اقتاۋدا جۇكتى ايەلدەرگە ارنالعان كيىمدەر تىگىلە باستادى. ءارى ىڭعايلى، ءارى ءساندى. جۇكتى ايەلدەر ەندى وزىنە قاجەتتى كيىمگە تاپسىرىس بەرە الادى، - دەپ حابارلايدى 24.kz.

اسىرەسە، اقتاۋداعى «ءداريا» سەحىنىڭ ونىمدەرىنە دەگەن سۇرانىس كۇننەنكۇنگە ارتىپ كەلەدى. ىسمەر اسەل جەكەنوۆا بىرنەشە قالادان دۇكەندەر جەلىسىن اشىپ، 365 كۇن ىشىندە بولاشاق انالارعا ارناپ، 2 مىڭعا جۋىق كيىم تىگىپ بەردى. ءلايلا تولەشوۆانىڭ وتاندىق ونىمدەرگە بۇيرەگى بۇرىپ تۇرادى. جاس انا جاقىندا بەسىنشى بالاسىن دۇنيەگە اكەلەدى. جۇكتىلىك كەزىندە دە ءساندى ءارى ىڭعايلى كيىنگەندى جاقسى كورەتىن كەلىنشەك بۇل دۇكەننىڭ تۇراقتى تۇتىنۋشىسى. ءلايلا تولەشوۆا، ساتىپ الۋشى: - جۇكتىلىك كەزىندە ساندىلىگىمەن قاتار ىڭعايلى كيىمدەردى تابۋ وتە قيىن. شەتەلدىك تاۋارلاردىڭ باعاسى وتە قىمبات. ال وزىمىزدە شىعىپ جاتقان مىنا كويلەكتەر وتە ساپالى، ءارى باعاسى دا ارزان. ءتىپتى جۇكتىلىك كەزىندە دە، بالا ەمىزگەندە دە كيە بەرۋگە بولادى. 1 ايدان 9 ايعا دەيىن كيۋگە بولادى. مىنا جەردە ءوزىنىڭ تۇيمەسى بار. ونى تەسىگىنەن وتكىزىپ، رەتتەۋگە بولادى. بولاشاق انالارعا ارنالعان كيىمدەردىڭ بارلىعى امبەباپ. ءارقايسىسىندا سانگەردىڭ قولتاڭباسى جاتىر. «ءداريا» برەندىنىڭ ومىرگە كەلۋىنە اسەل جەكەنوۆانىڭ جۇكتىلىگى تۇرتكى بولىپتى. كيىم تاڭداۋدا تالاي ماشاقاتتى باستان وتكىزگەن كەلىنشەك بولاشاق انالارعا ارنالعان كويلەكتەر تىگۋدى قولعا الادى. 12 ادامدى جۇمىسپەن قامتىعان وتاندىق ءوندىرىستىڭ ءورىسى كەڭەيۋدە.

اسەل جەكەنوۆا، سانگەر، جەكە كاسىپكەر:

- بولاشاق انالارعا ارنالعان كيىمدەردىڭ ەرەكشەلىگى بار. سۇرانىس بويىنشا تىزەدەن ۇزىنىراق كويلەكتەردى تىگەمىز جانە قولدارى كىشكەنە جابىقتاۋ، موداعا ساي اشىق ءتۇستى كيىمدەردى شىعارامىز. 2015 جىلى ەكى كوللەكسيا شىعاردىق: جازعى جانە قىسقى. بولاشاق انالاردان جاقسى سۇرانىس بولدى. مىنا سەحتا ايىنا 200-گە جۋىق ءونىم تىگىلەدى. كويلەكتەر مەن جەيدەلەر، شالبارلار مەن بەلدەمشەلەر بارلىعى دا بولاشاق انالار ءۇشىن. جۇكتى ايەلدەر جاستاناتىن ارنايى جاستىقتار مەن بالا ەمىزۋگە قاجەتتى توپتاما ساتىلىمدا كوش باستاپ تۇر.

روزا شمانوۆا، تىگىنشى:

- س ارپىنە ۇقساس جاستىقتار جۇكتى ايەلدەر ءۇشىن وتە ىڭعايلى. بۇل جاستىقتى جاستانىپ ۇيىقتاۋعا دا بولادى، وتىرعاندا دا ىشىڭىزگە ىڭعايلى. بالالاردى ەمىزگەندە قولدانۋعا بولادى. ءبىر سوزبەن ايتقاندا، امبەباپ جاستىق. ءبىر جىل بۇرىن دۇنيەگە كەلگەن وتاندىق برەندتىڭ جەتكەن جەتىستىگى جەتەرلىك. اتىراۋ جانە اقتوبە قالالارىندا دۇكەندەر جەلىسى بار. اسەلدىڭ جازعى كيىمدەر توپتاماسى «ءسان مەن ساحنا» حالىقارالىق ءسان بايقاۋىندا ەكىنشى ورىنعا يە بولعان. ول كەلەشەكتە ءسانقوي قىزدار مەن بالالارعا ارنالعان كيىمدەر تىگۋدى قولعا الماق. ىسكەر ايەل التىن قۇرساقتى انالارىمىز كوپ بولسا، ءوندىرىسىمىز ورلەي بەرەدى دەگەن سەنىمدە.