز. مەنىڭ ويىمشا، ول اقپان ايىنىڭ باسى بولماق. ۇلتتىق بانك ۇكىمەتپەن بىرلەسىپ 2016 جىلى بزجق اقشاسىن قايدا جۇمساۋ بويىنشا ۇسىنىسىن ايتادى» دەگەن مينيستر بۇل ماسەلەنىڭ ۇلتتىق كاسىپكەرلەر پالاتاسىنىڭ زەينەتاقى قورىنداعى اقشانى بيزنەستى قارجىلاندىرۋعا باعىتتاۋ تۋرالى وتىنىشىنە بايلانىستى ەكەنىن دە ايتقان.

«ول اقشانى قايدا ينۆەستيسيالاۋ تۋرالى ماسەلە بار. بۇل اقشالار ۇكىمەتتىڭ دە، ۇلتتىق بانكتىڭ دە اقشاسى ەمەس. بۇل ءبىزدىڭ زەينەتكەرلەردىڭ اقشاسى. سوندىقتان، كىرىستىڭ مول بولۋىن قامتاماسىز ەتۋ باستى باعىت بولادى. ال، ەكىنشى ماسەلە، ارينە، قاراجاتتىڭ ساقتالۋى، قايدا جۇمسالاتىنى. سوندىقتان، بۇل ماسەلە جان-جاقتى سالماقتانىپ شەشىلەدى» دەپ، ەكونوميكا ءمينيسترى سەندىرىپ وتىر.

زەينەتاقى جيناقتارىن جۇمساۋ ۇلتتىق بانكتىڭ نازارىندا بولاتىنىن ايتقان ول 2016 جىلى قور قايتادان جەكە مەنشىككە بەرىلەتىنىن جەتكىزدى.

«ءبىز بارلىق ايماقتاردان، بارلىق قاۋىمداستىقتاردان كەلگەن ۇسىنىستارمەن تانىستىق. ءقازىر بزجق-داعى اقشا قانشا كولەمدە، قايدا باعىتتالاتىنى شەشىلەدى. ەلباسىنىڭ جولداۋىنا ساي، 2016 جىلى زەينەتاۇى اكتيۆتەرى جەكە قورلارعا بەرىلەدى»، - دەدى ول.

2013 جىلى مەملەكەتتىڭ باسقارۋىنا كوشكەن قازاقستانداعى زەينەتاقى اكتيۆتەرىنىڭ قايتادان جەكە مەنشىك قورلارعا وتەتىنى تۋرالى العاش رەت بىلتىر ۇلتتىق بانكتىڭ سول كەزدەگى ءتوراعاسى قايرات كەلىمبەتوۆ مالىمدەگەن بولاتىن.