قاراعاندى وبلىسى شەت اۋدانىندا قۋانىش اتتى ازامات 4 ايەل الىپ، 16 بالا تاربيەلەپ وتىر. بۇل تۋرالى bnews.kz سايتى حابارلادى.

قۋانىش حانتۋرين 4 ايەلدى ءبىر شاڭىراق استىنا سىيدىرىپ، اۋىل-ايماققا سىيلى بولىپ وتىرعان ازامات. ول ەڭ العاشعى جۇبايىمەن 1986 جىلى وتباسىن قۇرىپتى.

جاس جۇبايلار شەت اۋدانىنىڭ ورتالىعىنا قونىس تەۋىپ، ءقازىر تۇرىپ جاتقان ۇيلەرىنىڭ قابىرعاسىن بىرگە قالادى. التى بالانى دۇنيەگە اكەلگەن باقىتگۇل اتا-ەنەسىنە سىيلى كەلىن بولدى.

باقىتگۇلدىڭ بايىپتى مىنەزى مەن وتاعاسىنا دەگەن قۇرمەتىنەن بولار، قۋانىش حاميت ۇلى ونىڭ ۇستىنەن ءۇش ايەل العاندا دا، تەرىس مىنەز تانىتپاي، وتباسىن ايرانداي ۇيىتىپ وتىر.

مەن ەكىنشى ايەل العاندا كوپ ادام تۇسىنگەن جوق. تەنتەك ادامدى جار ەتىپ دۇرىس جولعا سالسام، نە بولماسا مۇگەدەك ادامعا ۇيلەنىپ قامقور بولسام دەپ ارماندادىم.

قۋانىش حاميت ۇلى كوپ ايەل الۋ كەڭ بولۋعا، مەيىرىمدى بولۋعا جەتەلەيدى دەيدى.

«مەن ەكىنشى ايەل العاندا كوپ ادام تۇسىنگەن جوق. تەنتەك ادامدى جار ەتىپ دۇرىس جولعا سالسام، نە بولماسا مۇگەدەك ادامعا ۇيلەنىپ قامقور بولسام دەپ ارماندادىم. اۋىلدا مىنەزى شالكەستەۋ قىز بولدى، سوعان ءسوز سالدىم. الايدا ول باس تارتتى. كەيىننەن دەنساۋلىعى جوق جەرلەسىمە ۇيلەنۋگە نيەت قىلعاندا دا اكە-شەشەسى قارسى بولدى. وسىلاي جۇرگەندە پەيىلىمنىڭ تۇزۋلىگىنەن بولار، قازاقى، ءيمانجۇزدى قىزدى ەكىنشى ايەل ەتىپ الدىم»، — دەيدى وتاعاسى.

2001 جىلى قازىرگى ءتورتىنشى ايەلى مادينانىڭ (ول كەزدە مادينانىڭ جۇبايى بار) ارالاسۋىمەن ايجانعا ۇيلەنەدى. وزىنەن 17 جاس كىشى قىزبەن باس قوسقان قۋانىش اتا-اناسى مەن تۋعان-تۋىستىڭ قارسىلىعىنا تاپ بولادى.

«وسى كەزدە مەن اتا-انام مەن تانىستارىمنىڭ ريزالىعىنا قايتا بولەنۋ ءۇشىن سابىرلى مىنەز بەن تىنىمسىز ەڭبەككە عانا سۇيەنە الاتىندىعىمدى ءتۇسىندىم. ەكىنشى ەنەم عانا كەۋدەمنەن يتەرگەن جوق. بالدىزدارىمدى ءوزىم ۇزاتتىم، ەنەمدى قاسىما كوشىرىپ الدىم. كەيىننەن سەكسەننەن اسقان شەشەم كوبەيە بەر بالام، سەنىڭ ارقاڭدا ءتورت كەلىنگە سىيلىمىن، قۇدا-جەكجاتقا قۇرمەتتىمىن دەپ باتاسىن بەردى»، — دەيدى ول.

ءقازىر شەت اۋدانىنىڭ ورتالىعىنداعى ۇيدە قۋانىش ءبىرىنشى، ەكىنشى ايەلىمەن بىرگە تۇرادى. بايبىشە ەكىنشى ايەلدىڭ بالالارىن وقىتادى. جاس ايەل ءۇي شارۋاسىمەن اينالىسادى.

2006 جىلى وتاعاسى وزىنەن التى جاس كىشى ءۇشىنشى ايەلگە ۇيلەنەدى. ايگۇل جۇبايىمەن ءدام-تۇزى جاراسپاي 4 بالامەن اجىراسىپ كەتكەن ەكەن. شيەتتەي بالامەن قالعان ايەلگە پانا بولۋ ءۇشىن قۋانىش ايگۇلمەن نەكەلەسەدى.

مەن ۇيلەنگەن سوڭ بۇرىنعى جولداسى ەكى ۇلىن الىپ كەتتى. مەندە قالعان ەكى قىزى مەنى اكە دەيدى. مەن ولاردى اكەلەرىنەن بولمەيمىن. سىيلاڭدار دەپ ءوسىردىم. ايەلدەرىمە دە بالاعا داۋىس كوتەرمەڭدەر دەيمىن. سەبەبى اتا-انا ۇرىسسا، بالادا دا قارسىلىق پايدا بولادى. اناسىن سىيلاماعان بالا اكەنى دە سىيلامايدى»، — دەيدى قۋانىش حاميت ۇلى.

وتاۋىن قىستاققا تىككەن ايجاننان وتاعاسى ءبىر بالا ءسۇيىپ وتىر. 2014 جىلدىڭ جازىندا قۋانىش ءتورتىنشى رەت ۇيلەنىپ، 51 جاستاعى مادينانى جار ەتتى. ەكى بالامەن جەسىر قالعان مادينانىڭ جۇبايى قۋانىشتىڭ دوسى ءارى شاكىرتى بولاتىن.
مەن ولاردى اكەلەرىنەن بولمەيمىن. سىيلاڭدار دەپ ءوسىردىم. ايەلدەرىمە دە بالاعا داۋىس كوتەرمەڭدەر دەيمىن.
«جۇبايىم قۋانىش نۇسقاعان جولمەن ءجۇرۋدى ايتىپ كەتكەن بولاتىن. مەزگىلسىز كەلگەن قايعىنى جەڭىپ، قۋانىشتىڭ ەتەگىن ۇستادىم»، — دەيدى مادينا. ءتورتىنشى ايەلىن قۋانىش ەكىنشى قىستاققا ورنالاستىرعان.

52 جاستاعى قۋانىشتىڭ كىندىگىنەن 12 بالا وربىگەن، 4 بالانى باۋىرىنا باستى. جەسىرگە پانا، جەتىمگە سايا بولىپ وتىرعان قۋانىشتىڭ 51، 50، 46، 35 جاستاعى ءتورت ايەلى ءبىر شاڭىراقتىڭ ءتۇتىنىن ءتۇزۋ تۇتەتىپ وتىر. كوپ ايەل العان قۋانىش كۇنى-تۇنى بەل شەشپەي ەڭبەكتەنىپ، مال ءوسىرىپ، بالا-شاعاسىن تارىقتىرماي وتىر.

«ماعان ەلىكتەپ كوپ ايەل العان زامانداستارىمنىڭ ءبارى بىردەي باقىتتى بولعان جوق، ءبىرتالايى اجىراسىپ كەتتى»، — دەيدى قۋانىش حاميت ۇلى.

«سەبەبى ولار ايەلدىڭ سىرتقى سۋلۋلىعى مەن بايلىعىنا قىزىعىپ ۇيلەندى. ىشكى الەمىنە ۇڭىلمەدى. اتا-بابالارىمىز جەسىرىن قاڭعىرتپاۋ ءۇشىن، جەتىمىن جىلاتپاۋ ءۇشىن كوپ ايەل العان»، — دەيدى ول.